Wjelelětny prezident FC Energije Choćebuz Dieter Krein je sobotu, 2. meje, w starobje 84 lět zemrěł. Hač do kónca sym jeho stajnje dobreje nalady zhromadnje ze swojej mandźelskej při domjacych hrach w rumnosći čestnych hosći zetkawał.
Swój posledni zjawny wustup měješe wón w Choćebuskej měšćanskej hali, jako FCE z aktualnymi a prjedawšimi hrajerjemi, z podpěraćelemi a mnohimi čłonami kluba swoje 60. narodniny woswjeći. Na gali je wón wo swojich dožiwjenjach powědał, mjez druhim narěča na swoje humoristiske wašnje mnohe wosebite přeća něhdyšeho trenarja Eduarda Geyera.
