Wysokošulski dźeń po wšej Sakskej mnohich zajimcow přiwabił

Budyšin (SN/CS/jp). Wysokošulski dźeń je wčera po cyłej Sakskej syły zajimcow na uniwersity a wysoke šule wabił. Šulerjo hornich lětnikow njemějachu šulsku wučbu, zo móhli so wo móžnosćach studija abo wukubłanja wobhonić. Tež campus Budyšin Dualneje wysokeje šule Sakska je so na zarjadowanju wobdźělił. Młodostni slědowachu tam regularne čitanja. Bě jich telko zajimcow, zo dyrbjachu zamołwići přidatne stólcy do słucharnjow stajić. Nowa rektorka prof. Ka­tharina Bühn přednošowaše wo dualnym studiju. Běrowy studijnych nawodow prošachu na rozmołwu wo konkretnych prašenjach, mjez druhim wo tym, kak móža so firmy z partnerom za praktiske wukubłanje studowacych stać a kotre wuměnjenja maja za to spjelnić. Zasadnje móža tež mjeńše zawody z praksowym partnerom być, jeli maja tam sobudźěłaćerja z wysokošulskim wotzamknjenjom. Šulerjo, kotřiž su w zawodźe hižo praktikum přewjedli, chcychu wědźeć, hač móža tam w času studija dale dźěłać.