Reprezentatiwna studija wo wuznamje našeje rěče we Łužicy

Budyšin (SN/jp). „Efektiwna rěčna politika a naslědne spěchowanje serbskeje rěče měło na woprawdźitej potrjebje bazować. Studija skići za to spušćomny zakład datow“, měni dr. Cordula Ratajczakowa, nawodnica rěčneho slědźenja projekta Zari, syće za serbsku rěč a regionalnu identitu w nošerstwje Domowiny. Wčera je wědomostnica w sydarni Serbskeho domu w Budyšinje reprezentatiwnu studiju „Serbska rěč w našim regionje“ předstajiła. Zaměr studije je, wědomostne dopóznaća wo rozšěrjenju a nałožowanju hornjoserbšćiny w serbskim sydlenskim rumje Sakskeje a wo nastajenju tudyšich wobydlerjow k njej zdobyć. Na zakładźe woprašowanja ludźi chcedźa zwěsćić, kotry wuznam serbšćina za wobydlerjow Hornjeje Łužicy ma. Podobne a přirunajomne přepytowanje je so posledni raz před něhdźe 40 lětami přewjedło. Aktualne a wědomostnje wobkrućene daty wo połoženju hornjoserbšćiny njepředleža.