Zasłužene dobyće před domjacej kulisu

Dienstag, 17. September 2019
Artikel bewerten
(0 Stimmen)

ST Marijina hwězda – TSV Wachau 5:1 (2:0) 

Zestawa domjacych: Hejduška – R. Cyž, Zelnak (68. Jurš), Bělk, Ch. Cyž, Pjetaš, Kurink (57. Rab), Hawš, Schmidt, Šołta, Pakoßnick (64. Eldor)

Na pjatym hrajnym dnju wokrjesneje wyšeje ligi pohosćichu koparjo Marijineje hwězdy sobupostupnika z Wachauwa a dobychu partiju jasnje a zasłužbnje z 5:1. Domjacy dominowachu cyłu hru, prěnju móžnosć pak mějachu hižo po 30 sekundach hosćo z hłójčkowanym bulom. Po dobrej stafeće posłuži Oskar Hawš Dawida Šołtu, kiž sam před wrotarjom přechwatnje wotzamkny (6.). Lěpje sčini to w 14. min. nadběhowar Jakob Pakoßnick. Šołta wothra dokładny pas do běha kapitana. Tón widźeše, zo přećiwniski wrotar pře daloko před wrotami ste­ješe a přezběhny jeho z někak 20 metrow k nawjedowanju 1:0. Dalše stoprocentne šansy pak klóšterscy koparjo wuwostajichu. W 21. min. měješe Jakobus Kurink wulku składnosć na 2:0 zwyšić. Třělwu po přihrawce Christopha Cyža pak znowa Wachauwski wrotar znješkódni. Jenož 120 sekundow pozdźišo nasta dalši strašny nadběh Pančičanow, jako Šołta samlutki do směra wrotarja běžeše. Dwubój pak rozsudźi hósć za sebje. W tutym času by dyrbjało hižo 3:0 stać. Na tamnym boku mějachu hosćo po róžku móžnosć k wurunanju. Hawš zachowa snadny předskok jako kulowatu kožu krótko před wrotowej liniju zadźerža (36.). Tři mjeńšiny do połčasa móžachu domjacy fanojo potom tola raz wyskać. Po róžku Felixa Pjetaša zhłójčkowa Paul Schmidt ze zdalenosće šěsć metrow bul mócnje do saka. Jara wulke zbožo mějachu domjacy krótko do wothwizdanja prěnjeho połčasa, jako hrajer z Wachauwa po róžku z hłójčkowanym bulom jenož alu­minij trjechi.

Druhi połčas zahaji so hnydom z wulkej móžnosću za klóšterski cyłk. Po dołhim wotkopje Fabiana Hejduški steješe Šołta cyle sam před wrotarjom, nažel pak njemóžeše přetworić (48.). Runje zaměnjeny Jeffrey Rab spřihotowa ze swojim pasom na Pakoßnicka 3:0 we 58. min. Pakoßnick so po přihrawce energisce w šěsnatce přesadźi a na cyle swobodnje stejaceho Šołtu wotpołoži. Konječan njeměješe ćeže bul do saka sunyć. Pjeć min. pozdźišo hosćo skrótšichu. Pasle za nimohru domjacych njefungowachu, tak zo steješe nadobo Tim Walter samlutki před Fabianom Hejdušku a 3:1 trjechi. Domjacy pak njedachu so zamylić a wotmołwichu w 71. min. ze štwórtymi wrotami. Po přihrawce Tomaša Jurša wuži wuběrny Šołta swoju spěšnosć a wobchowa tež před wrotarjom čuwy. Z rjanej niskej třělwu wón bul přetwori. Wšo rozsudne wrota padnychu w 84. min. Po krótkim wotkopje hosći myleše Šołta wuspěšnje poslednjeho škitarja. Swobodnje před klětku pak wón widźeše, zo je Ali Eldor sobu běžał, Šołta bul njesebičnje na Eldora wotpołoži, a naposledk mjenowany Pančičan podźakowa so z wrotami.

Facit: Dobyće běše tež w tutej wysokosći dospołnje zasłužene. Z lěpšim wužiwanjom šansow by dyrbjał wuslědk samo wyše wupadnyć. Wosebje na hrajerskim polu su so koparjo Marijineje hwězdy stopnjowali, štož jim dalše tři dypki wobradźi. Tobias Nowak

Veröffentlicht in Sport
Bitte anmelden, um einen Kommentar zu posten

Anzeige