Brüssel/Moskwa (dpa/SN/K). Spirala hroženja z brónjemi so bohužel hižo zaso chětro wjerći. Najprjedy zakitowanske ministerstwo USA připowědźi, zo ma wotmysł, do baltiskich a někotrych wuchodoeuropskich krajow kaž do Pólskeje pósłać ćežke brónje, na čož z Moskwy rěka, zo ma Ruska 40 raketow noweho typa, po słowach prezidenta Putina imunych za kóždyžkuli raketowy wotwobaranski system.
To zaso zapad rozčerći. Ameriski wonkowny minister John Kerry warnuje před spadom do noweje zymneje wójny. „Tajku kročel wróćo nichtó nochce“, wón rjekny. Generalny sekretar NATO Jens Stoltenberg pak Moskwu raznje přima, dokelž so nuklearnje wobrónja. „Nuklearny wrjeskot Ruskeje je njewoprawnjeny, destabilizowacy a strašny“, rjekny Stoltenberg po wopyće prezidenta komisije EU Jeana-Claudea Junckera. Nastupajo ruske plany wón dale praji: „My wotmołwjamy. Tohodla zwyša NATO swoju prezencu na wuchodnym dźělu zwjazkarskeho teritorija.“
Padušne wróny su w japanskim měsće Matsue zasadźenje policije zawinili. Tamniši wobydlerjo běchu so na policajskim rewěrje stajnje zaso hóršili, dokelž něchtó woknotrějaki parkowacych awtow kóncuje, kaž nowiny rozprawjeja. Na to zasadźi policija na wšě 50 zastojnikow, zo bychu mysteriozne njeskutki wujasnili. Z pomocu nastajenych kamerow woni zwěsćichu, zo wróny gumi trějakow rady za twar swojich hnězdow wužiwaja.
Je tortu debić rjemjesło abo wuměłstwo? Wo tym jednachu dźensa na Lübeckskim hamtskim sudnistwje. Město bě tortowej designerce chłostanku napołožiło, dokelž wona rjemjesło konditora wukonja, byrnjež na lisćinje rjemjeslnikow zapisana njebyła. Žona pak ma so za wuměłču a chłostanku wotpokaza. Nětko dyrbi sudnistwo rozsudźić.
Rogeński hród restawrowany
Choćebuz (dpa/SN/ch). Wjacore rumnosće Rogeńskeho hrodu w Choćebuzu su restawrowane. Su to přijimowanska stwa, Módry salon a spanski kabinet, kaž piše załožba Wjercha Pückleroweho muzeja Rogeński park a hród. Wot dźensnišeje srjedy su rumnosće tež wopytowarjam zaso přistupne. Na Rogeńskim hrodźe je Hermann von Pückler (1785–1871) w starobje bydlił. Ekscentriski wuhotowar zahrodow a wužiwar žiwjenja bě kołowokoło hrodu něhdźe 600 hektarow wulki park připrawić dał. Tež w Mužakowje koncipowaše wón hoberski krajinowy park. Wot lěta 2004 słuša tón k swětowemu kulturnemu namrěwstwu UNESCO. W Rogeńskim parku je Pückler tež pochowany.
Žadyn dorost baćonow
Podstupim/Budyšin (dpa/SN). Wobydlerski zwjazk za podpěru ćěkancow „Budyšin wostanje pisany“ počesćichu w Podstupimje z mytom „Stawaj“ za tolerancu a ciwilnu kuražu Flickoweje załožby. Předsyda jeje rady Friedrich Christian Flick skedźbni wčera w deklaraciji na přiběracu ličbu ćěkancow a na z tym zwisowacy rozrost prawicarskoekstremnych a antisemitiskich njeskutkow. Wo myto je so tónkróć 56 objektow z wuchodneje Němskeje a Berlina požadało. Z 10 000 eurami dotěrowane wuznamjenjenje bu lěta 2012 prěni króć spožčene.
Za jeju zasadźenje počesćichu tež dweju bratrow-předewzaćelow Rainera a Haralda Opolku. Hižo wjele lět so wobaj ze wšej konsekwencu prawicarskoekstremnym akcijam do puća stajataj. Tak staj funkcionarej strony NPD znjemóžniłoj so na swójbnym swjedźenju wobdźělić, kotryž běštaj organizowałoj. Zamołwići připowědźeja, zo chcedźa projekty přećiwo rasizmej přichodnje skutkownišo podpěrać a za nje dalše pjenježne srědki přewostajić.
Brüssel/Berlin/Athen (dpa/SN/K). Dyrbjeli-li wšitke jednanske prócowanja wo přewinjenje grjekskeje financneje krizy a tak wo wuchowanje kraja před statnym bankrotom zwrěšćić, chcedźa eurokraje na to z nuzowym planom reagować, kotryž su wone mjeztym zdźěłali. Tole rozprawja Süddeutsche Zeitung. Po spomnjenym planje je předwidźane, kónc tydźenja přihotować kontrolowanje grjeksko-europskich financnych transakcijow, zo by so přezměrnemu nawalej na banki zadźěwało. Wo pjenježnych wuskosćach Grjekskeje je dźensa tež rěč na zetkanju luxemburgskeho ministerskeho prezidenta Xaviera Bettela z němskej kanclerku Angelu Merkel (CDU) w Berlinje.