Wědomostne naprašowanje
Budyšin. Za wuhódnoćenje koronapandemije w Budyskim wokrjesu startuje tudyši krajnoradny zarjad tele dny wědomostne naprašowanje. Hromadźe z Drježdźanskej techniskej uniwersitu wuwity naprašnik pósćele strowotniski zarjad nimale tysac wobydlerjam, kotřiž běchu na koronu schorjeni abo stejachu jako kontaktna wosoba pod karantenu.
Towaršnostne mocy zapřijeć
Podstupim/Choćebuz. Krajny sejm Braniborskeje je wčera z wulkej wjetšinu wobzamknył, ciwilnu towaršnosć lěpje na strukturnej změnje we łužiskim brunicowym rewěrje wobdźěleć. Choćebuska wobswětowa skupina Zeleneje ligi pomina, zo měli w přiradźe, kotruž chcedźa nětko wutworić, cyrkwje, dźěłarnistwa, wobswětowe zwjazki, serbska mjeńšina, iniciatiwy nawrótnikow a zwjazkarstwo Wobydlerski region Łužica zastupjene być.
Statuwu guruwa wotstronja
1. septembra 2020 zahaji so tež we Wojerowskim klinikumje łužiska jězorowa krajina nowe wukubłanske lěto za hladarjow. Birgit Wolthusen je w chorowni hladanska direktorka. 35 lět bě tam hladansku słužbu na wšelakich stacijach wukonjała, tři a poł lěta pak hižo hladanski wobłuk nawjeduje.
Wobšudźić so njedał
Bischheim. Z přilubjenjom, zo je wjacore tysac eurow dobył, chcychu njeznaći předwčerawšim 79lětneho muža w Bischheimje w gmejnje Haselbachtal wobšudźić. Skućićeljo rentnarjej při telefonje rjeknychu, zo měł wón w kupnicy tak mjenowane steam-karty w hódnoće 500 eurow kupić a pozdźišo w dalšim telefonaće wotpowědne čisła podać, zo móhł wupłaćenje dobyća wotzamknyć. Rentnar to wotpokaza a zazwoni policiju.
Budyšin. Štwórtk, 27. awgusta, přeprosy wokrjesny radźićel Lěwicy, prawiznik Hajko Kozel, na darmotne socialne poradźowanje do Njebjelčic. Zhromadnje z prawiznikom Gregorom Janikom, kiž je w socialnym prawje wosebje wobhonjeny, móže wón pomoc skićić při rozrisanju problemow, kotrež so husto w socialnych prašenjach jewja. Poradźowanje budźe wot 14 do 16 hodź. w rumnosćach Njebjelčanskeho gmejnskeho zarjadnistwa. Zajimcy njech sej pod telefonowym čisłom 0 35 91 / 49 09 76 termin dorěča.
Proba budźe w sportowni
Budyšin. Čłonojo 1. serbskeje kulturneje brigady su wutrobnje přeprošeni na chórowe proby štwórtk a pjatk, 27. a 28. awgusta, wot 9.30 do 14.50 hodź. Proby wotměja so we wulkej sportowej hali na Třělnišću. Brigadnicy njech přinjesu sej sami dosć k jědźi a k piću sobu. Nimo toho płaća krute korona-předpisy, potajkim dosć wulke wotstawki, nahubny škit a wužiwanje desinfekciskeho srědka.
Budyšin (SN/MWj). Hdyž prěnju sobotu měsaca dypkownje připołdnju w dwanaćich sireny ruja, so čłowjek jenož krótki wokomik nastróži a je hnydom zaso změrowany. W tym času su minjene lěta mjenujcy signal sirenow wupruwowali. To pak so nětko změni. Sireny dyrbja tež přichodnje wupruwować. To pak nječinja hižo prěnju sobotu měsaca w 12 hodź., ale wot septembra kóždu srjedu w 15 hodź., dalokož to žadyn zakonski swjaty dźeń njeje.
Bjerwałdski jězor ma nětko nowy wulkoprojekt, kiž móhł turizmej tamnišeje kónčiny přewšo tyć a kiž přinjese zdobom nowy elan za strukturnu změnu we Łužicy.
Hamor (CK/SN). W přitomnosći sakskeho ministerskeho prezidenta Michaela Kretschmera (CDU) je Berlinska firma Floating house GmbH (FHG) předwčerawšim při Bjerwałdskim jězoru swoje prěnje płuwace domy poswjećiła. K dotalnym dźesać so w oktobru štyri a nalěto 2021 dalše přidruža. Dohromady ma potom při ekstra za to twarjenym mosćiku w Klětnjanskim přistawje 26 tajkich domow na wodźe stać. 35 firmow, zwjetša z blišeho regiona, je na tym wobdźělenych. Připrawa změje po dokónčenju 100 dowolowych łožow, prěnje su hižo přenajate. 20 ludźi budźe přichodnje w zarjadnistwje, za rjedźenje, reparatury a za turistiske zaměry přistajenych. Kaž jednaćel FHG Ulf Sybel rjekny, by so wón wjeselił, by-li w bliskosći hosćenc nastał. A tež pasažěrska łódź na jězoru by „jara wulkotna była“.