Rozestajenja wo wopłóčkach, kajkež mějachu je něhdy w Delanach a před lětami we Wotrowje, su nětko tež Wulke Ždźary a Koblicy dosćahnyli. Wobydlerjo du tam na barikady.

Łaz (AK/SN). Prócowanja wo dołhodobne a nošne wotwodźowanje wopłóčkow we Wulkich Ždźarach a Koblicach dale traja. Wjace hač 50 potrjechenych je sej na zašłym posedźenju Łazowskeje gmejnskeje rady žadało, zo měła so wola wobydlerjow respektować. Z wosom přihłosowanjemi, jědnaće přećiwjenjemi a wzdatymaj hłosomaj gmejnscy radźićeljo globalne wobličenje, kalkulaciju popłatkow kaž tež wopłóčkowe wustawki za Koblicy a Wulke Ždźary wotpokazachu. Gmejna bě centralne wotwodźowanje z ćišćowej připrawu namjetowała. Wobydlerjo žadaja sej porno tomu system z přirodnym spadom. „Technisce je to bjeze wšeho móžno“, praji Horst Alte z Kulowskeho inženjerskeho běrowa. Po jeho měnjenju pak bychu přidatne klumpy trěbne byli. Popłatki bychu dimensije docpěli, kotrež njebychu prawnisce zastupujomne byli.