Budyšin (SN/MiR). 55 angažowanych skupin młodostnych kaž tež towarstwow z Budyskeho wokrjesa chce so na lětušej 48hodźinskej akciji wobdźělić. Mjez poskitkami su někotre serbskich młodostnych. Přizjewili su so štyrjo zajimcy z wobłuka zarjadniskeho zwjazka Při Klóšterskej wodźe a z Kulowa. Regionalny běrow Rěčneho centruma WITAJ w Chrósćicach so wo nje stara. RCW słuša k nošerjam akcije za serbski sydlenski rum runje tak kaž Budyski Kamjentny dom za Budyšin a za region sewjerowuchodnje sprjewineho města.
Budyšin/Smochćicy (CS/SN). We wobłuku interkulturnych tydźenjow wokrjesa Budyšin bě wčerawša póndźela jako temowy dźeń Israelej wěnowana. Z prěnjeje ruki zhonichu hosćo na Budyskim krajnoradnym zarjedźe wo aktualnym połoženju w kraju. Žurnalist Igal Avidan rozprawješe wo tuchwilnym wuwiću w swojej domiznje. Wječor předstaji wón w Smochčanskim kubłanišću swj. Bena swoju knihu wo egyptowskim lěkarju Modu Helmyju, kiž bě w Berlinje židowsku holcu wuchował, zmóžnjejo jej přestup k islamskej wěrje a chowajo ju.
Społnomócnjena wokrjesa Budyšin za wukrajnikow Anna Piętak-Malinowska rozprawješe wo kubłanskej jězbje, kotraž bě ju do Israela wjedła. Kurt a Ellen Spengler běštaj w Betlehemskim domje „Lifegate“ 2019 při hladanju zbrašenych dźěći a młodostnych pomhałoj a powědaštaj wo swojich zaćišćach. Kaž wonaj rjeknyštaj, tam wrota k žiwjenju předewšěm muslimskim zbrašenym na dwoje wašnje wotwěraja: Sprěnja dóstawaja tele dźěći scyła přistup ke kubłanju, a zdruha je w zarjadnišću na žiwjenje přihotuja.
DGB: Žadyn socialny pasyk
Drježdźany. Přichodny etat Sakskeje nastupajo warnuje předsyda DGB Sakskeje Markus Schlimbach dźensa před socialnym pasykom (Kahlschlag) w swobodnym staće. „Runje w krizy dyrbiš do přichoda ludźi inwestować. Nětko w dźěłowičnej abo socialnej politice lutować je wopačny puć.“ Žadanje zwjazkow dźěłodawarjow, bóle lutować, Schlimbach wotpokazuje.
Nobelowe myto za medicinu
Stockholm. Lětuše Nobelowe myto za medicinu spožča biochemikarjej Michaelej Houghtonej (Wulka Britaniska) kaž tež wirologomaj Harveyjej J. Alterej a Charlesej M. Ricej (wobaj USA). To zdźěli wčera Karolinska-institut w Stockholmje. Mjenowani třo su wirus hepatitis-C wotkryli. Dźakowano jich slědźenjam je chorosć hepatitis C nětko lěkujomna.
Rigorozne naprawy korony dla
Šešow (SN). Christa Rienecker je zawěrno Šešowčanka, přetož wona je so woprawdźe we wsy na statoku swojeju staršeju narodźiła. Snano je to přičina, čehodla je jej bóle hač druhim zhromadnosć wobydlerjow wažna a zo so wona za nju wosebje zasadźa.
Hižo wjele lět podpěrowaše Rienecker Šešowski wjesny klub. Hdyž rěkaše organizować a přewjesć wjesne swjedźenje, chodojtypalenje abo adwentnički, bě wona z wjele idejemi a wulkim angažementom pódla. Wot toho časa, zo je sama wuměnkarka, organizuje zetkanja seniorow w Šešowje, zo by wjesnjanow časćišo do zhromadnosće wjedła. Tak wuhotuje wotměnjawe temowe popołdnja z rozdźělnymi hosćimi a wšelakimi přednoškami. Wuběr temow je mnohostronski a saha wot stroweho zežiwjenja přez kursy prěnjeje pomocy a policajsku prewenciju hač k pućowanskim rozprawam a hrajnym popołdnjam.
Předpisy tež na wodźe płaća
Lejno. Zo płaća wobchadne předpisy tež na wodźe, wě nětko 57lětny muž, kotrehož je policija sobotu na Lejnjanskim jězoru (Geierswalder See) kontrolowała. Wón bě tam ze sportowym čołmikom na wodźe po puću. Při kontroli policisća zwěsćichu, zo měješe muž wjace alkohola hač dowolene w kreji, mjenujcy 0,78 promilow. Na 57lětneho čaka nětko pokutne jednanje, dokelž njeje postajenja nutřkokrajneho łódźnistwa dodźeržał.
Budyšin. Nowu wustajeńcu wotewru štwórtk, 8. oktobra, we 18 hodź. w Budyskej Serbskej kulturnej informaciji. W njej pokazaja mólby, rysowanki a skulptury wuměłca Jörga Tauscha, kiž je za swoje wobrazy Krabata mjez druhim w Chorwatskej slědźił. Na wotewrjenju přehladki předstaji Kulowski genealoga Hans-Jürgen Schröter zajimawostki wo wosobje Janka Šajatovića (Krabata).
Karty w muzeju widźeć
Budyšin. Delenki, horjenki, krale a dalše historiske hrajne karty steja w srjedźišću noweje kabinetneje wustajeńcy, kotraž je wot předwčerawšeje soboty w Muzeju Budyšin widźeć. Eksponaty pochadźeja hłownje z 18. a 19. lětstotka, najstarše objekty samo ze 16. lětstotka. Wosebitosć přehladki su hrajne karty z prěnjeje połojcy 19. lětstotka, kotrež su w dotal njeznatej ćišćerni hrajnych kartow w Budyšinje nastali. Pokazka wostanje hač do 17. januara přistupna.
Běła Woda (AK/SN). Swoje komunalne hrajkanišća měło město Běła Woda w dalokej měrje zachować. Tomu wuzna so měšćanska rada na swojim zašłym posedźenju a tak zadźěwa, zo dwě hrajkanišći zawru, mjenujcy tej we wólnočasnym a w južnym parku. Měšćanske zarjadnistwo chcyše jej wotstronić, dokelž su nastroje dodźeržane a wobě městnje přemało wužiwanej, wšako ležitej na bjezposrědnjej kromje města. Dokelž su na tamnych hrajkanišćach zdźěla nowe krosnowanske a dalše nastroje natwarili, měni wyši měšćanosta Torsten Pötzsch (Klartext), zo je w Běłej-Wodźe dosć dalšich móžnosćow hrajkanja.
To wšak mjez druhim radźićelka Kathrin Jung (SPD) hinak widźi. Wona njedowidźi, zo měli dwě ze šěsć komunalnych hrajkanišćow zawrěć. „Dyrbimy so prašeć, što su nam hrajkanišća w měsće hódne a što smy zwólniwi za nje wudać?“, Jung argumentowaše.
Wo měrliwej rewoluciji 1989 a wo znowazjednoćenju Němskeje před 30 lětami swědči nětko w Kulowje wosebita wopomnjenska tafla. Při zachodźe do ewangelskeje cyrkwje su ju sobotu wotkryli.
Kulow (AK/SN). Na póndźelnych demonstracijach w Kulowje 1989 je tamniši pozawnowy chór stajnje Lutherowy kěrluš „Jed’n twjerdy hród je naš Bóh sam“ hudźił. Jeho prěnjej lince stejitej na wopomnjenskej tafli, kotruž staj měšćanosta Markus Posch (CDU) a předsyda měšćanskeho zwjazka CDU Mathias Kockert sobotu při zachodźe do Kulowskeje ewangelskeje cyrkwje wotkryłoj. Tajke pomniki pohnuwaja k dopominanju a budźitej pokojnosć a dźakownosć, rjekny farar Gabriš Nawka. Lutherowe linki su wuraz dźakownosće a našeje dowěry, z kotrejž optimistisce do přichoda hladamy, zwurazni Mathias Kockert.