Před třomi tydźenjemi wozjewi naš wječornik na sportowej stronje w kolumnje „Widźał, słyšał, napisał“ přinošk, w kotrymž rozprawješe Jan Hrjehor wo njejasnosćach wokoło nowych trenarjow wokrjesneho wyšeho ligista SJ Chrósćicy. Clemens Šmit je so w nadawku sportoweje redakcije Serbskich Nowin z Mattijom Bětnarjom, čłonom mustwoweje rady prěnjeho mustwa Chróšćanskeje SJ, zetkał a slědowace zhonił.
Mattijo! Wjele je so minjene tydźenje a měsacy wo přichodźe Chróšćanskeho prěnjeho koparskeho mustwa powědało a spekulowało. Byrnjež poprawom hižo wšitko jasne było, wupada tuchwilu za tym, zo njebudźetaj Andreas Schulze a Steffen Hübner wot přichodneje sezony hižo trenarjej w Chrósćicach.
Pod režiju Serbskeho Sokoła, třěšneho zwjazka serbskich sportowych jednotkow, su so kónc tydźenja tři serbske dorostowe koparske wubranki na třoch turněrach wobdźělili. Dohromady je w Kubšicach, Bukecach a Liegauwje-Augustusbadźe 35 koparjow serbske barby zastupowało, telko kaž hišće ženje do toho w serbskich sportowych stawiznach.
Sobotu wobdźěli so w Liegauwje-Augustusbadźe při tropiskich temperaturach Serbska koparska wubranka młodźiny E (SKW-E), a to pod nawodom trenarja Franka Šnajdra z ST 1922 Radworja. Wurisanje měješe wosebity raz, dokelž bě wone na dobro dźěći, kotrež su na raka schorjeli. SKW-E wšitke hry doby. Tež kónčnu partiju přećiwo mustwu Sportoweho towarstwa Porchow serbscy bulkoparjo jasnje dominowachu a přesadźichu so po wrotach Konstantina Hrjehorja a Dawida Žura (wobaj Sokoł Ralbicy /Hórki) z 2:0.
Awtor dźensa
Tomaš Faska
Runje słyšu w radiju zwjeselacu powěsć: Němska narodna koparka Celia Sašić je sej na swětowych mišterstwach wubědźiła złoty bul jako kralowna třělčow. Poprawom wšak bě runje telko wrotow, mjenujcy šěsć, a k tomu jednu wuspěšnu přihrawku docpěła, kaž Američanka Carli Lloyd. Ta wšak sta so wčera, abo lěpje minjenu nóc, ze swojim mustwom ze swětowej mišterku. A dalša němska hrajerka smě so na kóncu mišterstwow tola hišće nad drohotnym metalom wjeselić. Mustwowa kolegina Celije Sašić Anja Mittag dósta bronzowy bul za 3. městno w tabulce najwuspěšnišich třělčow. Wona bě pjeć wrotow docpěła.
Kónčnej koparskej tabulce
Krajna liga, žony
1. SV Johannstadt 90 18 80 : 16 50
2. ST Lipsk 18 68 : 16 45
3. Biskopičanske KT 18 43 : 32 33
4. TSV Spitzkunnersdorf 17 43 : 42 24
5. Lokomotiwa Drježdźany 18 42 : 42 24
6. 1. FFC Wacker Lipsk 17 29 : 24 23
7. Eintracht Thum-Herold 18 26 : 49 18
8. Eintracht Lipsk-juh II 18 19 : 54 18
9. Fortuna Drježdźany II 18 22 : 57 12
10. Kamjeničanski FC 18 14 : 54 6
wokrjesna liga, žony
1. Zeleno-běli Bukecy 16 88 : 28 43
2. HZ Liegau/Radeberg 16 65 : 34 35
3. ST Nadrózna Hrabowka 16 67 : 45 35
4. SSV Langburkersdorf 16 62 : 46 27
5. Biskopičanske KT II 16 44 : 36 25
6. SV Lomnitz 16 18 : 57 12
7. SJ Chrósćicy 16 41 : 54 11
8. Zeleno-běli Šěrachow 16 36 : 76 11
9. FSV Bretnig-Hauswalde 16 25 : 70 9
Mustwo koparkow so rozpušći
Wjednistwo Chróšćanskeje SJ swoje žónske koparske mustwo hižo za sezonu 2015/2016 njepřizjewi, dokelž někotre serbske hrajerki přestanu. Za dypkowe hry tuž dosć koparkow njezbywa. SN
Worklečanski captainscup
Volleyballisća Viktorije Worklecy přeprošeja na swój 2. captainscup, kotryž budźe sobotu, 18. julija. Hrać budu zaso w pěsku a na trawniku. Za turněr w pěsku smědźa so muske dwójki přizjewić, za turněr na trawniku měšane cyłki ze 4 do 6 wosobami. Beachturněr započnje so hižo w 10 hodź., turněr na trawniku w 14 hodź.. Přizjewić móžeće so pod . Za beachturněr ma so prošu tole wobkedźbować: mjeno dwójki + mjeno kapitana + telefonowe čisło/mjeno hrajerja 1 + zjednoćenstwo + hrajna klasa/mjeno hrajerja 2 + zjednoćenstwo + hrajna klasa. Za turněr na trawniku dosahaja mjeno mustwa, mjeno kapitana a jeho telefonowe čisło.
Dorostowe wubranki hraja
ST Marijina hwězda bě minjeny kónc tydźenja na 8. integratiwny sportowy swjedźeń do Pančic-Kukow přeprosyło.
Młodźi koparjo pjatk wubědźowanja zahajichu. Młodźina F Marijineje hwězdy nastupi přećiwo HZ Habrachćicam (Ebersbach). Hra skónči so 3:3. Tež třělenje jědnatkow wuńdźe njerozsudnje. Hakle w kałanju zawěsćichu sej hosćo dobyće. Dorostej přizamknychu so stari knježa. Tež tu wopokazachu so domjacy jako dobri hosćićeljo a popřachu přećiwnikej triumf. Drohotka Ramnow porazy ST Marijinu hwězdu ze 6:0.
Pod wěcywustojnym nawodom 17 pomocnikow Budyskeho powołanskošulskeho centruma wojowachu njedźelu dopołdnja pěstowarske dźěći z Pančic-Kukowa kaž tež zbrašeni sportowcy z Kamjenca, Smječkec, Pančic a Lěskeje wo kóždy centimeter a kóždu sekundu. To bě wšeje česće hódne, z kajkej zahoritosću so mali a wulcy sportowcy prócowachu. Poskitk lochkoatletiskich wubědźowanjow wudospołnichu wšelake hry a jěchanje.
22. koparski duel so z dobyćom šulerjow skónčił
Dźeń po volleyballowej hrě mjez wučerjemi a maturantami Budyskeho Serbskeho gymnazija slědowaše koparski dwubój. Wonkowne wuměnjenja běchu idealne, a tak mnozy šulerjo tónle sportowy wjeršk sćěhowachu. Woni widźachu zajimawu a wotměnjawu hru, kotruž su dwanatkarjo ze 4:3 snadnje dobyli.
Połne elana podachu so koparki 6. do 8. lětnika Serbskeho gymnazija Budyšin (SGB) do Freitala. Hižo dźesaty raz bě so holče mustwo SGB za krajne kónčne koło kwalifikowało. Před lětomaj bě ze slěbornej medalju swój dotal najwjetši wuspěch docpěło. Lětsa chcyše nětko do małeho finala.
Serbski gymnazij Budyšin – Immanuela Kantowy gymnazij Lipsk 0:4
Prěni sportowy kontrahent SGB startowaše optimalnje a nawjedowaše hižo po 90 sekundach z 1:0 přez rjanu třělwu z praweje strony. W dalšim času holcy SGB derje sobu hrajachu, njedocpěchu pak žane wrota. Te padnychu krótko do połčasa za Lipšćanske gymnaziastki po rjanym konteru. Jako bě sudnik partiju znowa zahwizdał, zwyši nowy sakski mišter na 3:0, pjeć mjeńšin pozdźišo samo na kónčne 4:0. Rezultat wothóčkować a so na rozsudnu partiju wo docpěće małeho finala koncentrować rěkaše nětko hesło šulerkow SGB.
Weißeritzski gymnazij Freital – Serbski gymnazij Budyšin 6:0
Malyn
Wićaz
Foće: SN/
M. Bulank
Budyšan dobywa přećiwo konkurecy z Oberwiesenthala a Altenberga. Tež takle by hłowne nadpismo přinoška być móhło. Malyn Wićaz, šuler 5. lětnika Budyskeho Serbskeho gymnazija, je njedźelu w Altenbergu třeći běh tak mjenowaneje třičaroweje turneje w lětnim sankowanju dobył a so w cyłkownym kónčnym hódnoćenju w starobnej skupinje přećiwo šěsć dalšim atletam z Oberwiesenthala, Altenberga a Zwickauwa přesadźił.
Za Malyna, kiž njebydli w sankowarskim zepěranišću Sakskeje, je to wuběrny wukon. W Budyšinje maja mjenujcy jenož krótšu lětnju čaru, kotraž njehodźi so z lodom pokryć. Nimo Malyna wobdźělichu so na horjeka mjenowanej turneji tež dalše holcy a dalši hólcy z Budyšina a docpěchu sćěhowace wuslědki: Felix Tokarski 3. městno w cyłkownym hódnoćenju w starobnej skupinje (sk) młodźina B, Yaven Wićaz 6. městno w sk młodźina B, Vivien Jäckelec 5. městno w sk młodźina C, Janoš Klingauf 3. městno w sk młodźina C, Elisabeth Ullrichec 2. městno w sk młodźina C a Leon Kossykh 9. městno w sk młodźina D. Jurij Bjeńš