Serbske šulske towarstwo najebać wulke wužadanja wuspěšnje skutkuje

Smjerdźaca (SN/MiR). Najebać spadowace ličby porodow w zašłych lětach chce Serbske šulske towarstwo (SŠT) jako nošer serbskich pěstowarnjow wšitke swoje kubłanišća zachować. Aktualnje maja w tutych přebywanišćach něhdźe 20 procentow mjenje dźěći hač hišće před pjeć lětami. Předsydka SŠT Katharina Jurkowa rjekny wčera wječor na hłownej zhromadźiznje towarstwa w Smjerdźečanskej Lipje: „Wšitke naše pěstowarnje su nam wažne, tež tej we Wotrowje a w Němcach. Po ličbje móhli tam přebywace dźěći w našich druhich pěstowarnjach zaměstnić. Tola wěmy, kak wažnej pěstowarni runje w tamnišimaj nakromnymaj kónčinomaj za wjesnu zhromadnosć stej.“ Tež wšitkich přistajenych kubłarjow a kubłarki chce SŠT dale wobchować, byrnjež mjenje dźěći było.