Wojerecy (SN/JaW). 18 ćěkancow a požadarjow azyla we Wojerecach su swój hłodowy stawk na njewěsty čas zakónčili. To zdźěli farar Jörg Michel z wobydlerskeho zwjazka „Wojerecy pomhaja z wutrobu“.
Po tym zo bě Wojerowski zwjazk před něšto wjac hač tydźenjom Zwjazkowy zarjad za migraciju a ćěkancy w Kamjenicy pisomnje wo pospěšenje wobdźěłanja próstwow wo azyl prosył a so na wjacorych zamołwitych zarjadach na krajnej a wokrjesnej runinje stajnje zaso naprašował, je Kamjeničanski zarjad skónčnje reagował. Konkretny časowy wobłuk za wobdźěłanje próstwow pak w pismje z Kamjenicy mjenowany njeje. „Wobdźělenje na hłodowym stawku nima žane wuskutki na wobdźěłanje próstwy wo azyl. Zwjazkowy zarjad njemóže jednanja jednotliwych wosobow prjedy wobdźěłać“, rěka mjez druhim w zdźělence, kiž redakciji SN předleži. „Skerje skedźbnjeja na personelne ćeže a přilubjeja wuhlad na čujomne polěpšenje“, piše farar Jörg Michel. Stawkowacy a čłonojo wobydlerskeho zwjazka dojednachu so tuž hłodowy stawk nachwilnje wusadźić, wočaknyć a wuwiće dale wobkedźbować.
Berlin (dpa/SN). Organizacija ćěkancow Pro Asyl žada sej hladajo na stupace ličby ćěkancow wjetši angažement Zwjazka. Přidatnje měł Zwjazk kóšty za zastaranje ćěkancow přewzać. Zwjazk a zwjazkowe kraje hižo dlěje wo dalšim rozdźělenju kóštow diskutuja. Nazymu chcedźa so k tomu doskónčnje dojednać.
Zwjazkowy nutřkowny minister Thomas de Maizière (CDU) chce dźensa prognozu wočakowaneje ličby ćěkancow wozjewić. Minjeny tydźeń je hižo wozjewił, zo budźe ličba wo wjele wyša, hač připowědźena. Dotal bě rěč wo 450 000 ćěkancach, prognoza leži pola 750 000.
Mjeztym je w Drježdźanach a Kamjenicy dóšło k ćežam při zaměstnjenju ćěkancow. Hubjeneho wjedra dla njemóža ćěkancy hižo w stanach wostać. Nětko zaměstnjeja jich přechodnje w sportowych halach a dalšich krutych domach. Problem měł so spěšnje rozrisać.
Awstralski jaty je swoju swobodu po ćeknjenju po filmowym přikładźe z pomocu płachtow móhł jenož skrótka wužiwać. Hižo dźeń po ćeknjenju z wysokowěstotneho jastwa jeho policija po 100 kilometrach honjeńcy zaso zaja. Zastojnikam bě wón napadnył, dokelž jědźeše z pokradnjenym awtom. Muž ma dwanaće lět wotsedźeć dla wobrónjeneho nadpada. Wutoru bě zwjazane płachty přez jastwowu murju ćisnył a so po nich horje sćahnył.
W Indiskej je policija papagaja podhlada křiwdźenja dla na stražu skazała. 75lětna žona bě swojeho susoda wobwinowała, zo je papagaja nawučił, ju wuswarjeć. Jeje přiwzaty syn je susodej pomhał. Wšitcy štyrjo běchu na policajski zarjad w Maharashtra prošeni. Papagaj pak je mjelčał. Jeho su lěsnistwu přepodali, zo bychu jeho do přirody pušćili.
Hrajkanišća derje wotrěznyli
Budyšin/Zhorjelc (SN/ch). Kónčny wuslědk hrajkanišćoweje akcije Fanta 2015 je z wida wobdźělenych iniciatiwow z wokrjesow Budyšin a Zhorjelc dosć respektabelny. Štyri ze sydom domjacych hrajkanišćowych projektow je mjez prěnimi sto a dóstanu tuž přiražku 1 000 eurow. K wjace pak njedosahaše. Za městno mjez prěnimi 15 z mytom 5 000 eurow by było 17 700 hłosow trěbnych, štož je po měnjenju wobdźělenych iniciatiwow z Hornjeje Łužicy utopiske. Při wšěm pak so projekty w Niskej, Pěskecach, Žitawje a Steinigtwolmsdorfje z 1 000 eurami mytuja.
Insolwencu přewinyli