Drježdźany (SN). Dźeń a wjace šulerjow w Sakskej wuknje we wobłuku dźěłowych zjednoćenstwow čěšćinu a pólšćinu. Dźensa pjeć króć telko młodostnych pólsku rěč wuknje kaž před 13 lětami, rozprawja němsko-čěska powěsćernja. Lěta­ 2001/2002 so runje 442 holco­w a hólcow za rěč susoda zajimowaše. W nachilacym so šulskim lěće 2014/2015 je so na wšě 2 035 šulerjow z rěču a kul­turu susodneho kraja roze­stajało.

Wulki rozrost dožiwja tež zajim za čěšćinu. Ličba šulerjow je so wot 1 007 w šulskim lěće 2001/2002 na mjeztym 2 865 nimale potrojiła.

Sydomnaće muži je so po swjedźenju w Schleswigsko-Holsteinskej do mało­trans­portera tłóčiło, kotryž ma poprawom jenož městno za šesćoch. Nimo toho mějachu hišće městno za piwowe ławki a kašćiki. Hač na šofera běchu wšitcy pjeni. Policistam bě awto w Plönje w nocy na njedźelu napadnyło, dokelž zdawaše so chětro ćežke być. Při kontroli nańdźechu sedźacych a ležacych muži. Pjećo smědźachu ze šoferom dale jěć, ći tamni dyrbjachu sej taksi skazać.

Hnydom dwójce dospołnje wopiteho za wodźidłom awta je policija młodeho muža­ w sewjerorynsko-westfalskim Troisdorfje lepiła. 31lětny bě tak pjany, zo móžeše při alkoholowej kontroli lědma hišće stać. Jězbnu dowolnosć jemu na to wzachu. Hodźiny pozdźišo bě samsny muž zaso z awtom po puću. Tónkróć za­stojnicy klučiki sćazachu.

Zajim z USA za Łužicu

Wjelcej (dpa/SN). Wudobywanje miliny z wobnowjomnych energijow we Łužicy je tež w USA zajim zbudźiło. Skupina ameriskich politikarjow chce tuž jutře Braniborsku wopytać. Hosćo z pjeć zwjazkowych statow USA přińdu na přeprošenje zapósłanče Zelenych w Braniborskim krajnym sejmje Heide Schinowsky, zdźěla jeje wólbnowokrjesny běrow. Do programa słuša wopyt brunicoweho regiona Wjelcej. Tam produkuja solarnu energiju kaž tež biomasu. Kónčina je wot wotbagrowanja wohrožena. Tež krajny sejm chcedźa Američenjo wopytać, kaž ze zdźělenki wuchadźa.

Dorost zaměrnje pytać

Zhorjelc (SN). Zhorjelski wyši měšća­nosta Siegfried Deinege (njestronjan) informacisku politiku sakskeho knježerstwa při zarjadowanju prěnich přijimarnjow za požadarjow azyla raznje kritizuje. Hakle wčera bu jemu zdźělene, zo ma so bydlenski dom studentow w Zho­rjelcu krótkodobnje jako přijimarnja ćěkancow wužiwać a zo su tam bydlacym 35 studentam ke kóncej měsaca wupowědźili. „Ani wobchadźenje ze studentami, ani njedosahacu informacisku politiku ze stron Swobodneho stata Sakskeje napřećo wysokej šuli a městu k tutej temje njemóžu akceptować“, Deinege praji. Přiwšěm ma wón zrozumjenje za to, zo steji Sakska hladajo na cyłkowne połoženje pod wulkim ćišćom. Rozsudy tajkeho razu pak měli so do toho ze zamołwitymi komunow wotrěčeć. Rěčnica města Silvia Otto zwurazni: „Wobydlerjo su minjene měsacy ze swojim zasadźenjom nazornje dopokazali, zo smy tolerantne a swětej wotewrjene město. Zo by tomu dale tak wostało, je jasna komunikacija z ludźimi trěbna.“