Wo zastanišću diskutowali
Slepjanska gmejna prócuje so wo ležownosć na dobro pućowacych
Slepo (AK/SN). Zaměrowy zwjazk Hornja Łužica-Delnja Šleska (ZVON) chce wobchadne nawjazanje na Braniborsku polěpšić. Tak su namjetowali w Slepom wutworić małe busowe zastanišćo blisko dwórnišća, na kotrymž su štyri přistupy do busa. Potom móhli wužiwarjo přichodnje lěpje ze železnicy do busa a nawopak přelězć. Hotowy być měł poskitk składnostnje změny jězbneho plana w lěće 2023. ZVON chce naprawu po 90 procentach spěchować. Trěbne podłožki, wobsahowace wobličenje kóštow za próstwu wo spěchowanske srědki, nastupajo zwottorhanje starych twarjenjow je zaměrowy zwjazk 28. meje zapodał.
Woprawnjena kritika
Wjesna rada w Delnjej Kinje je so wospjet z naležnosćemi zaběrać dyrbjała, kotrež dyrbjachu hižo dlěje zrjadowane być. Swoju njespokojnosć su wobydlerjo na posedźenju rady wutoru wječor w Budyskej sukelnicy zwuraznili.
„Budyšin so pisani“, rěka we woblubowanym serbskim spěwje. ...
Na terasy Choćebuskeho planetarija su so wčera popołdnju zajimcy ...
Krótkopowěsće (11.06.21)
Lochce stupace hódnoty
Budyšin/Zhorjelc. 17 dalšich natyknjenjow su hač do wčerawšeho w Budyskim wokrjesu zwěsćili. Z nich bě šěsć dodatnje podatych. Dwě wosobje stej zemrěłoj. W Zhorjelskim wokrjesu mějachu wčera šěsć nowoinfekcijow a dweju zemrěteju. Incidenca we woběmaj wokrjesomaj zaso lochce stupa. Roberta Kochowy institut poda za Budyski hódnotu 22,7 a za Zhorjelski 8,7.
Wostrowčenjo wuznamjenjeni
Bonn. Němska biskopska konferenca je iniciatiwu „Měrowy swjedźeń Wostrowc“ z hłownym Katolskim mytom přećiwo ksenofobiji wuznamjeniła. Wostrowčenjo běchu so prawicarjam, w městačku so schadźowacym, mjez druhim na te wašnje spjećowali, zo wobchodam wokoliny wšo piwo wotkupichu, a prawicarjo takrjec na suchim sedźachu.
Zabyty architekt znowa wotkryty
Woli wobydlerstwa měli wotpowědować
Iniciatiwa „Hórnikečanski jězor bjez prudźenja – Žadyn škričkowanski sćežor w Mučowje“ dale wojuje
Smědźa w Mučowje sćežor za mobilne škričkowanje z 5G-techniku na komunalnej ležownosći při starym sportnišću natwarić? Měli wobzamknjenje Kulowskeje měšćanskeje rady wo postajenju sćežora cofnyć? Wo tym mějachu wobydlerjo města Kulowa a jemu přisłušacych wsow 9. meje we wobłuku wobydlerskeho rozsuda wothłosować. Wo předstawiznach wobydlerskeho rozsuda, jeho wobsahu a hódnoćenju je so Andreas Kirschke z rěčnicu wobydlerskeje iniciatiwy „Hórnikečanski jězor bjez prudźenja – Žadyn škričkowanski sćežor w Mučowje“ Corinu Watky z Mučowa rozmołwjał.
Knjeni Watky, kajke předstawizny je wobydlerski rozsud měł?
Stejišćo k wobydlerskemu rozudej:
Interview z rěčnicu wobydlerskeje iniciatiwy „Hórnikečanski jězor bjez prudźenja – Žadyn škričkowanski sćežor w Mučowje“ Corinu Watky wobsahuje wšelake woznamjenjenske cyfry w zwisku z wopisanjom wuslědka wobydlerskeho rozsuda z 9. meje, kotrež pak njejsu ze sobu přirunajomne. Tohodla je wólbny wuběrk města Kulowa k tomu slědowace stejišćo wozjewił:
Policija (10.06.21)
Polo w płomjenjach stało
Wojerecy. Wčera popołdnju wokoło dwěmaj dyrbješe wohnjowa wobora z Wojerec woheń na polu při Kamjenskim wobłuku hašeć. Tam je něhdźe 400 kwadratnych metrow role w płomjenjach stało. Spěšne zapřimnjenje wobornikow jich rozpřestrěću na zbožo zadźěwa. Kak bě k wohenjej dóšło, njeje dotal jasne. Policija přepytuje zapalerstwa dla.
Awto so paliło
Póckowy. Tež w Póckowach je so wčera paliło. Hižo rano napoł dwěmaj dyrbjachu dobrowólni wohnjowi wobornicy z Póckowow, Smělnje a Wjazońcy kaž tež z Biskopic pod carportom palace so wosobowe awto marki Seat hašeć. Kameradojo zamóchu woheń spěšnje zhašeć. Awto njehodźi so hižo wužiwać, tež carport dyrbja zwottorhać. Policisća wuchadźeja z toho, zo bu woheń wotpohladnje zamiškrjeny.
Wupisaja myta
Budyšin. Maćica Serbska wupisa lětsa wospjet tři dorostowe myta na polu rěče, literatury, stawiznow, kulturneho slědźenja a wuměłstwa Serbow. To zdźěli předsydka Maćicy dr. Anja Pohončowa. Su to Myto Michała Hórnika za šulerjow a šulerki hornjołužiskich gymnazijow, Myto Bogumiła Šwjele za šulerjow a šulerki delnjołužiskich gymnazijow a Myto Arnošta Muki za studentow a studentki kaž tež za absolwentow a absolwentki wysokeje šule abo uniwersity w prěnim lěće po zakónčenju studija. Zajimcy móža so pod nadrobnišo wobhonić.
Čitarjo so wubědźuja
