Bórkowy (SN/MG). Swjatki, to rěka za wuměłcow Serbskeho ludoweho ansambla (SLA), zo hraja w Błótach powěsćowe nocy. Lětsa bě tomu po sydom lětach k prěnjemu razej tak, zo njezwisowaše kruch hižo z lońšej produkciju, ale bě w běhu wječora zakónčena. „Jan a gluka – die sagenhafte Suche nach dem Glück“, rěkaše inscenacija, kotruž bě Matthias Körner za SLA napisał. Wosnje poda so titulna figura Jan, kotremuž je znaty Budyski dźiwadźelnik Olaf Hais wobličo dał, na puć, zo by swoje zbožo namakał. Při tym zetkawa wjacore powěsćowe postawy, wšojedne hač ze serbskeho, słowjanskeho abo grjekskeho mytologiskeho swěta. Wosebje „stara“, kotruž hraješe Petra Marija Bulankec-Wenclowa, a plon (Julia Peickert) wojujetej při tym wo přichilnosć a dušu Jana. Ansamblowcam poradźi so do někak 90 mjeńšinow trajaceho krucha mnohe aspekty zaplesć. Tole pak druhdy rozumliwosći a stringency krucha njepolěkowaše. Błudnički, wódny muž, připołdnica, hadźacy kral, ale tež kumštna inteligenca, namolowachu na jewišću ...

Koparki Serbskeho mustwa za lětušu Europeadu su so sobotu do stadiona DJK Sokoła Ralbicy/Hórki na testowu hru přećiwo koparkam z Hlinowca podali. Po hrě předstajichu zamołwići nominowany kader mustwa.Ralbicy (jh/SN). „Za nas je a budźe to wulki dyrdomdej!“, rjekny šeftrenar Serbskeho mustwa holcow-koparkow Pětr Bejmak na nowinarskej konferency, kotraž so přihotowanskej hrě na Europeadu 2024 přizamkny. Na hru přećiwo Hlinowskemu sportowemu klubej, zastupjerjej krajneje klasy wuchod (rozprawa hlej strona 3) běše wjace hač 120 přihladowarjow přichwatało. Holcy a žony z Hlinowca maja tam po štyrnaće wot wosomnaće hrow z třomi dobyćemi a třomi njerozsudnymi wuslědkami dosć dobru bilancu. Z tym je wone runje prawe měritko za serbski cyłk, kotryž dyrbi so połdra měsaca do europskich koparskich mišterstwow awtochtonych narodnych mjeńšin Europy namakać a zahrać.

Drježdźany (dpa/SN). Po zadyrjenju błyska na brjoze Łobja w Drježdźanach so dale wo štyrjoch smjerćstrašnje zranjenych starosća. Nowe dopóznaća wo jich strowotnym stawje dźensa dopołdnja ­hišće njepředležachu. Wčera wječor bě błysk dźesać ludźi zdźěla ćežko zranił. Štyrjo běchu w smjertnym straše. Dweju muži w starobje 27 a 30 lět dyrbjachu ­pomocnicy wožiwić. Wjedrarnja bě před njejapkimi njewjedrami warnowała.Přepytuja smjerć prezidentaTeheran (dpa/SN). Po smjerći iranskeho prezidenta Ebrahima Raisija je šef wójska kraja dokładne přepytowanje njezboža helikoptera připowědźił. K tomu je ge­neral Mohammed Bagheri w zakitowanskim ministerstwje skupinu fachowcow zestajał. Při njezbožu běchu předwčerawšim, njedźelu, Raisi, wonkowny minister Hossein Amir-Abdollahian a sydom dalšich wosobow žiwjenje přisadźili. Prawdźepodobnje bě helikopter we wuskej kurjawje orientaciju zhubił a do hory zrazył.Předstaji wuwiće njeskutkow ...

Wěriwi nóžkujo, kolesujo abo motorizowani do Róžanta putnikowaliRóžant (SN/MiR). Róžeńčanska putniska łuka podobnješe so wčera pisanemu přestrjencej. Wjele stow wěriwych bě sej na swjatočnu swjatkownu Božu mšu njedaloko putniskeje cyrkwje do Róžanta dóšło, dalši sej z kolesom a mnozy z awtom dojědźechu. Z wosebitej česćownosću pak witachu wěriwi mjez sobu tych, kotřiž běchu w dźesać procesionach ze swojich wosadow na hnadowne městno dochadźeli. Na čole kročachu nošerjo chorhojow a swjateho křiža, za nimi družki a młodźency, kotřiž wotměnjejo postawy swjateje Marije po dróze, pólnych pućikach a lěsnych šćežkach hač před wołtarnišćo njesechu a tam na přihotowane blida stajichu.

Łužica ma so stać wodźacy pilotowy region Europy w transformacijiČorna Pumpa (AK/SN). Zelenu energiju nastupajo ma so Łužica z wodźacym regionom a prěnim tak mjenowanym „Zero Net Valley“, zelena dolina, pilotowym projektom w Europje stać. Zakład toho je zakoń wo industriji, kotraž mało abo žane škódne emisije njewustorkuje. Tutón je Europska unija před měsacom wobzamknyła. To je komisar EU Thierry Breton minjeny pjatk na konferency „Transformacija hospodarstwa“ w centrumje DOK3 Čornopumpskeho industrijnišća podšmórnył. Wjace hač 150 zastupjerjow z přede- wzaćow, zarjadow, zarjadnišćow, IHK Choćebuz a Drježdźany kaž tež wjesnjanosća, měšćanosća a krajni radźa je so wobdźěliło. Komunale zwjazkarstwo Łužiski kruh a europski zapósłanc dr. Christian Ehler (CDU) běštaj na schadźowanje přeprosyłoj. „Angažement politiki we Łužicy mje jara jima. Chcu tutu rozsudźenosć podpěrać“, rjekny Thiery Breton. Wot decembra 2019 je wón jako komisar EU zamołwity za nutřkowne wiki a posłužby. ...

Dźakujemy so Wam za wjele lět zhromadneho dźěła, kotrež je naše parlamentariske dźěło jara wobohaćiło. Připóznaće wuprajamy Wam dźensa předewšěm za wšo prócowanje wo škit ­serbskeho sydlenskeho ruma. Hromadźe z Jurjom Kochom sće w prěnim wustawowym wuběrku wo artikl wojował, ­kotryž prawa serbskeho ludu zaruča a wosebje zdźědźeny sydlenski rum a politiske wobdźělenje Serbow zaruča. Bohužel njeje tute postajenje wustawy wotbagrowanju Rogowa zadźěwało. Wot toho pak so njejsće wottrašić dał, ale sće dale wojował z tym, zo sće so na puć podał a mnohe gmejny přeswědčił, zo bychu so k serbskemu ludej a k pěstowanju ­Wašeje maćeršćiny a kultury wuznawali.Rady dopominaja so bywši čłonojo našeje frakcije na zhromadne dźěło při wudźěłanju prěnjeho Serbskeho zakonja. Zo je so poradźiło, tutón zakoń hišće ­na kóncu prěnjeje wólbneje periody schwalić, mamy so předewšěm Wašej njepowalnosći dźakować. Třo zapósłancy frakcije PDS-Lěwa lisćina resp. frakcije CDU su hižo na spočatku 1990ych lět dopokaza ...