Worklecy (TB/SN). Swójby a šulerjo Worklečanskeje wyšeje šule witachu póndźelu Bretoniskich šulerjow, kotřiž su na wuměnu do Łužicy přijěli w tamnišej sportowni. Ze zhromadnym wolejbulom, rejemi a słódnej jědźu so wječor spěšnje miny.
Wčera wopytachu hosćo zhromadnje ze šulerjemi wšelake dźěłarnički we Worklečanskim hrodźe. Pod wěcywustojnym nawodom serbskeju grafikarjow, Hanušec mandźelskimaj, kreěrowachu wosebity serbsko-bretoniski logo a čisćachu jón na płatowe wačoki. Někotři podachu so k serbskej šwalči Petrje Kupcynej a dalši do dźěłarnje Mikławša Dyrlicha, rězbarja křižow w Nowej Wsy. We Worklečanskej šulskej kuchni plećechu a napječechu šulerjo pozdźišo serbsku kmótřisku całtu a zhonichu připódla wjace wo tutym nałožku na zelenym štwórtku. Wězo sej całtu na kóncu tež zesłodźeć dachu. Wutora wuklinča z rejowanskej dźěłarničku. Šulerjo sej tu nic jeno tón abo tamnu serbsku ale tež bretonisku ludowu reju nazwučowachu. Dźensa wopytaja wšitcy zhromadnje Berlin a pjatk su w Ludowym nakładnistwje Domowina w Budyšinje z hosćom.
Rjadowanja w Serbach su Sewjernym Frizam w Schleswigsko-Holsteinskej znowa dobry přikład. Tam změja nětko tudyšemu Witaj-centrumej podobne zarjadnišćo za wožiwjenje frizišćiny.
Drježdźany (dpa/SN). Sakska nima w přichodnych lětach dale dosć wučerjow. Prawdźepodobnje so hakle kónc lětdźesatka połoženje změruje. K tomu je sakske kultusowe ministerstwo prognozu z ličbami šulerjow hač do lěta 2029/30 wozjewiła, štož je zakład wobličenja. W mjezyčasu pak su naprawy trěbne, z kotrymiž chce sakski kubłanski minister Christian Piwarz (CDU) situaciju złahodnić. Tak je předwidźane, zo nima hižo telko wučerjow podźělnje dźěłać. Wjace hač třećina wučerjow tuchwilu dźělnje na kubłanišćach wuwučuje. W přichodźe chce ministerstwo dźělnemu časej jenož hišće přizwolić, jelizo su za to konkretnych prawniskich přičinow kaž na přikład hladanski pad w swójbje.
Zo móhli wučbu na šulach zaručić, chce Piwarz, zo wučerjo hač do 55 lět wjace wob tydźeń wuwučuja, štož ma so financielnje mytować. Čas pak móhli potrjecheni wučerjo na konće zběrać a nadhodźiny pozdźišo wotdundać. Dale prócuje so Piwarz wo to, zo so wobzamknjenja wučerjow z druhich zwjazkowych krajow w Sakskej spěšnišo připóznaja.
We wokrjesu Sprjewja-Nysa a w měsće Choćebuzu su přewšo spěšnje na to reagowali, zo zahaji kraj Braniborska hižo wot přichodneho šulskeho lěta 2023/ 2024 na Braniborskej techniskej uniwersiće (BTU), a to w Złym Komorowje, wukubłanje wučerjow za zakładne šule. Temu je nětko tež wokrjesny wuběrk za serbske naležnosće wobjednał.
Choćebuz/Baršć (HA/SN). Hnydom po wozjewjenju teje informacije běštaj Harald Altekrüger (CDU), krajny rada wokrjesa Sprjewja-Nysa (SPN), a Choćebuski wyši měšćanosta Tobias Schick (SPD) list braniborskemu knježerstwu pisałoj (SN informowachu). Staj sej pominałoj, zo ma so do studija přiwzać tež wukubłanje serbskich pedagogow a wuwučowacych za pólsku rěč. W tym widźitaj dobry a spěšny puć, wurunać njedostatk pobrachowacych pedagogow za wučbu w delnjoserbskej rěči.
Na mnohich kubłanišćach maja najwšelakoriše poskitki, w kotrychž so temam zwonka wšědneho wučbneho plana wěnuja. Druhdy wobdźělnicy za to tež swoje kubłanišćo wopušća.
Budyšin/Ralbicy (JR/SN). Sydom šulerkow a šulerjow Serbskeje wyšeje šule Ralbicy je minjenu póndźelu redakciju MDR Radija Satkule wopytało. Wuknjacy z Ralbic su wobdźělnicy cyłodnjowskeho poskitka „Podcast a nowe medije“, w kotrymž mjez druhim rozhłosowe přinoški produkuja. Wot spočatka 2022 tónle poskitk na Serbskej wyšej šuli Ralbicy maja. Jón nawjeduje tamniši wučer Jan Rjeda.
Na hłownej zhromadźiznje towarstwa „Staršiska iniciatiwa Radwor“ su woni wčera rozmach nowotarskich serbskich poskitkow za młodu generaciju rozjimali, z kotrymž chcedźa pokročować.
Radwor (SN/mb). Wjace hač 120 dźěći a młodostnych – kóždy štwórty bydli zwonka Radworja – wužiwaše wot lońšeho šansu, w kursach wo robotice, 3 D-ćišću a upcyling eksperimentować. Zapřijeće steji za tworjenje nowych tworow ze starych, kotrež hižo njetrjebaš. To wšo je staršiska iniciatiwa ze swojim serbskim projektom „ExperiMINT“ zmóžniła.
Z lětnjeho, nazymskeho a zymskeho kursa, kotrež su w nowych rumnosćach towarstwa w Radworju zady „Meje“ a pola partnera na dwórnišću wotměwali – wurostuja nazhonjenja za přichodny campus. Wón ma w běhu štyrjoch lět nastać. Financować móža nowu serbsku instituciju zwonka Budyšina na zakładźe wuspěšneho požadanja wo srědki změny strukturow za naležnosće Serbow, kotrež Załožba za serbski lud rozdźěluje.