ST Chrjebja-Nowa Wjes – ST 1922 Radwor 1:5 (1:2)
Zestawa hosći: Tausend – Reineke, Jatzwauk, Šěrak, Paška, Omran, Glücklich, Pětšak, Zähr, Schulze, Hantschik, Hain, Wróbl, Sćapan
W druhej testowej hrě nastupichu Radworscy koparjo přećiwo njeznatemu přećiwnikej z Chrjebje-Noweje Wsy. Hosćićeljo hraja tež we wokrjesnej lize. To běše dobra přiležnosć za Radworskeho trenarja wupruwować nowy hrajny system z dwěmaj hrajerjomaj w centrumje a dwěmaj nadběhowarjomaj.
Plan bě, z krótkimi přihrawkami a spěšnymi kombinacijemi před wrota přećiwnika přińdź. Radworčenjo pak zhubichu w prěnich mjeńšinach bul w natwarje a dóstachu z dołhim bulom konter, kotremuž njemóžachu zadźěwać. Tak steješe hižo zahe 1:0 (4.) za hosćićela. Po tym pak so hra na dobro hosći zwjertny. Po dobrej přihrawce Radworskeho wrotarja běžeše Tom Schulze sam na přećiwniskeho wrotarja a wotpołoži bul Paulej Hantschikej, kiž dyrbješe jón jenož hišće za wrotowej liniju k 1:1 (11.) zaměstnić.
Za Ralbicy zasadźeni: Schöne – Šewc, Wałda, Schultz, Matka, Rachela, Šiman, Bejma, Domaška, G. Kurjat, Šołta, Lešawa, Janca, Nuk, M. Kurjat, Budar
Pjatk wječor testowachu Ralbičenjo přećiwo młodźinje A Budissy Budyšin. Tute mustwo hraje w krajnej lize. Młodźi hrajerjo su derje wukubłani nastupajo techniku a maja wulku spěšnosć. Tež Sokoljo, kaž na přikład Tomaš Bejma, Dawid Šołta abo Alexander Wałda, su so mjez druhim w Sprjewinym měsće wukubłać dali, prjed hač zaso kopački za Sokoł šnórowachu. W rjadach Budissy hraješe pjatk tež serbski koparski talent Niclas Ričel. Njebjelčan pokaza dobry wukon, kotryž widźeše Niclasowy nan a trenar Serbskeje koparskeje wubranki muži Frank Ričel.
ST Marijina hwězda – Hlinowski SC 1931 6:0 (5:0)
Zestawa domjacych: Schmidt, Matik – Langer, Hawš, Zelnak, R. Cyž, Peschmann, Ch. Cyž, Pjetaš, Pi. Lugge, D. Jurš, J. Pakoßnick, Pa. Lugge, Lipič, Čornak, T. Jurš, K. Pakoßnick
Na pjatkownu treningowu hru přeprosychu sej koparjo Marijineje hwězdy susoda z Hlinowca. Ju dobychu hosćićeljo wysoko ze 6:0 přećiwo klasu niže hrajacemu wokrjesnemu ligistej. Dokelž domjacy sami žanoho sudnika stajić njemóžachu, wupomhaše we wokrjesu znaty referee Hlinowčan Heiko Göbel.
SJ Chrósćicy – Biskopičanske KT II 3:1 (0:0)
Zasadźeni hrajerjo: Králíček – B. Cyž, F. Cyž, Sentivan, Mark, L. Zahrodnik, Zynda, G. Zahrodnik, M. Zahrodnik, F. Zahrodnik, Paška, Handrik
Při horcych temperaturach steješe za Chróšćanow njedźelu tydźenja druhi test na planje. Z hosćom bě rezerwa z Biskopic. Młode mustwo bě po zašłej hrajnej dobje do wokrjesneje wyšeje ligi postupiło. Hnydom wot spočatka wobě mustwje doprědka tłóčeštej. Tak móhło bjezdwěla w prěnjej mjeńšinje hižo 1:0 stać. Přez prawu stronu bě so Bosćij Cyž derje přesadźił. Flanka docpě Luciana Zahrodnika, tola Zahrodnikowa třělwa wrota snadnje misny. K dalšim wulkim šansam pak w spočatnej fazy přišło njebě, dokelž falowaše domjacym dokładnosć a hosćom zaměrnosć w nadběhu. Chróšćenjo spytachu nadběhi přez wonkownych hrajerjow natwarjeć. Tomu pak móžachu hosćo derje zadźěwać. Tak wuwi so wotewrjena hra bjez wulkich šansow na woběmaj stronomaj.
Minjeny kónc tydźenja bě sej 16 Chróšćanskich koparjow do treningoweho lěhwa do Pólskeho Raszowa dojěło. To je wjeska w gmejnje Leśnica, kotraž je partnerska gmejna Chróšćanskeje komuny. Mustwo z Chrósćic trenowaše na sportnišću LZS Raszowa, hdźež mějachu dobre wuměnjenja za swoje zwučowanja.
Pjatk steješe za koparjow nimo dweju treningoweju jednotkow tež hišće testowa hra přećiwo domjacemu cyłkej na planje. W zwučowanskich jednotkach dźěłachu wosebje na kondiciji, ale tež na taktiskim polu a na standardnych situacijach. Testowu hru na wječoru móžachu Chróšćenjo 2:1 dobyć. Wrota třělištaj Zahrodnikec bratraj Feliks a Gabriel. Hosćo hru nimale přez cyłu distancu dominowachu, ale skomdźichu třeće abo samo štwórte wrota třělić. Po hrě běchu koparjo z Łužicy na zhromadne grilowanje při sportnišću přeprošeni.
Klěśišća (dpa/SN). Łužiske koło steji před struchłym jubilejom: Swjatočnosće składnostnje 20. róčnicy wobstaća najmłódšeho wubědźowanišća Němskeje 20. awgusta dyrbja koronapandemije dla wupadnyć. „Njeplanujemy ničo. Přetwarimy wšitko hišće raz, ale nochcemy so do srjedźišća tłóčić, předewšěm, dokelž objekt hakle dwě lěće wobhospodarjamy“, zdźěli rěčnik pruwowanskeje organizacije Dekra, kotraž je areal w lěće 2017 přewzała, powěsćerni dpa.
Hižo kónc tydźenja běchu wubědźowansku seriju Němske turowe mišterstwa (DTM) bjez přihladowarjow přewjedli. Runje tak planuja to wot přichodneho pjatka do njedźele, štož je wězo za wobhospodarjerja z wulkimi pjenježnymi stratami zwjazane. Minjene lěta běchu ze seriju DTM třećinu lětnych dochodow nadźěłali.
Na Łužiskim kole njewotměwaja so jenož wubědźowanja jězdźidłow, ale tež prezentacije awtotwarcow, koncerty a šlagrowe partyje abo wubědźowanja w błóće ze zadźěwkami. Nimo toho twari tam Dekra najwjetši slědźenski centrum za awtomatizowane jězdźenje.
Pokalne finale Delnjołužiskeho koparskeho wokrjesa wotmě so njedźelu tydźenja w Grodku. Wo kopańcy tohole wokrjesa lědma w SN čitamy. Skedźbnić pak chcemy wosebje na finale mjez žónskimaj mustwomaj Viktoria Choćebuz a ST Hochoza. W rjadach wobeju cyłkow su mjenujcy stajnje štyri hrajerki Serbskeje žónskeje wubranki sobu za bulom honili.