Budyšin (CS/SN). „Politika jako powołanje“ rěkaše tema, kotrejž je so Elisabeth Niejahr na pjatkownišej Budyskej narěči we Mariji-Marćinej cyrkwi wěnowała. Porno předchadźacym zarjadowanjam Budyskich narěčow, z přerěznje 200 wopytowarjemi, běše jich tónraz jenož ně­hdźe 50. rěčnica přednošowaše wo přiběracej njedowěrje ludu do politiskich reprezentantow. Zwisuje to mjez druhim z tym, zo je w zwjazkowym sejmje kaž tež w krajnych parlamentach wulki dźěl wobydlerskich skupin jasnje podreprezentowany. „Parlamenty potajkim našu towaršnosć adekwatnje njewotbłyšćuja“, praji Niejahr a doda: „Podźěl žonow w komunalnej politice je nadal snadny a samo dźeń a bóle woteběra.“ Přičinu za to widźi wona w fakće, zo so hustohdy ći na puć do politiki podadźa, kotřiž tak a tak hižo we wusko z politiku splećenych towaršnostnych wobłukach dźěłaja – „potajkim zwjetša mužojo.“