Z dalšimaj młodźinskimaj klubomaj dźěławosć župy nadal zaručena

Chrósćicy (SN/JaW). Diana Wowčerjowa je nowa županka Kamjenskeje župy ­„Michał Hórnik“. Delegaća wuzwolichu Nukničanku pjatk wječor na hłownej a wólbnej zhromadźiznje w Chróšćanskej „Jednoće“. Mać třoch dźěći dósta po słowach nawody wólbneho wuběrka Křesćana Korjeńka „54 hłosow přitomnych wólbokmanych, štož wučinja 96,4 procenty. Dwaj staj so hłosa wzdałoj. Napřećiwne hłosy žane njeběchu.“

„Dźakuju so za dowěru a wjeselu so na zhromadne dźěło, kotrež wšak sym ze župnym předsydstwom hižo nazhonić směła. Wěm, zo je zastojnstwo županki zamołwita funkcija. Sym pak zwólniwa je wukonjeć, dokelž wěm, zo mam dobry team“ rjekny Wowčerjowa po wuzwolenju a pokaza hižo na ideje za přichod. „Tuchwilny čas pandemije je za towarstwa ćežki, štož tež w chórje Meja nazhonjam. Mnohe towarstwa njemóža dźěłać, abo činja to w jenož jara wobmjezowanej formje. Přiwšěm sej myslu, zo móžemy čas tež wužić, hladać a rozmyslować, kotre projekty su hišće móžne. Sym lětušu jolku sćěhowała, a měnju, zo móžemy z toho zdobom za naše dźěło wuknyć.“