Hospodarski plan 2021 steješe w srjedźišću wuradźowanja zhromadźizny zaměroweho wopłóčkoweho zwjazka Při Klóšterskej wodźe předwčerawšim w Chróšćanskej „Jednoće“.

Chrósćicy/Pančicy-Kukow (AK/SN). Zaměrowy zwjazk za wopłóčki Při Klóšterskej wodźe (AZV) chce klětu 200 000 eurow do twarskich naprawow inwestować. Ćežišćo budźe, nowotwarsku štwórć Při Srjedźnym puću w Pančicach-Kukowje wopłóčkowej syći přizamknyć. Za to předwidźi AZV 150 000 eurow. Dale na­łoži 50 000 eurow za nowe domowe přizamknjenja a za techniku. Tak steji to w hospodarskim planje 2021, kotryž je wjetšina zhromadźizny zaměroweho zwjazka předwčerawšim, wutoru, wobzamknyła. Porchow, Worklecy a Pančicy-Kukow přihłosowachu, Chrósćicy a Ralbicy-Róžant plan wotpokazachu. Pandemije dla njewotmě so posedźenje kaž hewak na Porchowskim gmejnskim zarjedźe, ale w Chróšćanskej „Jednoće“.

Druhdy so woprawdźe prašeš, w kotrym času a kraju smy tu žiwi. Hdyž wjele lět wšědnu rozprawu policije za lokalnu stronu Serbskich Nowin wobdźěłuješ, sy zawěrno něštožkuli zwučeny. Ale zo so ně­chtó z taksijom do Róžanta dowjezć da, w tamnišej swjatnicy swjaty křiž a dalše sakralne wěcy kradnje, dale do Budyšina jědźe a tam potom tež hišće taksijowu zličbowanku njezapłaći, wo tajkim padźe ja hišće słyšał njejsym. Derje, zo bě taksijowy šofer chrobły dosć, a ze skućićelemi hnydom dale na policajski rewěr jědźeše. Štož zda so kusk k smějkotanju a zadźiwanju, je wšo druhe hač to. Hdyž paduši z Róžeńčanskeje cyrkwje něšto sobu bjeru, wšojedne kak wulka ryzy wěcna škoda je, ranja woni nabožne začuća serbskich katolskich wěriwych, kotrymž je Róžant nabožna domizna, často tež wućek a nic na kóncu cil putnikowanja. Mam pak wulke dwěle, hač to hdy při sudniskim posudźowanju tohole padu wobkedźbuja, jeli scyła k tomu dóńdźe. Marian Wjeńka

Při spjatym jězoru chce město Budyšin zjawny nuznik natwarić. Hač dyrbiš ­potom tež płaćić, hdyž jón wužiwaš, wo tym njejsu w měšćanskim zarjadnistwje hišće dorozmyslowali.

Budyšin (CS/SN). Budyscy měšćanscy radźićeljo su so na swojim wčerawšim posedźenju k tomu wuznali, při spjatym jězoru zjawny nuznik zarjadować. Njepře­zjedni pak běchu sej radźićeljo w tym, hač měli do wobzamknjenja wo wupłaćenju sumy 100 000 eurow přidatnje k planej wopřijeće „płaćomne“ sobu přiwzać. Frakcija AfD bě so za to wuprajiła, njeje pak so ze swojim namjetom přesadźiła. Tón bu z dźewjeć napřećiwnymi hłosami wotpokazany. Zarjadnistwo pak podpěruje, zo wuhotuja nuznik ze zapłaćenskim systemom. Kaž wyši měšćanosta Alexander Ahrens (SPD) rjekny, njemóža so hižo z ryzy ekonomiskeje nuzy přidatnych dochodow wzdać. Z přidawkom „płaćomne“ w předłoze za wobzamknjenje pak bychu swójske móžnosće jednanja spušćili. Tohodla bu před­łoha bjez přidawka ze 17 haj-hłosami a dźesać hłosawzdaćemi schwalena.

Zwjazk „Wojerecy pomhaja z wutrobu“ kritizuje tuchwilne połoženje w tamnišich azylowych přebywarnjach.

Wojerecy (AK/SN). Wot druheje korona-žołmy su we Wojerecach zhromadne přebywarnje za ćěkancow jara potrjechene. „Wobydlerjow stigmatizuja jako potencielnje inficěrowanych. Wuzamkowanje z kubłanja a socialneho žiwjenja je dźěćom wjetše poćežowanje hač zbytkej wobydlerstwa“, pisa rěčnik zwjazka „Wojerecy pomhaja z wutrobu“, farar Jörg Michel, w zjawnym lisće Budyskemu wokrjesnemu zarjadej za wukrajnikow.