Slepjanska gmejna a šula wot spočatka z Domowinu hromadźe dźěłałoj
Slepo/Budyšin (SN/JaW). Gmejna Slepo a tamniši Němsko-serbski šulski centrum stej přewšo hordej, zo je jutře hłowna zhromadźizna Domowiny pola nich z hosćom. To podšmórnyštaj wjesnjanosta Jörg Funda (CDU) a nawoda wyšeje šule „Dr. Marja Grólmusec“ Jan Hrjehor. „Jako je Domowina mysličku zrodźiła, zhromadźiznu pola nas přewjesć, běchmy hnydom zahorjeni a smy spytali móžne zadźěwki wotstronić“, rjekny Funda, kiž je tuchwilu na dowolu w Grjekskej a wobžaruje, zo njemóže so na zhromadźiznje wobdźělić. „Přeju wšitkim přitomnym płódnu zhromadźiznu, zo bychu so derje čuli. Smy wšak jako gmejna ze šulskim centrumom tójšto přihotowali a wot wšeho spočatka z Domowinu za jedyn postronk ćahnyli.“