Serbski kulturny turizm tež na projekće „Serbske impresije“ dale dźěła

Budyšin (SN/at). Předsyda Serbskeho kulturneho turizma z.t. (SKT) Pětr Brězan dźerži w ruce najnowši wupłód swojeho towarstwa. Dźens dopołdnja je čerstwje ćišćane brošurki serbskich poskitkow w Hornjej a Delnjej Łužicy dóstał. „78­stronski přehlad je naša nowa sobudźěłaćerka Katharina Šmejduchowa zestajała“, Pětr Brězan rozprawja. Čas koronapandemije dla, kotryž su druhe towarstwa jako mnohe aktiwity pře lemjace začuwali, su w SKT tak derje kaž móžno wužiwali. Nětko, hdyž tež w dwurěčnej Łužicy zaso dowol kiwa, předleži aktualny material. Přichodne dny hižo budu brošurki we wažnych turistiskich informacijach, ale tež w Budyskej SKI, Choćebuskej Lodce, Čornochołmčanskim Krabatowym młynje a w Slepjanskim SKC wupołožene, zo bychu sej je wulětnikarjo a dalši zajimcy sobu wzali. Dźěło na brošurce měješe witany pódlanski efekt: W tym zwisku je pjeć nowych čłonow towarstwu přistupiło. Cyłkownje jemu přibližnje 40 juristiskich wosobow přisłuša.