Na schadźowance za swójby 25lětne wobstaće RCW woswjećili

Budyšin (SN/MiR). Serbski ludowy ansambl běše wčera popołdnju srjedźišćo serbskeje rěče a kubłanja. Rěčny centrum WITAJ (RCW) bě tam na swoju 15. schadźowanku za swójby, wosebje pak na 25. Jubilej swojeho wobstaća přeprosył. Při zachodźe witaše nawodnica RCW dr. Beata Brězanowa wopytowarjow ze seklemi w serbskich barbach. Witko, maskotka projekta Witaj, wěnowaše so wosebje małym hosćom. Beata Brězanowa dźakowaše so swojim sobudźěłaćerjam a sobudźěłaćerkam zjawnje za jich spomóžne dźěło. Swoju narěč pak wěnowaše wona sekli. „Sekla je debjenka. W našej serbskej tradiciji ma wona wosebite městno – při narodnej drasće, při cylindru braški abo na wopuši křižerskeho konja. Sekla porjeńšuje a pokazuje, zo je nam něšto drohotne“, wona rjekny. Direktor Załožby za serbski lud Jan Budar dźakowaše so za skutkowanje RCW a skedźbni na to, kak wažne je, wótře a jasnje serbsce rěčo pokazać, zo smy kruty wobstatk towaršnosće. „Sym wjesoły, zo so starši dźensa dźeń a bóle wo to staraja, zo pěstujemy mjezsobnosć a zo dźěći zhromadnosć haja.