Sobudźěłaćer AfD w jatbje
EU žada sej pomoc Palestinjanam
Brüssel (dpa/SN). Za humanitarnu pomoc zamołwity komisar EU Janez Lenarčič sej hladajo na katastrofalne połoženje ludźi w Gazaskim pasmje žada, wjele diskutowany pomocny skutk na dobro Palestinjanow UNRWA dale podpěrać. „Namołwjam kraje darićelow, UNRWA pomhać – wažny žiwjenski prud za palestinskich ćěkancow“, piše słowjenski diplomat. Wón wita wčera wozjewjenu rozprawu wo pomocnym skutku, kotraž „systemy organizacije k dodźerženju předpisow k neutraliće“ wuzběhuje.
Pomocny skutk běchu w januaru kritizowali, po tym zo bě Israel twjerdźił, zo běchu so sobudźěłaćerjo UNRWA na masakru Hamas 7. oktobra w Israelu wobdźělili. Na to běchu wjacore kraje, mjez druhim Němska, swoje popłatki za UNRWA přetorhnyli.
USA pomocne srědki přeco hišće blokuja. Społnomócnjeny prezidenta USA Joewa Bidena za humanitarne prašenja David Satterield je wčera znowa před strachom hłodoweje katastrofy warnował a Israel namołwjał, tomu zadźěwać. Biden je tole w telefoniskej rozmołwje z israelskim ministerskim prezidentom Benjaminom Netanjahuwom spočatk apryla wuraznje narěčał.
Šulerjo wopory stawka
Tež lětsa zaso Myto Domowiny
Budyšin (SN). Tež lětsa chcemy zaso wuznamjenić wosoby abo skupiny, kotrež so čestnohamtsce za zachowanje našeju rěčow a hajenje serbskeje kultury na wosebite wašnje zasadźuja. Hač do 30. junija 2024 móžeće mytowanskemu wuběrkej namjety za wuznamjenjenje z Mytom Domowiny, z Mytom Domowiny za dorost a z Čestnym znamješkom Domowiny zapodać, a to na adresu: Domowina – Zwjazk Łužiskich Serbow z. t., Póstowe naměsto 2/Postplatz 2, 02625 Budyšin. Swój namjet móžeće tež z e-mejlku pósłać na .
Prošu wužiwajće za to formular, kotryž je na webstronje składowany. Tam namakaće tež dalše informacije. Jeli maće prašenja, so rady direktnje na zarjad Domowiny wobroćće: Clemens Škoda, referent za kulturu a wukraj, e-mejlka: , tel. 03591 550208. Mytowanske zarjadowanje wotměje so 18. oktobra 2024 w Budyšinje.
Z Mytom Domowiny počesćimy tych, kotřiž so zaměrnje a wuspěšnje za zachowanje serbskeje rěče a kultury, ale tež za wozrodźenje serbskeho žiwjenja zasadźuja. Zarjad Domowiny
To a tamne (24.04.24)
Črije za najwjetšej noze swěta zhotowił je šewc Georg Wessels (71) w Sewjerorynsko-Westfalskej a je nowe črije 28lětnemu Jeisonje Rodriguezej we Venezueli wosobinsce přepodał. Rodriguez chorosće dla spochi dale rosće a trjeba mjeztym črije wulkosće 70 za noze, kotrež stej dlěšej hač 40 centimetrow. Ze swojimi 2,36 metrami ma młody muž přiběracy ćělne bolosće a problemy w bydlenju. Pjenjezy za lěkowanje pak wón nima. Tuž je dale a bóle na pomoc pokazany.
Nócny wulět bobra w zahrodźe w sewjerorynsko-westfalskim Hagenje je so w swětłowym šachće pinčneho wokna skónčił. Wobydlerjo wołachu policiju, kotraž pak njemóžeše pomhać, wšako zwěrjo w šachće kruće tčeše. Wohnjowi wobornicy bobra skónčnje wuswobodźichu a po přepytowanju z dowolnosću skótneho lěkarja w přirodźe zaso wusadźichu.
Chinskeho spiona zajeli
Drježdźany (dpa/SN). Sobudźěłaćerja němskeho zapósłanca AfD Maximiliana Kraha su dźensa w Drježdźanach zajeli, wumjetujo jemu spionažu za Chinu. Wo tym rozprawja generalne statne rěčnistwo w Karlsruhe. Zajaty je pječa informacije z Europskeho parlamenta dale dawał. Krah sam njebě dopołdnja za stejišćo docpějomny. Bydlenje sobudźěłaćerja w Drježdźanach su mjeztym přepytowali. Němski staćan Jian G. je pječa sobudźěłaćer chinskeje tajnje słužby.
Nastroje radšo porjedźeć
Brüssel (dpa/SN). Europski parlament chcyše dźensa zakoń wobzamknyć, kotryž spožča kupcam prawo na porjedźenje nastroja. Po tutym puću chcedźa ludźi pohnuć, kupjene nastroje dlěje wužiwać, na přikład chłódźak abo laptop. W padźe defekta chcedźa ludźom zmóžnić, čas garantije podlěšić. Hłowny zaměr je, so knježacej mentaliće preč mjetanja spřećiwjeć, kotraž broji dźěłowe mocy a zemske pokłady a kiž zawostaja kóždolětnje 35 milionow tonow wotpadkow.
Zaso rakety na Israel
