Baršć (HA/SN). Spočatk lěta 2021 je so wokrjes Sprjewa-Nysa do projekta dał, kotryž je po wšej Łužicy wulki zajim a přihłosowanje zbudźił. W tamnišim wokrjesnym sejmiku běchu wšitke frakcije wobzamknyli, wupłaćić wosebity stipendij tej abo tomu, kiž studuje serbske wučerstwo na Lipšćanskim Instituće za sorabistiku a je zwólniwa/y, po studiju znajmjeńša pjeć lět w jednej ze šulow we wo­krjesu Sprjewja-Nysa delnjoserbšćinu wuwučować. To ma k tomu přinošować, zdobywać młodych ludźi. Wosebje pak absolwentow Delnjoserbskeho gymnazija, kotřiž su so za pozdźiše dźěło jako delnjoserbski pedagoga a z tym za skrućenje delnjoserbskeho wučerstwa a šulstwa rozsudźili.