Jutrowne poselstwo nadal „znamjo nadźije“ – Wjeršk cyrkwinskeho lěta we Łužicy ze syłu turistow

Budyšin/Choćebuz/Vatikan (Mak/mih/SN/at/bn). Jutrowne swjate dny běchu tež lětsa křesćanam cyłeje Łužicy wulki nabožny wjeršk. Zdobom přiwabi tójšto swjedźenskich zarjadowanjow syły turistow do regiona. Jako najwjetše magnety w tym zwisku wopokazachu so wospjet křižerske procesiony w Hornjej Łužicy (čitajće tež na 4. stronje). Tola tež w srjedźnej a Delnjej Łužicy kaž tež w ewangelskich kónčinach su najwažniši podawk cyrkwinskeho lěta dostojnje woswjećili. Tak je po třilětnej přestawce jenički delnjołužiski jutrowny procesion znowa poselstwo zrowastanjenja Jezusa sposrědkował (hlej foto deleka). Jutrowne spěwanja, mjez druhim wulki pjatk z chórom Łužyca w Dešnje a jutrowničku na přikład w Gołbinje a Žylowje kaž tež jutrowny wohenje w Bórkowach a Choćebuzu a serbska Boža mša w Picnju běchu derje wopytane. Před cyrkwju we Wjerbnje započa so jutrowna nóc hižo w rańšich zerjach.