Jenož mało pedagogow ze serbskich šulow tež na druhich kubłanišćach

Budyšin (SN/MiR). Aktualna debata wo referendarach w Sakskej wěšći šulam zwonka wulkich centrow trajnje njedosahacy personal. Tuž budu sej šule swoje personalne resursy nadal z druhimi kubłanišćemi dźělić dyrbjeć. Tutu praksu mjenuje Krajny zarjad za šulu a kubłanje (LaSuB) delegowanje wučerjow. Kelko wučerjow z našich serbskich wyšich šulow Budyšin, Radwor, Ralbicy a Worklecy tuchwilu njewuwučuje jenož na swojej, ale tež na dalšej, a z tym na dwěmaj abo samo wjacorych šulach? W tutym šulskim lěće je jich pjeć wučerjow, kotřiž dźensa na swojej šuli wuwučuja a přichodny dźeń druhdźe. Z kotrych serbskich wyšich šulow pak su wučerjo dokal delegowani a w kotrym předmjeće wuwučuja? Serbska wyša šula Budyšin sćele kolegu resp. kolegowku (přisp. red.: w dalšim teksće wužiwamy musku formu) na wukubłanišćo wučerjow do Lubija. Serbska wyša šula „Dr. Marja Grólmusec“ Radwor sćele wučerja na Serbsku wyšu šulu do Budyšina, hdźež chemiju wuwučuje.