Natwarja zjawny nuznik při jězoru
Při spjatym jězoru chce město Budyšin zjawny nuznik natwarić. Hač dyrbiš potom tež płaćić, hdyž jón wužiwaš, wo tym njejsu w měšćanskim zarjadnistwje hišće dorozmyslowali.
Budyšin (CS/SN). Budyscy měšćanscy radźićeljo su so na swojim wčerawšim posedźenju k tomu wuznali, při spjatym jězoru zjawny nuznik zarjadować. Njepřezjedni pak běchu sej radźićeljo w tym, hač měli do wobzamknjenja wo wupłaćenju sumy 100 000 eurow přidatnje k planej wopřijeće „płaćomne“ sobu přiwzać. Frakcija AfD bě so za to wuprajiła, njeje pak so ze swojim namjetom přesadźiła. Tón bu z dźewjeć napřećiwnymi hłosami wotpokazany. Zarjadnistwo pak podpěruje, zo wuhotuja nuznik ze zapłaćenskim systemom. Kaž wyši měšćanosta Alexander Ahrens (SPD) rjekny, njemóža so hižo z ryzy ekonomiskeje nuzy přidatnych dochodow wzdać. Z přidawkom „płaćomne“ w předłoze za wobzamknjenje pak bychu swójske móžnosće jednanja spušćili. Tohodla bu předłoha bjez přidawka ze 17 haj-hłosami a dźesać hłosawzdaćemi schwalena.
Rizika korony chutnje brać
Zwjazk „Wojerecy pomhaja z wutrobu“ kritizuje tuchwilne połoženje w tamnišich azylowych přebywarnjach.
Wojerecy (AK/SN). Wot druheje korona-žołmy su we Wojerecach zhromadne přebywarnje za ćěkancow jara potrjechene. „Wobydlerjow stigmatizuja jako potencielnje inficěrowanych. Wuzamkowanje z kubłanja a socialneho žiwjenja je dźěćom wjetše poćežowanje hač zbytkej wobydlerstwa“, pisa rěčnik zwjazka „Wojerecy pomhaja z wutrobu“, farar Jörg Michel, w zjawnym lisće Budyskemu wokrjesnemu zarjadej za wukrajnikow.
Krótkopowěsće (17.12.20)
Wjace pjenjez serbskej załožbje
Podstupim. Klětuši etat kraja Braniborskeje 2021 předwidźi jako přiražka k financowanju Załožby za serbski lud z 3 897 500 eurami 706 500 eurow wjace hač lětsa. K tomu přińdu srědki za zhromadne dźěło ze Sakskej při wu- a dalekubłanju serbskich wučerjow a sorabistow kaž tež za zeskutkownjenje krajneho plana k sylnjenju delnjoserbšćiny.
Natyknjenja njepopušćeja
Budyšin. Strowotniski zarjad rozprawješe wčera za Budyski wokrjes wo dalšich 461 natyknjenjach z koronu a wo sydom w tym zwisku zemrětych. Wot 3 141 pacientow (+261) lěkuja 195 (+23) w chorowni. Najbóle potrjechenej serbskej gmejnje su Worklecy a Pančicy-Kukow ze 17 padami na tysac wobydlerjow. W Zhorjelskim wokrjesu bě wčera 476 nowoinfekcijow. Incidenca je tam 701,16; w Budyskim wokrjesu 681.
Dawkowe polěpšenja zbrašenym
Historiske dokumenty města restawrowane
Budyšin (SN/MWj). Wulke wjeselo knježeše tele dny w archiwnym zwjazku Budyšina na Hrodowskej. Někotre wosebje ćežko wobškodźene historiske protokole sprjewineho města maja po restawrowanju přez Lipšćansku specialnu firmu zaso swoje městno w magacinje.
Do wobstatka radnych protokolow słuša 257 zwjazkow, kotrež wotbłyšćuja skutkowanje Budyskeje měšćanskeje rady wot lěta 1623 hač do 1832, jako bu powšitkowne zarjadnistwo wutworjene, rěka w nowinskim zdźělenju radnicy. Měšćanska rada wobsteješe wjele lětstotkow z kruha zamóžitych wobydlerjow, kotřiž sej zastojnstwo měšćanosty kóždolětnje dale dawachu. Bě-li něchtó z nich schorjeł abo zemrěł, buchu mužojo z druhich swójbow přez čłonow rady do gremija powołani. Zwjetša wukonjachu woni swoje zastojnstwo nimo powołanja a so tohodla jónu abo dwójce wob tydźeń w radnicy zetkachu, rěčo tam wo wažnych naležnosćach.
Policija (16.12.20)
Z trašawku hrozył
Łaz. Na zjawnym puću we Łazu je so předwčerawšim popołdnju 68lětny muž z trašawku na kolesowarja měrił. 38lětny bě do toho rentnarja přesćahnył, na čož tón jemu wupřestrěty srjedźny porst pokaza. Kolesowar na to zasta, zo móhł z mužom rěčeć. Tón pak jemu wudma nadawaše a skónčnje swoju trašawku na njeho měrješe. Policija pozdźišo podhladneho wuslědźi a při nim nabitu bróń. Za nju drje měješe rentnar dowolnosć, přiwšěm njesmě ju w zjawnosći při sebi měć. Policisća pistolu, municiju a dowolnosć sćazachu. Za 68lětneho změje to juristiske konsekwency.
Radźićeljo so zetkaja
Njebjelčicy. Přichodne posedźenje Njebjelčanskeje gmejnskeje rady wotměje so jutře, štwórtk, w 19.30 hodź. w sydarni gmejny při Njebjelčanskim sportnišću. Na dnjowym porjedźe stejitej mjez druhim předań wjaceswójbneho domu a zrěčenje wo wurunanskich naprawach za nastajenje škričkowanskeho sćežora.
Ralbicy. Tohorunja jutre, 17. decembra, ale hižo we 18 hodź. zeńdu so radźićeljo gmejny Ralbicy-Róžant, a to w Ralbičanskej šuli
Planuja přitwar k šuli
Nadawkaj za nowu digitalnu syć w kubłanišćomaj přepodali
Worklecy (JK/SN). Koronapandemija je jasnje pokazała, hdźe su techniske njedostatki našeho kubłanskeho systema. Tež we Worklecach steja před wulkim nadawkom, zakładnu kaž tež wyšu šulu za přichodne, naročne a nowe formy digitalneho wuwučowanja wuhotować. Na wčerawšim poslednim lětušim posedźenju gmejnskeje rady połožichu za to zakłady. Planowanski běrow Lipič z Jaseńcy bě nadawk dóstał, nastajić plan za digitalnu syć we woběmaj kubłanišćomaj. A měješe so tež wo firmu starać, kotraž instalaciju přewjedźe. Plan steji, a Njebjelčanskej Šustrec elektrofirmje su wčera jednohłósnje nadawk přepodali. Wona přewozmje instalaciju digitalneje syće w zakładnej šuli a wobnowi we wyšej přidatnje elektrisku syć za cyłkownje 79 900 eurow. Z přihotami su hižo započeli, dokelž je šulske twarjenje prózdne a šulerjo doma wuknu. Přewažny dźěl dźěłow budźe klětu w zymskich prózdninach zwoprawdźeny.
Dwacety raz pyramidu natwarili
Čorny Chołmc (aha/SN). „Dajće so zakuzłać w Krabatowej wsy!“ Takle Čorny Chołmc internetnje za sebje wabi. Wjes z nimale 800 wobydlerjemi bu před 14 lětami do Wojerec zagmejnowana, přiwabliwa pak je hač do dźensnišeho. Wulke zasłužby na tym ma Gertrud Wincarjowa, kotraž swjećeše njedawno 80. narodniny. 17 lět bě wona tam Čornochołmčanska wjesnjanostka a po tym wjesna předstejićerka. Jeje najwjetša zasłužba drje je Krabatowy młyn. Ale tež druhdźe je swoje slědy zawostajiła. Hižo wot NDRskeho časa steješe wosrjedź wsy štyri metry šěroki metalowy swěčkowy wobłuk, pokazowacy w swojim wuhotowanju jónu na hórnistwo a dale na serbske stawizny holanskeje wsy, kotraž bu 1394 prěni raz pisomnje naspomnjena.
Klětu wola noweho měšćanostu
Kulow (AK/SN). Wobydlerjo města Kulowa a jědnaće wjesnych dźělow Brěžki, Dubrjenk, Hózk, Kulowc, Koćina, Mučow, Klóšterska Nowa Wjes, Rachlow, Salow, Sulšecy a Spale wola klětu noweho měšćanostu. Wólby maja so 9. meje wotměć. Móžny druhi wólbny přechod chcedźa tři tydźenje pozdźišo přewjesć, potajkim 30. meje. To je Kulowska měšćanska rada na swojim zašłym posedźenju wobzamknyła. Sydomlětna hamtska doba měšćanosty so potom skónči.
