Zapadołužiski koparski zwjazk (WFV) je w běhu tydźenja nowu zestawu staflow na wokrjesnej runinje předstajił. Při tym napadnje we wokrjesnej wyše lize ličba mustwow. Město 16 hraje tam 17. Při­čina: Koparjo TSV Wachauwa su za zelenym blidom sportoweho sudnistwa WFV wuspěšnje skoržili. W oficialnej tabulce běštej přez cyłu hrajnu dobu jenož 15. a 16. městno z čerwjenej-zestupnej barbu woznamjenjenej. Wachauske mustwo bě na kóncu štyrnate, dyrbješe pak tohorunja zestupić. Po jeho wuspěšnej skóržbje změje tuž wokrjesna wyša liga wot awgusta 17 zastupnistwow.

Wuskutkować budźe so njeruna ličba tež na ličbu hrajnych dnjow. Tak dyrbi staflowy nawoda dalšej hrajnej dnjej zapla­nować. Jedyn z přidatneju je hrajny wuběrk na kónc tydźenja 8./9. awgusta 2015 połožił, dalši na 25./26. junij 2016. Wjacore koparske towarstwa pak su hižo protestowali, dokelž maja za datum w awgusće 2015 treningowe lěhwo knihowane.

Jutře wot 18.30 hodź. wubědźuja so wo­hnjowi wobornicy zaso we Worklecach. Domjacy hašerjo budu znowa spytać načol­nu poziciju w boju wo pokal za­rjadniskeho zwjazka při Klóšterskej wodźe zakitować. Po dwěmaj přeběhomaj, kotrejž su dobyli, steja woni mjenujcy na čole tabulki.

Tabulka po 1. a 2. přeběhu: 1. Worklecy (36 dypkow), 2. Konjecy- Šunow (33), 3. Róžant-Sernjany (32), 4. Ralbicy-Róžant (30), 5. Wotrow (29), 6. Pěskecy (26)

Wopačna ličba

W rozprawje Bjarnata Deleńka zawčerawšim wo wuměnje ze sportowymi přećelemi čěskeho towarstwa Sokol Roztoky měješe prawje rěkać, zo je so wuměna lětsa 47. raz přewjedła. 1968 su Njebjelčanscy sportowcy přećelske styki nawjazali. Jedne lěto žaneje wuměny njebě.

Pod tymle nadpismom wobroća so starosta Serbskeho Sokoła Milan Funka na trenarjow a wšitkich sportowcow dorostowych wubrankow:

Lubi serbscy Sokoljo dorostowych koparskich wubrankow młodźinow E, D a C, lubi starši, lubi trenarjo Franko Šnajdro, Mariano Žuro, Tomašo Bjeńšo, Křesćano Bejmako a Fabiano Pöpelo! Wam wšěm słuša wulki sokołski dźak za wulkotny angažement w zašłych tydźenjach na­stupajo serbske dorostowe koparske wubranki. Wutworiwši tři wubranki a wob­dźělejo so na třoch turněrach smy njesměrnje wulki krok w dorostowym dźěle Serb­skeho Sokoła docpěli. Wosebje wulki zaćišć zawostaja we mni waša zwólniwosć, za tute projekty so zasadźeć. Hladajo na dobre wotrěznjenje w Kubšicach, Bukecach a Liegauwje-Augustusbadźe sće so we wobłuku Zapadołužiskeho koparskeho zwjazka kaž tež za jeho mje­zami wo dalše pozitiwne zwobraznjenje serbskich sportowcow starali. Za to wam wšitkim wulke připóznaće.