Budyšin (SN/JaW). Strowotniski zarjad wokrjesa Budyšin wot štwórtka, 21. januara, wobydlerjam poskići ze spěšnotestom na koronu so přepytować dać. Darmotny test přewjedu potom po štwórtkach w času wot 13 do 16 hodź., zdźěli wčera krajnoradny zarjad w Budyšinje. Terminy dojednać móža sej zajimcy online pod https://www.terminland.de/lra-bautzen/online/Schnelltest_Buerger.
Testy přewjedu we wotnožce strowotniskeho zarjada na Tuchorskej 23 w Budyšinje. „Maksimalnje móžemy 75 testow wob dźeń přewjesć, tohodla je trjeba sej termin rezerwować“, zamołwići informuja. Wuslědki přepytowanym na městnje zdźěla. Na darmotny test dyrbja sej zajimcy nimo personalneho tež šćěpjenski wupokaz a chipowu kartku chorobneje kasy sobu přinjesć. Ludźo, kotřiž su korony dla abo jako kontaktowa wosoba w karantenje, so na tesće wobdźělić njesmědźa, jich strowotniski zarjad dale na test přeproša.
Šule dźělnje wotewrjene
Drježdźany. Po štyritydźenskej přestawce su dźensa wjele šulow w Sakskej za zakónčace rjadownje zaso wotewrěli. Nimale 50 800 holcow a hólcow tam nětko w dźělenych rjadownjach wuwučuja, zo móhli so lěpje na kónčne pruwowanja přihotować. Dźěłarnistwo GEW a wučerski zwjazk matej dźělne wotewrjenje kubłanišćow dale wulkich infekciskich ličbow korony dla za přezažne.
Wšitko zaso po planje
Zhorjelc. Mjezy přesahowacy železniski zwisk mjez Sakskej a Pólskej wot dźensnišeho zaso po planje běži, zdźěli Krajna železnica. Jeje Trilex-ćahi jězdźa nětko mjez Zhorjelcom a Zgorzelecom a tak tež zaso z pólskeho města do Drježdźan startuja. Kónc decembra bě pólske wojewódstwo Delnja Šleska mjezy přesahowace zwiski koronapandemije dla zakazało.
Ptači kwas online
Njewšědne postupowanje
Huska. Mjez Mjedźojzom (Medewitz) a Huskej (Gaußig) je so wčera popołdnju wobchadne njezbožo stało. Opel Astra suny so na hładkej dróze z jězdnje a zrazy na prawym boku dróhi do štoma. Šofer pak jědźeše z wobškodźenym awtom dale hač na parkowanišćo w Husce. Hakle tam zawoła wuchowansku słužbu, wohnjowu woboru kaž tež policiju. Po prěnich informacijach su so tři wosoby při njezbožu zranili, kak ćežko, dotal znate njeje. Awto je po zdaću dospołnje skóncowane. Sobujěduceho bě štom wotboka trjechił.
Budyšin (CS/SN). Financny wuběrk Budyskeje měšćanskeje rady diskutuje tuchwilu wo tym, koordinaciske a fachowe městno partnerstwa za demokratiju (KuF) dale wjesć abo nic. Tele fachowe městno ma swoje sydło w Budyskim Kamjentnym domje. Dotal bě rěč wo 50 000 eurach za personalne kóšty a 10 000 eurach za zjawnostne dźěło. Runje tele dźěło běše přewodźacy wuběrk města Budyšina při ewaluaciji skutkowanja KuF jako polěpšenjahódne posudźował. Hewak pak maja čłonojo wuběrka skutkowanje KuF za přewažnje spomóžne.
Korony dla njebě móžno wšitke planowane projekty zwoprawdźić, mjez druhim njejsu konferencu wo demokratiji přewjesć móhli. Tak so njedawno na wuradźowanju financneho wuběrka prašachu, hač njejsu pjenjezy z lěta 2020 zbyli. „Njewužiwane pjenjezy dyrbimy Zwjazkej wróćić“, rjekny Budyski měšćanosta za financy, porjadk, kubłanje a socialne dr. Robert Böhmer. Wotličenje za lěto 2020 pak dotal hišće njepředleži. Spěchowanske srědki njemóhli tež na hinaše wašnje wužiwać, dokelž su eksaktnje za mjenowany wotmysł přewostajene.
Budyšin. Tuchwilna zymička wabi won do přirody. Wšako su dźěći doma a trjebaja zabawu. Prawy to čas, sej zaběru wonka pytać. Chcemy tuž fota wo wašich dožiwjenjach při zabawje w sněze wozjewić. Snadź je tež bórze móžno na lodźe so smykać abo lodohokej hrać. Sćelće nam swoje wobrazy z mejlku na redaktion@serbske-nowiny. de a přidajće k tomu krótku informaciju, što sće dožiwili. My motiwy rady wozjewimy.
BTU z online-poskitkom
Zły Komorow/Choćebuz. Na Braniborskej techniskej uniwersiće wotmě so wčera dźeń digitalneje orientacije. Wysokošulskemu kubłanišću poboku bě Braniborska syć za studijnu orientaciju. Termin na kubłanišću bě wysokošulskemu dnjej w Sakskej přiměrjeny. Přetož w Złym Komorowje kaž tež w Choćebuzu wobstajnje tež wulka ličba zajimcow ze Sakskeje studuje.
Incidenca snadnje woteběra
Budyšin. 146 dalšich natyknjenjow z koronawirusom su wčera w Budyskim wokrjesu zwěsćili. Dalšich pjeć pacientow w starobje 69 do 84 lět je zemrěło. Tudyša incidenca wučinješe 352,33. W chorownjach wokrjesa lěkuja 179 koronapacientow, z nich 32 na intensiwnej staciji. W Zhorjelskim wokrjesu mějachu wčera 134 nowoinfekcijow a 30 smjertnych padow. Incidenca tam bě 310,22.
Pišćelowe lěto zahajene
Freiberg. Ze swjatočnym, online přistupnym koncertom bu wčera na narodninach najwuznamnišeho twarca „kralowny instrumentow“ baroka Gottfrieda Silbermanna Pišćelowe lěto 2021 w Freibergskej tachantskej cyrkwi zahajene. Hač do kónca lěta budu renoměrowani organisća po cyłej Němskej hudźić. Něhdźe 80 zarjadowanjow planuja w Sakskej, mjez druhim w Chróstawje.
Nowy Fabia-kombi wobkrućeny
Šofer nětko pěšk
Budyšin. Na Wojerowskej dróze w Budyšinje je tempo 50 km/h dowolene. Měrjerjo spěšnosće su tam wutoru pjeć hodźin dołho wobchad kontrolowali. Z něhdźe 1 540 jězdźidłow bě 77 přespěšnje po puću. 67 šoferam wuprajichu zastojnicy porok, dźesaćo dyrbja z pjenježnej pokutu ličić. Wodźer Škody z Budyskej značku bě z 98 km/h najspěšniši. Wón budźe přichodny čas směć pěši po puću być.
Nakładne awto z puća zjěło
Nadźanecy. Wutoru wječor je nakładne awto, kotrež bě na zwjazkowej dróze B 156 w Budyskim měšćanskim dźělu Nadźanecy po puću, z jězdnje zjěło. W křiwicy dolěwa suny so Lkw na prawy bok puća a přejědźe wjacore nabóčne planki a štomy. Na skłoninje zwróći so nabok. Čěski šofer so njezrani, nastała pak je wulka wěcna škoda něhdźe 50 000 eurow. Wohnjowa wobora dyrbješe wobškodźene štomy podrězać. Nakładne awto bu wotwlečene.
Paduši wuspěšni byli