Swětowe mišterstwo w Pěskecach? To bě mój mjezyfacit hač do wčerawšeje njedźele. Wothladajo wot hry němskeho mustwa bě předkoło turněra dotal skerje ... nóhaj. Dźiwne přihrawki, tójšto taktiskich zmylkow a lědma běžna kopańca, kajkuž ju hewak wot champions league abo druhdźe znaješ. A potom mi switaše. Scenarij tola znaju: Kóžde lěto znowa jón swjatki póndźelu w Pěskecach dožiwjam. To njeje najrjeńša, estetiska kopańca. Za to wjele kick and rush, kaž w Jendźelskej rjeknu. Potajkim husto daloko doprědka klepane bule. A tola maja tute hry něšto na sebi, w Pěskecach runje tak kaž dotal na swětowym mišterstwje. Wšako hrajerjo wšo dadźa, zo bychu swoju wjes, swój pochad zastupowali. Na přikład pjatk wječor: Kanada přećiwo Bosniskej a Hercegowinje. To njebě najlěpša kopańca, zdźěla bě samo jara špatna. Ale hra měješe njewšědny tempo a rytmus a bě žiwa wot scenow, kiž běchu skerje připadnje nastali. Na zbožo stej so tempo a niwow hrow mjeztym zwyšiłoj. Wosebje hra Japanskeje přećiwo Nižozemskej bě jara dobra a zabawna. Tak móže rady dale hić!