Pytaja koparskich sudnikow
Nowy wukubłanski kurs za sudnikow na teritoriju Zapadołužiskeho koparskeho zwjazka (WFV) započnje so 3. septembra w Němskich Pazlicach. Trěbne přizjewjenske formality dóstanjeće wot zamołwitych w sportowych zjednoćenstwach abo na internetnej stronje WFV.
Wotewru nowu sezonu
Zapadołužiski koparski zwjazk (WFV) chce pjatk, 19. awgusta, hrajnu dobu 2016/2017 oficialnje wotewrěć, a to wot 18.30 hodź. w Hušćanskej sportowej hali. Zastup budźe hižo wot 17.45 hodź. móžny. Nimo wuhódnoćenja minjeneje sezony předstaja zamołwići WFV wosebitosće noweje hrajneje doby.
Kónčny spurt za blackbird-run
Njedźelu, 4. septembra, wotměja w Hózku druhi přezpólny běh z mjenom Blackbird-run. Po dwanaće kilometrach natwarja tam do toho 15 wosebitych zadźěwkow. Přizjewjenja njejsu hižo móžne. Startowy pjenjez wučinja 20 eurow. Na dnju wubědźowanja smědźa so běharki a běharjo wot 11 hodź. registrować dać. Běh přez zadźěwki započnje so w 14 hodź. Na předwječoru swjeća w Hózku tak mjenowanu prerun-party. Dalše informacije pod www.facebook.com/blackbirdrunhoske abo http://hoske.net
SV Wesenitztal
– SJ Chrósćicy 2:2 (1:1)
Zestawa hosći: Matješk – Bětnar, Sentivan, Šafář, Gries, Młynk (69. Dehn), Zahrodnik, Runt, Šmit, Žur, Věchet
Hižo w 11 hodź. su koparsku hru we Wesenitztalu při přijomnych temperaturach a rjanym wjedrje zahwizdali. Tamniše prěnje mustwo hraje hižo někotre lěta w krajnej klasy, nic pak kaž nowačk z Chrósćic we wuchodnej stafli, ale w srjedźnej. Wone tež impulsiwnje započa, Chróšćenjo pak dołho njetrjebachu, zo bychu so na to nastajili. Po 20 mjeńšinach dósta Věchet wot defensiwy přećiwnika darik w formje špatneje přihrawki, kotruž k 1:0 přetwori. Hišće do přestawki Wesenitztal wuruna.
HZ Hórnikecy – SJ Njebjelčicy 2:1 (0:0)
Za hosći zasadźeni: Wićaz – Pawlik, Reinecke, Hübenthal (G. Čornak), Haška, Šołta, Janca, Kubaš, Hrjehor, Ričel, Šram.
Swój posledni test do spočatka hrajneje doby 2016/2017 wotměchu koparjo Njebjelčanskeje SJ we Wulkich Ždźarach. Trenarjej Panic a Krawčik žadaštaj sej koncentrowane a koordinowane wustupowanje swojich chowancow. W prěnim połčasu je škit wokoło Reinecki derje a měrnje hru natwarjał. Tak dóńdźe k móžnosćam přez Hrjehorja a Ričela, wšitke pak wostachu bjez wrotow. Přećiwnik so hrě Njebjelčanow podrjadowaše a zamó jenož někotre akcenty přez boki sadźeć. Hakle po přestawce wuwi so bojowniski charakter hry, cyłkowny porjadk hosći pak woteběraše. To je defensiwny hrajer přećiwnika z wušiknym solom přez centrum hnydom dwójce wužił a hru na kóncu tež rozsudźił. Tež hdyž so Hrjehorjej po róžku nachwilne wurunanje poradźi, Njebjelčenjo 1:2 přěhrachu. Wot přichodneho tydźenja wojuja potom zaso wo dypki. Jurij Haška
Rio de Janeiro. Tróšku kuriozny napohlad skićeše so atletam skakanskich wubědźowanjow z wěže při rańšim treningu. Woda skakanskeho basenka bě so wot zwučeneje módreje na zelenu barbu přeměniła. Přičina malheura běše najskerje defektna přewróćowanska připrawa (Umwälzanlage). Tež w synchronowym finalu muži z třimetrowskeje deski błyšćeše so woda přeco hišće we hłownej narodnej barbje Brazilskeje. To drje je faworitow z Chiny nimoměry iritěrowało. Dwójka Cao/Quin wobsadźi jeničce třeće městno. Němski njezbožownik Patrick Hausding a jeho nowy partner Stephan Feck dyrbještaj jenož z njeluboznym 4. městnom spokojić.
Wulke wolóženje z němskeho wida knježeše mjeztym w Carioca-arenje, hdźež wotměwaja so wubědźowanja juda. Tam wuwojowa sej Laura Vargas-Koch w klasy hač do 70 kg bronzu. Zludanaj pak běštaj hrudźny płuwar Marco Koch a slalomowy kanuta Hannes Aigner, kiž skomdźi podestne městno wo 0,03 sekundy. Swětowy mišter Koch bu na 200 metrow w hrudźnym stilu jeničce sedmy.
FC Energija Choćebuz – RB Lipsk II 0:0
Zestawa domjacych: Meyer – Karbstein, Knechtel, Stein, Baude, Putze (73. Ziegenbein), Kruse, Viteritti, Gehrmann, Weidlich, Mamba
Po remisu w prěnjej hrě w nowej wokolinje štwórteje ligi pola Lok Lipska su Choćebuscy koparjo doma přećiwo RB Lipskej II tež jenož remis hrali. Pjeć móžnosćow za nowopřichad Energije Mambu słušeše do kategorije wulkošansy. Žanu z nich pak njezamó wón přetworić. Prima wustupowanje młodych Choćebuskich akterow njebu tuž mytowane.
Wo dospołnje skepsanym starće po dwěmaj njerozsudnymaj wuslědkomaj wšak nochce trenar FC Energije Choćebuz Claus-Dieter Wollitz rěčeć. Wězo bě sej za 6 000 zahoritych přiwisnikow wjace přał. „We woběmaj partijomaj smy wšo za lěpši dypkowy wunošk dali. Přiwšěm pobrachowaštej w srjedźnym polu měr a hrajna kontrola. Tež při wrotowych akcijach njejsmy konsekwentni dosć byli. Ale što dyrbimy wot 20lětneho Mamby wočakować, kiž z brěmjenjom dypkowych hrow hišće tak prawje wobchadźeć njemóže? Smy sćerpni a z nim wobstajnje dale dźěłamy“, zhladuje Wollitz do přichoda. Georg Zielonkowski
Sokoł Ralbicy/Hórki
– ST Horni kraj Sprjewja 1:5 (1:0)
Zestawa domjacych: Ch. Gloxyn – von Köding (75. Matka), B. Bjeńš, Schultz, Lulak, Šewc, S. Bjeńš, Korjeńk, D. Gloxyn, Wałda, Domaška
Rio de Janeiro. Kotre zhromadnosće wobsteja mjez sankowanjom a jěchanjom? Wotmołwa na tróšku njewšědne prašenje je poprawom cyle jednora, wobhladaš-li sej wukony němskich atletow na olympiskich hrach. We woběmaj sportowymaj družinomaj móža fanojo němskeho sporta z wulkej wěstotu hnydom wjacore medalje zaplanować. Tale teza je so na štwórtym wubědźowanskim dnju w brazilskim Rio de Janeiru skónčnje wobkrućiła.