Julian Nyča za wobmjezowanje chodojtypalenja – strach za strowotu

Budyšin (SN/mb). Wokoło połnocy w lětušej wałpornej nocy su w Budyšinje 313 mikrogramow drobneho próška na kubikny meter powětra měrili, „štož je samo na sebi fatalna ličba a hodźi so z woprawdźe špatnym zymskim dnjom w Sarajewje přirunować“, městom, „kiž je znajmjeńša w zymje stajnje mjez europskimi městami z najšpatnišim powětrom.“ Julian Nyča njeje jenož znaty serbski rěčny aktiwist a wikipedist, kotryž je w našim kulturnym a politiskim žiwjenju angažowany. Wón běše hižo jara husto, rady tež jako kolesowar, po wuchodnej Europje po puću a móže tohodla derje přirunować – na přikład tule smog w Budyšinje a Sarajewje.