W LIPje žony zaso sportuja
Chcedźa dróhu dale wjesć
Budyski wokrjes stara so wo trěbne planowanje
Hamor (AK/SN). Sprjewina dróha je najwažniši zwisk mjez Budyšinom, Hamorom a Slepom. Wokrjesnu dróhu K 8481/ K 9281 su wot apryla w třoch twarskich wotrězkach wot wotbočki do Sprjowjow hač k wotbočce na statnu dróhu S 130 do Mułkec saněrowali. Zhorjelski wokrjes jako zamołwity nošer K 8481 je dróhu sporjadkować dał. Budyski wokrjes jako zamołwity za K 9281 planuje – započinajo w Mułkecach – dalewjedźenje Sprjewineje dróhi do směra na Čornu Pumpu.
Hižo nětko za jutry wušiwali
Předstawy wo tym, kak maš křižerske sekle wušiwać, su dosć wšelakore. Zašły pjatk a sobotu su sej žony na dźěłarničce wuwědomili, zo słuša k tomu wjace hač jeničce wušiwanje.
Chrósćicy (SN/MiR). Projektowa koordinatorka Domowiny Rejzka Krügerowa witaše pjatk popołdnju na zetkanju w sydarni Chróšćanskeho gmejnskeho zarjada šěsć žonow, kotrež přinjesechu jara wšelake wuměnjenja nastupajo wušiwanje sobu. Někotre běchu hižo wušiwali, tamne scyła hišće nic. Tež we woblěkanju serbskeje narodneje drasty, hač swjedźenskeje abo družčeje, běchu někotre hižo nazhonite. Što nětko wabješe k tomu, so na kursu pod hesłom „Wušiwamy a wjazamy křižersku seklu“, kotryž bě Spěchowanski kruh za serbsku ludowu kulturu zarjadował, wobdźělić? Na jednym boku chcychu žony swojemu mandźelskemu abo synej spřihotować seklu za křižerskeho konja. Druhe zaso zajimowachu so za wšelake techniki wušiwanja.
Swoju wěru z hudźbu swjećić
Na młodźinski mision wusměrjene towarstwo Iniciatiwa wuchodny wětr 3000 – Wuhotowanje přichoda přez kulturu a zetkawanje zarjaduje třeći raz Gig-festiwal. Skrótšenka woznamjenja „God is good (Bóh je dobry)“ a pokazuje na to, zo jedna so wo „katolski hudźbny festiwal“, z kotrymž chcedźa „předewšěm młodźinje radosć a rjanosć wěry sposrědkować“.
Struppen/Róžant (SN/bn). Kaž w minjenych lětach wotměja festiwal na wjacorych putniskich městnach Němskeje. Spočatk julija stej to mjez druhim Siegen w Sewjerorynsko-Westfalskej a Marienfried w Bayerskej. Po lońšej přestawce smědźa so tež wšitcy łužiscy fanojo festiwala na nawrót tohole duchowneho hudźbneho swjedźenja pod hołym njebjom wjeselić. Sobotu, 10. julija, chcedźa mjezynarodni wuměłcy zhromadnje z wopytowarjemi hesło „Swjeć swoju wěru“ na łuce Róžeńčanskeje putniskeje cyrkwje zeskutkownić. Hinak hač w minjenych lětach pak njewotměja jón – znajmjeńša po nětčišim stawje – cyły kónc tydźenja, ale jenož jenički dźeń.
Krótkopowěsće (23.06.21)
Na roli zwjetša žito rosće
Drježdźany. Na wjace hač połojcy sakskeje role plahuja žito, byrnjež jeho podźěl woteběrał. Žito inkluziwnje kukuricy rosće w swobodnym staće lětsa na 371 000 hektarach, štož je 4 600 hektarow mjenje hač loni, kaž Kamjenski statistiski krajny zarjad informuje. Daty złožuja so na naprašowanje mjez 630 ratarskimi zawodami w aprylu. Najwažniša plahowana žitna družina je pšeńca, slědujetej ječmjeń a rožka.
Jednotliwe nowe natyknjenja
Budyšin/Zhorjelc. W Budyskim wokrjesu su wčera wo štyrjoch dalšich natyknjenjach z koronawirusom informowali. 79lětna pacientka je w tym zwisku zemrěła, tak zo powjetši so ličba smjertnych padow na 934. Incidenca tu wučinja po Roberta Kochowym instituće dźensa 3,0. Zhorjelski wokrjes je wčera tři nowoinfekcije wozjewił. Incidenca po RKI je tam dźensa 4,7
Njewjesty su dźeń a starše
Policija (22.06.21)
Pod wliwom drogow jěł
Wojerecy. Hnydom wjackrótnu přičinu mějachu zastojnicy policije, mužej njeprawe postupowanje porokować. Njedźelu rano by 37lětny we Wojerecach ze swojim bydlenskim mobilom nimale do policajskeho awta zajěł. Z Budyskeje aleje přijěwši njebě wón předjězbu na křižowa- nišću Grodkowska šoseja wobkedźbował. Kaž zastojnicy zwěsćichu, steješe šofer pod wliwom drogow, test na alkohol pokaza 0,3 promile a muž bě bjez jězbneje dowolnosće po puću. Wodźerja caravana dowjeze policija na to k wotewzaću kreje, wotewza jemu awtowy klučik a přizjewi jeho wohroženja wobchada a wodźenja wozydła bjez jězbneje dowolnosće dla.
Socialne poradźowanje
Wobydlerjo z dźěłom gmejny njespokojom
Njebjelčicy (SN/JaW). Wjacori wobydlerjo Njebjelčanskeje gmejny su njespokojom z dźěłom komuny. To wujewi zašłe wuradźowanje tamnišeje gmejnskeje rady minjeny štwórtk. Tak nječujetaj so na přikład Kralec mandźelskaj ze Serbskich Pazlic chutnje branaj. „Hižo wot 19. junija 2019, potajkim dwě lěće, čakamoj na wotmołwu nastupajo próstwu wo twar pódlanskeho domu“, porokowaše Jana Kralowa. Nimo rozestajenjow nastupajo jich ležownosć a terminow, na kotrež Kralec mandźelskaj njeběštaj, kaž měnitaj, prawje přeprošenaj, kaž tež zdźěłanje fotow wo jich ležownosći, wo čimž ani informowanaj njeběštaj, njeje so dotal ničo wulce stało. „Smój njespokojom a čujemoj so njesłyšanaj“, Kralowa zwurazni.
Na Wotrowske hrodźišćo pućowali
Wobydlerstwo zaso přiběra
Budyšin (SN/MiR). Najebać koronu je Budyske hospodarstwo dale stabilne. Nimo toho je trend spóznajomny, wulkoswójbu wutworić.
W Budyšinje bydleše lětsa 31. měrca 38 467 ludźi, 18 647 muskich a 19 820 žónskich. Podźěl wukrajnikow wučinja tudy 4,4 procenty. Byrnjež loni w měrcu 421 ludźi wjac swoje hłowne bydlenje w sprjewinym měsće měło, njeje prognoza nětčišeho prěnjeho kwartala scyła tak špatna. Wšako bě tu 35 wjace přićahow hač wotchadow. Předewšěm su to swójby z dźěćimi pod 18 lětami, kotrež město wopušćeja a sej we wjesnym rumje bydlenje pytaja.
Hladajo na hospodarske wuwiće je město dale atraktiwne. Registrowali su w prěnim kwartalu 69 přizjewjenjow za wutworjenje přemysła porno 54 wotzjewjenjam. Přirunujo z minjenym lětom wučinja to 0,5 procentow rozrosta. Kwota bjezdźěłnosće je so wot 7,8 na 9,3 procenty snadnje zwyšiła.
