Kamjenc (BG/SN). Na kónc wójny před 75 lětami su tež minjeny pjatk w Lessingowym měsće Kamjencu spominali kaž tež na wuswobodźerjow. Nimale 30 ludźi, předewšěm wyšeje staroby, bě k pomnikej za padłych sowjetskich wojakow při Pastwinej horje přišło.
„Lětsa je koronakrizy dla wšitko hinak hač hewak. Mi pak je tónle dźeń chětro wažny. Dopomnjenki na Druhu swětowu wójnu njesmědźa nihdy zańć. Wona bě wulku bědu přinjesła a wjac hač 50 milionam ludźi smjerć“, wuswětli předsyda Towarstwa dom wobsydstwo Kamjenc Rainer Gröbner. Hižo dźeń do toho běchu čłonojo Spěchowanskeho towarstwa wopomnišća wotnožki kaceta Kamjenskeho Knježeho doła před bywšim kacetom wěnc a kwětki k wopominanju na wuswobodźerjow połožili. Wottam podachu so zhromadnje k pomnikej za padłych němskich wojakow. Woni njemóžachu so tehdy sćehnjenju do wójska wuwinyć a zahinychu w bojach mjez Kamjencom a Budyšinom. Kak strašne tehdy bě zwołanje wotpokazać, pokazuje pomnik při starym pósće. Kamjenčenjo běchu jón 1944 wotprawjenemu přećiwnikej wójny Richardej Liebeltej wěnowali.
Z pomocu krajneho spěchowanja móhła gmejna Njeswačidło wšelake projekty zwoprawdźić.
Njeswačidło (JK/SN). Runja druhim gmejnam z wodźiznami 2. rjadu, kotrež dyrbja zdobom prawidłownje hladać, je tež Njeswačanska spěchowanske srědki Swobodneho stata Sakskeje dóstała. Na kóždy kilometer – z wjetšeho dźěla jedna so při tym wo małe abo mjeńše rěčki – dóstanje komuna 500 eurow. Te ma wona zmysłapołnje nałožić a dołhodobne kmane slědy zawostajić. Je tuž trjeba sej pomoc fachowcow zawěsćić. Do toho pak ma komuna přehlad wo wodźiznach a jich konkretnym stawje nastajić. Na to su so Njeswačanscy gmejnscy radźićeljo dojednali, jako dźěše wo to, srědki kmanej fachowej firmje za zwoprawdźenje naročneho nadawka přepodać.
Pěskecy (aha/SN). Wobydlerjo Pěskec, wjesneho dźěla Njebjelčanskeje gmejny a jeje cyrkwinskeje wosady, wědźa sej rěč, tradicije a wěru swojich prjedownikow česćić. To dopokazuja woni skutkownje mjez druhim z hajenjom narodnych a nabožnych nałožkow. Nimo toho natwarichu sej hnydom po politiskim přewróće kapałku jako duchowne srjedźišćo, kotrež wjesnjanow w zhromadnej modlitwje zwjazuje. 1. meje bě tomu 28 lět, zo je tehdyši biskop Mišnjansko-Drježdźanskeho biskopstwa Joachim Reinelt Boži dom z 80 městnami poswjećił.
16 ludźi w chorowni
Budyšin/Zhorjelc. Z dalšimaj z koronawirusom natyknjenymaj je w Budyskim wokrjesu nětko 418 inficěrowanych. Z nich je 108 schorjenych, šěsnaćoch tuchwilu w chorowni lěkuja. Dotal je so 297 ludźi wustrowiło. W Zhorjelskim wokrjesu njejsu žane nowe infekcije zwěsćili, dotal je 268 padow. 29 wosobow je schorjenych, dwě stej w klinice. 217 ludźi je zaso strowych.
Archiw mjeńšiny nominowany
Marl. Digitalny RomArchive bu w kategoriji „Wěda a kubłanje“ za lětuše myto Grimme Online Award nominowany. Archiw „přinošk Romow za europske kulturne stawizny skónčnje wobrazliwje spřistupnja“, we wopodstatnjenju rěka. Wo paralelnje wupisanym publikumowym myće móža hač do 14. junija pod grimme-online-award.de wothłosować.
Pietetnosć wobkedźbować
Zdźěla hižo spušćene awtokina swjeća zaso wožiwjenje – snano prawje bórze tež w Budyšinje? Druhdźe so tajke hižo nětko wo zahoritosć a dźakownosć staraja.
Zhorjelc/Budyšin (UM/SN). Firma Gastrobande tzwr ze sydłom w Niskej chce na Budyskim lětanišću w Lětonju (Litten) zajimcam awtokino poskićić. To je jednaćel Toni Heide na naprašowanje wobkrućił. Za doskónčny rozsud dyrbja pak hišće dojednanja z Kubšiskej gmejnu wočaknyć. Na jeje teritoriju dźě je areal, kotryž chcedźa wužiwać.
W Zhorjelcu a při Brězowskim jězorje je poskitk, sej z awta sem filmy wobhladać, wulki zajim žnjał. „Za to, zo smy zastupne lisćiki jenož někotre dny do předstajenja předawali, smy z wuslědkom jara spokojom“, Toni Heide rjekny. W Brězowce bě prěnje předstajenje samo wupředate, při čimž wšak je tam mjenje městna hač w Zhorjelcu.
Njeborzdźeny do Audija
Porchow. Třo zranjeni a 30 000 eurow škody je bilanca sobotneho njezboža pola Porchowa. Kaž policija zdźěli, je 72lětny šofer Suzukija njeborzdźeny do Audija zrazył, kotryž chcyše dolěwa wotbočić. 72lětny so ćežko zrani. 36lětny šofer Audija a jeho sobujěduca lochko.
VW do busa zrazył
Lejno. Pjatk stej w Lejnje VW Sharan a bus frontalnje do so zrazyłoj. Po informacijach policije je šofer VWja we wsy wjacore awta přesćahnyć chcył. Bilanca: 8 000 eurow škody a jedyn ćežkozranjeny.
Wojerecy. Kompjuterowy muzej Koranda Zusy (ZCOM) we Wojerecach je swoje zastupne lisćiki potuńšił, kaž na swojich internetnych stronach informuje. Jako přičinu mjenuja jeho sobudźěłaćerjo tuchwilne sylne wobmjezowanja a škitne naprawy přećiwo koronawirusej, a tajke dyrbja wězo tež tam wobkedźbować. Wunamakarjej kompjuterow Konradej Zusy, kiž bě we Wojerecach na gymnazij chodźił, wěnowany muzej ZCOM je wot wutory do njedźele w času wot 10 do 17 hodź. wočinjeny. „Hosćo pak njesmědźa škitnych naprawow korony dla hišće wšitke poskitki našeho domu wužiwać“, rěka z muzeja. Na přikład we „wunamakarskej dźěłarni“, hdźež móža so wopytowarjo hewak bjez wobmjezowanjow sami na ličakach wuspytać, njeje to tuchwilu dowolene. Tuž je so zarjadnišćo rozsudźiło, płaćiznu zastupnych lisćikow nachwilnje znižić.
Pytaja hladanskeho nawodu
Łaz (AK/SN). Wot kónca lěta 2019 wukonjachu mnohe ruki pilne dźěło w komunalnym młodźinskim klubje blisko gokartoweje čary na kromje Łaza. „Stary mjezywjerch bu wotstronjeny, nowy bu zasadźeny a wobarbjeny“, rozjimataj nawodaj młodźinskeho kluba Felix Kinne a Roman Herzog. Dźakowano mnohostronskej podpěrje je so w běhu dweju a poł měsaca zakładne saněrowanje zešlachćiło. Radźićel gmejny a wsy Reiko Stephan je tójšto wólneho časa woprował a graty přewostajił. Wosebje je wón při nowym mjezywjerchu kaž tež instalaciji noweje kluboweje kuchnje pomhał. Matthias Wilke je spěšnje a na njekomplikowane wašnje nowe PVC-špundowanje wukładł, Stephan Schulz staraše so wo elektriku. „Wutrobnje dźakujemy so nimo toho Karin Reinhardt, Torstenej Heiderej a předewšěm wjesnjanosće Thomasej Leberechtej. Woni su nas wobstajnje pohonjeli a pozbudźeli“, Kinne a Herzog powědataj. „Chcemy klub znowa wožiwić. Minjene połdra lěta njeje so nichtó tak prawje zamołwity čuł, twarjenje je přiběrajcy rozpadowało.“