Diskusija wo naćisku noweho programa Domowiny nětko ze zakładom

Budyšin (SN/at). Serbski třěšny zwjazk Domowina chce ramik swojeho skutkowanja za přichodny lětdźesatk definować. Po tym, zo jeje aktualny „Program Domowina – 2025“ klětu wuběži, je programowa komisija naćisk zdźěłała. Z tym změje na hłownej zhromadźiznje loni w Choćebuzu zahajena diskusija noweho programa konkretny zakład. Zwjazkowe předsydstwo je na swojim posedźenju 2. februara aktualny staw programoweho naćiska na wědomje brało a předležacu wersiju do zjawneje diskusije dało.

Namjetowane je, dotalny, z třoch wopřijećow wobstejacy titl w změnjenym slědźe „Zamołwitosć – wotewrjenosć – zwjazanosć“ dale wjesć. Wočiwidny je mjeńši wobjim. Při tym je sej programowa komisija něšto mysliła, wuswětla předsyda Domowiny Dawid Statnik: „Program je wobsahowe wobličo. Z njeho su konkretne nadawki wotwodźene a w dźěłowych směrnicach napisane.“ Tute su zakład dźěławosće Domowiny za dobu mjez dwěmaj hłownymaj zhromadźiznomaj.