Rjedźenje wotprajene
Pančicy-Kukow. Kedźbu, čłonojo Domowinskeje skupiny Pančicy-Kukow! Za srjedu, 1. apryla, planowane rjedźenje wokoło pomnika Jakuba Barta-Ćišinskeho w Lipju je aktualnych přičin dla wotprajene. Nowy termin budźe sčasom wozjewjeny.
Tydźenske wiki hižo njebudu
Budyšin. Wotnětka hižo móžno njeje so na Budyskich tydźenskich wikach z tworami zastarać. Wukaz płaći najprjedy raz hač do 5. apryla. W nim rěka: „Na tydźenskich wikach njeje wotstawk połdra metra mjez wosobami móžny. Zdobom wosebje starši ludźo tele wiki wužiwaja.“
Telefonować abo pisać
Zły Komorow. Turisća, kotřiž chcedźa so wo wokolinje Złeho Komorowa, Wojerec, Gubina, Baršća, Grodka, Hamora abo wo wopytowarskim centrumje we Wjelcej wobhonić, móža to tuchwilu jenož telefonisce, e-mejlnje abo z póštu činić. Měšćanske informacije dźěłaja w regularnych wotewrjenskich časach.
Wjace poskitkow za dźěći
Choćebuz. Dźěći, znajmjeńša w Delnjej Łužicy, njemóža swoje rěčne znajomosće tuchwilu wobšěrnje dosć nałožować. Wšako njeje tam wjele maćernorěčnikow. Serbska redakcija rozhłosa RBB je so tuž rozsudźiła, program za dźěći a swójby rozšěrić. Tak chcedźa poskitki za delnjoserbšćinu podpěrać a dźěćom wotměnu zmóžnić, kaž zdźěla swobodna sobudźěłaćerka RBB Marja Elikowska-Winklerowa. Wotnětka wusyłaja wšědny postrow dźěćom z powědančkami, bajkami, hrajnymi scenami, basnjemi a spěwčkami, wot póndźele do pjatka na spočatku wusyłanja w dwanaćich a wječor w sedmich. Tež njedźelu Delnjoserbski rozhłós postrow wusyła. Potom započina so wusyłanje z Choćebuskeho studija RBB w 12.30 hodź. Program słyšiće na UKW-frekwencach Info Radio 93,4 MHz abo MDR 100,4 MHz abo Choćebuski kabl 94,55 MHz. Wjace internetnych poskitkow pod www. rbb-online/Sorbisches Programm
Doma wostać a čitać
Stajne blido njebudźe
Budyšin. Dźěłaćerski dobroćelstwowy skutk w Budyšinje zdźěla, zo stajne blido na temu „Kurić a nikotin“ 7. apryla na zakładźe aktualneje situacije wupadnje. Hač je w meji nachwataja, wo tym njejsu hišće rozsudźili. Zajimcow dobroćelstwo sčasom wo nowym wuwiću informuje.
K nuzy Posoł přez internet
Budyšin. Dyrbjało-li w přichodnym času coronakrizy dla k tomu dóńć, zo njehodźi so Katolski Posoł hižo ćišćeć abo roznošować, móža jón zajimcy digitalnje pod www.posol.de jako pdf-ku dóstać. To je redakcija katolskeho časopisa připowědźiła. Štóž nima přistup k internetej, njech prosy druhich wo to, jim strony wućišćeć.
Dźiwadło w interneće
Budyšin. Wšědne powěsće z Godowa móžeće wotnětka doma sćěhować. Nawoda klankodźiwadła a klankar w Němsko-Serbskim ludowym dźiwadle Šćěpan Siegfried posrědkuje z wutrobu a humorom aktualne towaršnopolitiske, naiwne filozofiske abo nabožne temy wobydlerjow kupy Godow. Wšědnje we 18 hodź. móžeće pod www.youtube.com/channel/UCcirOv_inb9RIWzRxsvAyzw Facebook: @inselgodow + @theaterbautzen pódla być.
Trjebaja kubłarku
Radwor. Katolski serbski dźěćacy dom „Alojs Andricki“ w Radworju pyta wot 1. apryla kubłarku abo kubłarja. Nadrobniše informacije podawa wjednica Andrea Henichowa pod 035935/20 717.
Kasa zawrjena, serwis pak daty
Budyšin. Powšitkowneho postajenja Swobodneho stata Sakskeje k wotwobaranju coronawirusa dla su wšitke zarjadowanja Serbskeho ludoweho ansambla hač do 20. jutrownika wotprajene. To zdźěli rěčnik SLA Stefan Cuška. Tež kasa je wotnětka zawrjena. Zajimcy móža sobudźěłaćerki serwisa telefonisce pod čisłom 03591 358111 abo e-mailnje pod docpěć.
Štó chce sobu hrać?
Budyšin. Za lětuše dźiwadłowe lěćo „Sherlock Holmes“ pyta NSLDź lajskich hrajerjow wšěch starobnych skupin, kotřiž chcyli rólu statista přewzać. Zwučowanja přewjedu wotsrjedź meje stajnje wječor a kónc tydźenja. Předstajenja budu 25. junija hač do 2. awgusta.
Nowy termin hižo postajili
Muzej začinjeny
Budyšin. Muzej Budyšin dyrbi coronakrizy dla wšitke zarjadowanja hač do 19. apryla wotprajić. Muzej wostanje tež zjawnosći zawrjeny. Aktualne informacije namakaja zajimcy pod www.museum-bautzen.de.
Gmejnska rada njebudźe
Radwor. Za přichodnu wutoru planowane posedźenje Radworskeje gmejnskeje rady je tuchwilneje krizy coronawirusa dla wotprajene. Tole zdźěla wjesnjanosta Wincenc Baberška. Na posedźenju chcychu zapokazanje noweje wjesnjanostki w aprylu přihotować a radźićela wuzwolić, kiž ma ju spřisahać. Tohodla běchu zeńdźenje do sportoweje hale „Slavia“ přepołožili, hdźež by wjace městna było. Najebać to pak su nětko hinak rozsudźili.
Poradźuja telefonisce
Budyšin. Tež Budyska turistiska informacija je swoje durje za zjawne wužiwanje zawrěła. Wosobinske poradźowanja tam hižo žane njejsu. Serwisowi sobudźěłaćerjo a sobudźěłaćerki pak su wšědnje wot 10 do 17 hodź. telefonisce abo e-mejlnje k dispoziciji.
Proba chóra njebudźe
Konjecy. Kedźbu spěwarjo Serbskeho muskeho chóra Delany! Kaž nam Měrko Korjeńk z předsydstwa chóra zdźěli, zwučowanja chóra w přichodnymaj tydźenjomaj aktualneho wuwića choronawirusa dla wupadnu. Ručež połoženje hižo tak napjate njebudźe, dalše informacije wozjewimy.
Zarjadowanja wotprajene
Kamjenc. Hladajo na aktualne wuwiće w zwisku z coronawirusom je Kamjenski Muzej zapadneje Łužicy hač do 19. apryla wšitke zjawne zarjadowanja wotprajił. Hižo wčera wupadny tak mjenowana časowa jězba do kamjentneje doby, 10. apryla njebudźe debjenje jutrownych jejkow z Zobelec swójbu, a přednošk wo Njeswačanskej ptakoškitnej staciji z dr. Winfriedom Nachtigallom 14. apryla je tohorunja wotprajeny. Přiwšěm wostanje muzej dale wotewrjeny, tež muzejowopedagogiske programy budu, za nje pak maja so zajimcy přizjewić.
Jedyn bus pojědźe, tamny nic
Budyšin. Za jutře w 19.30 hodź. planowane předstajenje NSLDź „Dołhož fenki běža“ dyrbi chorosće dla wupadnyć. Město toho hraja na wulkim jewišću kruch „Greta“ Serbskeho činohrajneho studija. Hižo kupjene zastupne lisćiki wostanu płaćiwe abo hodźa so hač do 20. měrca za hinaše předstajenje zaměnić. Planowany bus wot Miłoćic přez PančicyKukow njepojědźe. Dalši bus pak budźe zasadźeny, a to we 18.15 hodź. wot Němcow přez Kulowc, Kulow, Salow, Sulšecy, Šunow a Róžant. Jězba płaći dwaj euraj, zastupny lisćik sydom eurow.
Přechod so zminje
Ćisk. Němska železnica chce jutře, sobotu, železniski přechod na Budyskej dróze w Ćisku wotstronić. Kaž Wojerowske měšćanske zarjadnistwo zdźěli, so tak tež přechod za pěškow zminje. Wobydlerjow proša za to wo zrozumjenje.
Poskitk wobmjezuja
Přewjedu serbski wječor
Łaz. „Stawizny, drasta a spěw“ rěka hesło serbskeho wječora, na kotryž přeproša spěchowanske towarstwo Łazowskeho zetkanišća Dom Zejlerja a Smolerja jutře, pjatk, we 18 hodź. Z hosćom budźetaj Cyžec mandźelskaj Monika a Bjarnat z Noweje Jaseńcy. Zabawnje a informatiwnje podataj wonaj dohlad do stawiznow, kultury a rěče Serbow. Zastup je darmotny.
Nowe ideje přednjesć
Njebjelčicy. Prěni wječor noweho rjadu zarjadowanjow gmejny Njebjelčicy a ludoweje uniwersity wokrjesa Budyšin wotměje so jutře, pjatk, w 19 hodź. na Njebjelčanskej gmejnskej žurli. Pod hesłom „Hromadźe na wsy myslić, wuknyć, wuwić, činić“ móža wobydlerjo swoje namjety přednjesć, kak sej wuwiće gmejny a jednotliwych wsow předstajeja. Přeprošeni su wobydlerjo a čłonojo towarstwow wšěch wjesnych dźělow.
Wo literaturje a rěči
Drježdźany. Kulturny wječor wo serbskej literaturje a rěči přewjedu jutře, pjatk, w 19 hodź. w Drježdźanskim wuměłstwowym domje Raskolnikow. Na zarjadowanju wobdźěla so Drježdźanske serbske dźěći, Benedikt Dyrlich a Kirsten Bejmina z Wojerec.
Přizwolenje dóšło
Brězowka (AK/SN). Gmejna Dźěwin chce Dźěwinske wjesne srjedźišćo znowa wuhotować. Kaž wjesnjanosta Helmut Krawc (Wolerske zjednoćenstwo Dźěwin) na zašłym posedźenju gmejnskeje rady w Brězowce zdźěli, je přizwolenje za spěchowanske srědki we wobjimje 75 procentow mjeztym dóšło. Mjez druhim maja wosrjedź wsy pěc, wotpočnišćo za kolesowarjow a parkowanske městna nastać. Cyłkowna naprawa płaći něhdźe 150 000 eurow. Štwórćinu toho ma gmejna sama zapłaćić. Financować chce wona swój podźěl z inwesticiskeje pawšale Swobodneho stata Sakskeje.
Njebjo wobkedźbować
Budyšin. Na prašenje, kotre hwězdy su tuchwilu nad Budyšinom widźeć, wotmołwja jutře, srjedu, wot 19 hodź. w Budyskej hwězdarni. W planetariju dóstanu zajimcy zawod do nalětnjeho hwězdnišća. Při dobrych wuměnjenjach změja wopytowarjo składnosć, z pomocu dalokowidow wšelake objekty na njebju wobkedźbować.
Změje rěčne hodźiny
Kamjenc. Zapósłanc Sakskeho krajneho sejma Alojs Mikławšk (CDU) změje srjedu, 11. měrca, wot 13 do 17 hodź. dalše rěčne hodźiny w swojim Kamjenskim běrowje na Zapadnej 4. Zajimcy móža sej do toho termin dojednać, a to pod telefonowym čisłom 03578/ 305 383 abo e-mailnje pod . Wočinjeny je běrow wot póndźele do štwórtka, stajnje wot 8 do 16 hodź., a pjatk wot 8 do 14 hodź.
Filmowu dokumentaciju widźeć
Budyšin. Přichodne zarjadowanje sekcije hudźby Maćicy Serbskeje a Towarstwa za staru serbsku ludowu hudźbu wotměje so srjedu, 18. měrca, w 19 hodź. w sydarni čo. 106 Budyskeho Serbskeho domu. Tam pokazaja filmowu dokumentaciju serbskich ludowych rejow. Wšitcy zajimcy su wutrobnje witani.
Zhromadnje hrać
Budyšin. Štóž rady towaršnostne hry hraje a za to sobuhrajerjow pyta, nadeńdźe jich snano w Budyskej měšćanskej bibliotece. Tam steji zajutřišim, srjedu, wot 14 do 17 hodź. dalše hrajne popołdnjo na programje. Towaršnostne hry a dalše zabawjenske medije móža sej zajimcy w bibliotece tež wupožčić.
