20. hłowna zhromadźizna Domowiny w Slepom starosć wo maćeršćinu a strukturu změnu načała
Swoju 20. hłownu a wólbnu zhromadźiznu je serbski třěšny zwjazk Domowina předwčerawšim w sportowni Němsko-serbskeho šulskeho kompleksa Slepo přewjedła. Pod wuměnjenjemi koronapandemije, wotstawk a hygienowy koncept wobkedźbujo, schadźowachu so tam 103 delegaća ze sobustawskich župow a towarstwow. Ze 96,1 procentom (3,1 procent wjace hač 2017) wotedatych hłosow su woni předsydu Dawida Statnika třeći raz w zastojnstwje wobkrućili. Hłowna zhromadźizna je z 98 hłosami wustawki Domowiny změniła kaž tež dźěłowe směrnicy narodneje organizacije hač do lěta 2023 schwaliła. Prezencne zetkanje bě wažny nastork do skutkowanja po pandemiji.