Mamutowy jěchanski turněr
Na 45. jěchanskim a skakanskim turněrje w Kulowje startowaše 242 jěcharkow a jěcharjow z 15 wšelakich sportowych zjednoćenstwow na 350 konjach. Na parcoursu dožiwichu přihladowarjo něhdźe 600 startow. Za organizatorow a pomocnikow běše to mamutowy program, wosebje při wuhotowanju a wuličenju. Sobotu dyrbjachu program poł hodźiny přetorhnyć, dokelž so hrimaše a dešćowaše. Škoda pak žana nastała njebě.
Na sportowym polu přeswědčištaj wuspěšnaj domoródnaj jěcharjej Andre Schlegel a Ellen Altenkamp. Tež dalše jěcharki z Kulowa běchu na wubědźowanja derje přihotowane. Sofija Brězanec, Magdalena Wowčerjec, Laura Kaiser, Nadine Schneider a Elisabeth Bulankec wudobychu sej tak mjenowane zaměstnjenja, štož je tohorunja wuspěch. Elisabeth Bulankec wjeseleše so zdobom hišće na showprogram, kotryž bě wona wot 1. meje z dalšimi dorostowymi jěcharkami zwučowała a je jón nětko bjez zmylka jěchała.
Woprašachmy so Matijasa Kubicu, předsydu Kulowskeho jěchanskeho towarstwa, hač njeje wužadanje za wobdźělnikow přewulke tajki hoberski program zmištrować?
37. Oberlichtenauski lětni běh so wotměł
Sobotu, 2. julija, wotmě so mjeztym hižo 37. Oberlichtenauski lětni běh. Na ćežkim, ale jara woblubowanym wurisanju w rjanej zapadołužiskej hórskej krajinje je lětsa nimale 200 entuziastow běhanja swoje mocy a wutrajnosć měriło. Činjachu to po a na Heji (Keulenberg) na distancomaj 5 km a 13 km. Ličba serbskich běharjow mjez nimi bě lětsa tróšku mjeńša.
Wosebje wuzběhnyć matej so wukonaj Romana Měrćinka a Richarda Paški na 13 km. Ze 108 starterow na tutej čarje wuwojowaštaj sej serbskaj atletaj, wubědźowacaj so w sk 20-29 lět, dobrej městnje: Roman Měrćink třeće a Richard Paška 4. městno. Cyłkownaj dobyćerjej běštaj Sven Kunath a Franziska Kranich.
Běh na 5 km dobyłoj staj John Viehweger a Jasmin Eisold. Předšulske dźěći a šulerjo wubědźowachu so we wotpowědnych starobnych skupinach na 0,7 km. Běhi hódnoćachu so za rjadnu lisćinu, za Sakski cup a za Drježdźansku wobwodnu lisćinu. Jurij Nuk
Tabulka najpilnišich koparskich sudnikow
Zamołwići wuběrka koparskich sudnikow su statistiki zasadźenjow refereejow Zapadołužiskeho koparskeho zwjazka wozjewili:
Krajna liga a krajna klasa
Matijas Kral 70 hrow
Marcus Mayer 63 hrow
Michał Neter 62 hrow
wokrjesna wyša liga
Maurizio Hoffmann 71 hrow
Michael Liebner 62 hrow
Nils Fiedler 59 hrow
wokrjesna liga
Michael Hübner 73 hrow
Ottmar Six 63 hrow
Christian Burek 62 hrow
wokrjesna klasa
Marko Schoske 65 hrow
Conrad Schulze 58 hrow
Daniel Grader 56 hrow
Jurij Bjeńš
Ronaldo walizisku koparsku bajku zakónčił
Lyon. Zawěsće ličachu waliziscy fanojo wčera hižo při wotskoku Cristiana Ronalda k hłójčkowanju, zo budźe jich koparska bajka snano w přichodnym wokomiku zakónčena. A to wona potom tež woprawdźe běše. Portugalski superstar šrubowaše so kaž helikopter do powětra a zhłójčkowa bul krasnje do wrotow. Jako Nani tež hišće 2:0 trjechi, njenamaka mustwo wokoło waliziskeho superstara Garetha Balea žanu wotmołwu. Na wobojich wrotach běše Ronaldo jako třělc a přihotowar wobdźěleny. Při 1:0 (50.) stłóči nadběhowar Reala Madrid flanku Raphaëla Guerreira do wrotow a tři minuty pozdźišo třěli Ronaldo cyle jednorje na wrota. Nani tykny nohu do třělwy a hižo ležeše bul w saku. Waliziscy přiwisnicy pak dale spěwachu a kleskachu, wopokazujo so jako fairni přěhračcy. „Naši fanojo su najlěpši swěta, z wulkim wotstawkom“, rjekny Bale, kotrehož jeho klubowy kolega Ronaldo po hrě tróštowaše.
Na wopyće w Spálenym Poříčí byli
Hižo 51. raz su so łužiscy a čěscy sportowcy mjezsobnje wopytali. Tónkróć nastaji so poměrnje mała skupina z Delan na jězbu do Spáleného Poříčí blisko Plzenja. Termin so z europeadu prěkowaše, a druhe koparske mustwo Sokoła Ralbicy/Hórki měješe poslednju winowatostnu hru sezony.
Sobotu rano podachu so wuprawnicy do hórniskeho muzeja Březové Hory, hdźež wobhladachu sej podkopki z mjenom Hanna. Jedna skupina poda so z liftom do hłubiny, tamna jědźeše z podzemskim ćahom do ćmy. Překop z lěta 1832 je z něhdźe 1 400 metrami jedyn z najhłubšich šachtow srjedźneje Europy. Zajimawa běše tež parna mašina z lěta 1914. We wulkej hali wonješe za wolijom a tukom, a mějachmy zaćišć, zo parnica hnydom dźěłać započnje.
K zhromadnej kopańcy steješe bohužel jenož wosom serbskich koparjow na hrajnišću. Čěscy hrajerjo mustwo tuž wudospołnichu. W prěnim połčasu hosćo po wrotach Maika Brězana njewočakowano nawjedowachu. Po přestawce pak běchu domjacy lěpši a docpěchu hišće štwore wrota. Wo kónčne 4:2 postara so znowa Brězan z jědnatku.
Škit Budyšin sej dobyće zawěsćił
Zaběra z dźěćimi na kopanišću dźěćkace činjenje
Marseille. Koparski zwjazk UEFA přima wot wčerawšeho za borzdźidłom. Organizatorojo europskich mišterstwow w Francoskej hižo nochcedźa, zo koparjo po hrach ze swojimi dźěćimi na hrajnišću wokoło běhaja, so z nimi zabawjeja a fotografuja. „Je přeco rjenje, hdyž so hrajerjo ze swojimi dźěćimi na trawniku zaběraja. To su rjane wobrazy“, turněrowy direktor UEFA Martin Kellen wuswětla, „europske koparske mišterstwa pak njejsu swójbny swjedźeń, znajmjeńša nic na kopanišću.“ Wosebje napadne bě to pola superstara Garetha Balea, kiž je po wosminalu přećiwo Sewjernej Irskej z dźowčičku Albu Violu po trawniku běhał. Waliziske dźěćace hrajkanje so po štwórćfinalnej partiji přećiwo Belgiskej hišće stopnjowaše. Na trawniku hrajkachu so samo wjacore dźěći. Waliziski koparski zwjazk dósta tuž porok UEFA. Europski koparski zwjazk ma tajke dźěćace wjesela za přewulke riziko. Dźěćkace to činjenje!?
SJ Njebjelčicy před jubilejom
Na kóncu hrajneje doby 2015/2016 překwapi Krystof Šejda, kopar mustwa Ü 32 Sportoweje jednotki Njebjelčicy (SJN), swojich sobuhrajerjow. Do jubilejneho 20. koparskeho turněra starych knjezow wo pokal Serbskeho Sokoła, na kotrymž wobdźělichu so cyłki z Radworja, Ralbic, Hórkow a Pančic-Kukowa, přepoda Šejda swojim mustwowym kameradam nowe, sponserowane trikoty, cholowy a nohajcy. Šef molerskeje firmy chcyše wonkowne a wosobinske znamjo sadźić. Klětu swjeći SJN, 60. róčnicu załoženja. Wjele lět hrajachu jeje koparjo we wobwodnej klasy a pozdźišo we wokrjesnej wyšej lize. Ceptar SJN w rukomaj ma hižo tójšto lět Bjarnat Deleńk, do toho běchu to Franz Bernhard, Joachim Blattert a Křesćan Ričel. Deleńk sam wukonja zastojnstwo wot 1999 ze zahoritosću, wutrajnosću a ze zapalom, ale tež z konsekwencu napřećo 169 sobustawam w kontakće z wokrjesnymi a krajnymi gremijemi. Połojca sobustawow SJN je dorost. Ći tamni, mužojo, słušeja do kategorije, kotraž „jenož“ lětny přinošk płaći. Tójšto lět su w Njebjelčicach tež holcy a žony za bulom honili.
Tež stara garda rady za bulom honi
Loni nastupichu Ralbičanscy koparjo – stari knježa prěni raz we wokrjesnym pokalu. Hnydom w prěnjej hrě přećiwo Natwarej Wojerecy 1919 so jich prašachu, čehodla we wólnočasnej lize wo dypki sobu njehraja. Maja dźě dosć dobru kwalitu, a mustwa bychu so wjeselili, bychu-li přećiwnika wjace měli.
Tak so mužojo započatk lěta za winowatostne hry rozsudźichu. Hnydom pak wujewi so problem. Jako hrajny plan wuńdźe, běše jasne, zo njehodźa so wjace wšitke w lěće 2015 wujednane přećelske partije přewjesć. Tež hra přećiwo starym knjezam ST Marijineje hwězdy bě potrjechena. Ralbičenjo startowachu z dwěmaj remisomaj do sezony. Přećiwo Módro-běłym Kulow běše njerozsudne 0:0 wězo mały wjeršk. W dalšich hrach pak hižo tak derje njeběžeše. Ralbičenjo worachu přewjele zmylkow, kotrež so hnydom chłostachu. Tak slědowachu štyri poražki. Hač na jednu wysoku (0:5 přećiwo Natwarej Wojerecy 1919) přěhrachu Sokoljo hry stajnje z jednymi wrotami rozdźěla. Na tym měješe so wězo dźěłać.
