Lěskej. Mustwo wobchad wobstražowanskeje słužby Zhorjelskeje policajskeje direkcije je zawčerawšim na zwjazkowej dróze B 156 w Lěskej z kedźbliwym wóčkom wobchad wobkedźbowało. W běhu třihodźinskeje kontrole lepichu zastojnicy jědnaće šoferow, kotřiž spěšnišo hač dowolene přez wjes jědźechu. W negatiwnym zmysle wusahowaše při tym 57lětny muž z BMWjom, w Pólskej přizjewjenym. Při dowolenych 50 km/h smaleše wón ze 121 km/h po dróze. Na njeho čaka nětko najwyše chłostanje, kotrež pokutny katalog za tajke pady předwidźi, mjenujcy pokuta 680 eurow a třiměsačny zakaz jězdźenja w Němskej. Wotpowědne pismo ma nětko pokutny wotrjad krajnoradneho zarjada zestajeć a smalakej posrědkować.
Slepo (AK/SN). Bywši municiski zawod Muna pola Slepoho su spočatk tydźenja torhać započeli. Póndźelu stajichu tam twarski płót, wčera započachu třěchu wotkryć. Pozdźišo twarjenja kompletnje spotorhaja a wšón material zrumuja. Na bywšim wojerskim arealu so na te wašnje přiroda krok po kroku zaso nawróća. Wotpowědny nadawk bě Slepjanska gmejna w aprylu specialnej firmje z Zwönitza pola Kamjenicy dała.
Naprawa płaći dohromady 119 000 eurow. Dźesać procentow z toho přewozmje Slepjanska gmejna, štož ma w lětušim hospodarskim planje zapisane. Wulki zbytk financuje sakska krajna direkcija. „Zwönitzska firma bě hižo bywši dom wusydlencow w Dźěwinje wotstroniła a je tuž w našim regionje znata“, rjekny Steffen Seidlich z twarskeho wotrjada Slepjanskeho zarjadniskeho zjednoćenstwa na posedźenju gmejnskeje rady. Po jeho słowach je naprawa nuznje trěbna, dokelž maja na wonym terenje stare wobćežma kaž woclowy beton, asbest a wolij.
„Pingufant za Pawla“ wušoł
Budyšin. Znaty ilustrator Thomas Binder je za dźěći znowa fantastisku powědku spisał a k tomu lóštne barbne ilustracije stworił. Jeho kniha „Pingufant za Pawla“, za dźěći wot 6 lět, je nětko w Ludowym nakładnistwje Domowina wušła. Lektor LND Michał Nuk bě stawiznu přełožił. Thomas Binder ma tež mjez Serbami dobre mjeno.
Sakska chce kruće zakročić
Drježdźany. Po wospjetnych randalach w Lipsku chce Sakska přećiwo ekscesam namocy pozdatnych lěwicarskich ekstremistow w měsće kruće zakročić. To je nutřkowny minister Markus Ulbig (CDU) dźensa w krajnym sejmje připowědźił. Jako posledni rěčnik emocionalneje debaty warnowaše wón před zrelatiwizowanjom njeskutkow runje tak kaž před přechwatanymi reakcijemi na nje.
Tuńšo parkować a kofej pić
Bukecy. W nocy na wčerawšu wutoru, krótko po połnocy, zadobychu so njeznaći do wobchoda na Bukečanskej Diesterwegowej. Tam pokradnychu motorsku piłu w hódnoće něhdźe 500 eurow. Dobre štyri hodźiny pozdźišo wuhlada policajski zastojnik oranžobarbnu motorsku piłu w přirowje na kromje Jenkec. Kaž so wukopa, jednaše so wo mjenowanu pokradnjenu mašinu. Čehodla ju paduch hižo měć nochcyše, njeje znate.
Njeswačidło (ML/SN). Něhdźe 250 zajimcow wobhlada sej minjeny kónc tydźenja w Njeswačanskim domizniskim muzeju wustajeńcu wo wojowanjach před 70 lětami we a wokoło wsy. Nawoda muzeja Arnd Lehmann bě zajimawu přehladku wo surowych podawkach kónc apryla a spočatk meje 1945 zestajał. Tehdy howrješe tule krawna bitwa mjez pólskimi a sowjetskimi wojakami a jich nadběhowaceje SSowskeje tankoweje diwizije „Großdeutschland“ a diwizije tankowych grenaděrow „Brandenburg“. W běhu 13 dnjow je fronta w Njeswačidle šěsć króć měnjała a tři štwórćiny domow a cyłe srjedźišćo wsy dospołnje zničiła.
Zaměstnjenje bjezdomnych je winowatostny nadawk komunow. 170 000 eurow město Budyšin za to lětnje wudawa. Nuzowe přenocowanja pak su nětko dróše.
Budyšin (CK/SN). Jedna třećina nuzoweho kwartěra za bjezdomnych ludźi na Budyskej Wonkownej Lawskej 23 je wućežena. Zarjadnišćo ma kapacitu dwanaće łoži. W nadawku města stara so towarstwo Móst wo wobhospodarjenje domu. K zarunanju wobhospodarjenskich kóštow je měšćanska rada nětko projektowe spěchowanje 130 000 eurow přizwoliła. Z pjenjezami financuja wěcne kóšty a personalne wudawki za třoch sobudźěłaćerjow dohlada.