Serbskim dźěćom w prózdninach rěčny rum skićić

Biskopicy (SN/MiR). Přeće, dyrdomdejski čas dožiwić, hodźi so při Němskopazličanskim haće spjelnić. Tam maja dźěći a młodostni w přirodźe móžnosć za aktiwity, kreatiwitu a dyrdomdej. Syć za dźěći a młodźinu w Biskopicach (KiJu) pyta nětko přewodźerjow, zo móhła tajki poskitk tež lětsa zwoprawdźić. „Mamy mustwo nazhonitych wukubłanych přewodnikow. Nětko pak chcemy je wo třoch dalšich, najradšo serbsce rěčacych za­jimcow rozšěrić“, rjekny nawoda KiJu ­Andreas Mikus. Do kruteho teama kubłarjow za campy při haće słušeja serbska sobudźěłaćerka a dalšej, swobodnje skutkowacej kubłarce. „Smy nazhonili, zo wobdźěleja so na campach stajnje tež serbske abo serbsce wuknjace dźěći a młodostni. Za nich chcemy šěrši serbski rěčny rum wutworić.“ Wosebje w cam­pomaj za přirodu, sport a kreatiwitu chcedźa serbske tradicije we Łužicy dale a bóle zapřijeć a do srjedźišća stajić. „Zo wobdźělnikow dwurěčny region a wosebje serbska rěč zajimujetej, smy loni wo­spjet zwěsćili“, Mikus powěda.