Kongres w Bozenje so z diskusijemi, mytom a wikami zahajił

Bozen (SN/BŠe).„Mnohotnosć měć a w měrje zhromadnje žiwi być je wulki pokład. To je ideja Europy! Tute poselstwo chcemy do wšěch kónčinow zemje pósłać“, wuzběhny krajny hejtman zwjazkoweho kraja Južny Tirol Arno Kompatscher na zahajenju 69. kongresa FUEN wčera w Bozenje. Něhdźe 250 delegowanych mjeńšinow z cyłeje Europy so na nim wobdźěla. Mjez nimi je předsyda Domowiny Dawid Statnik, jednaćelka Domowiny Judit Šołćina, zastupjerka předsydstwa towarstwa Pawk Luiza Winarjec kaž tež předsyda słowjanskeje dźěłoweje skupiny FUEN Hartmut Leipner.