Wulke Ždźary (AK/SN). Hrózbne podawki njedźele, 30. oktobra, ma Bianca Kuckei z Wulkich Ždźarow hišće cyle jasnje před sobu. „Krótko po 15 hodź. je so to stało. W dźěćacej stwě běchu hižo meter wysoke płomjenja. Mój wulki syn wołaše, zo je z přikrywom wjace podusyć njemóže a zo dyrbju wohnjowu woboru wołać“, powěda 55lětna z ćeńkim hłosom. Wona a synaj móžachu so runje tak wuchować. Minuty pozdźišo so cyły dom paleše. Sydom wohnjowych woborow z Łazowskeje gmejny přijědźe hašeć. Zwostali su wot bydlenskeho domu jenož wonkowne murje.
Mjeztym dźesać lět Bianka Kuckei we Wulkich Ždźarach bydli. Ze swójbu je dom krok po kroku ponowiła. Na kóncu wobnowichu kupjel. Minjene měsacy pak wosud ze swójbu derje njeměnješe. Před lětom zemrě nan Bianki Kuckei, lětsa w awgusće jeje mać. 29. oktobra pochowa wona swojeho mandźelskeho. Nazajtra so jeje dom wotpali. „Přičina drje bě skóncowany kabl, kaž smy pozdźišo zhonili.“ Jenož jónu smědźeše hišće do domu, zo by wuchowała, štož woheń zničił njebě. Bydlić w domje njemóže.
