Wikowarjo zwěsćeja wjetšu potrjebu – kupcy płaćizny přirunuja
Pančicy-Kukow/Rakecy (SN/StŠ). Zyma so bliži a tuž so we wjele domjacnosćach ludźo prašeja, kajka drje wona lětsa budźe. Změjemy dołhe a krute zmjerzki a budźe nakupjeny wolij, płun abo tež składowane drjewo dosahać? Hačrunjež po informacijach statistiskeho zarjada w Sakskej jeničce 3,2 procentaj wšitkich domjacnosćow hłownje z drjewom resp. z drjewowymi peletami swoje domske tepitej, ma nimale kóžda štwórta domjacnosć přidatnje kamin abo kachle, z kotrymiž tepja. Zo su ličby kaminow a kachli w poslednich lětach přeco dale přiběrali, pytnu tež tudyši wikowarjo drjewa. „W minjenymaj lětomaj zwěsáchmy přiběrajcy wjace naprašowanjow za drjewom. Poskićamy palne drjewo z našich lěsow jeničce w dwumetrowskich kuluškach. Hłownje chcedźa ludźo za kamin brězu měć. Druzy zaso tepja radšo chójnu. Štóž nima móžnosć, sej kupjene drjewo sam z lěsa domoj zwozyć, tomu poskićamy w našej blišej wokolinje tež transport“, wuzběhnje Guido Budar, hajnik klóštra Marijina hwězda.



