Hłowna a wólbna zhromadźizna Zwjazka za serbski kulturny turizm
Rakecy (SN/AN). Na swoju lětušu hłownu a wólbnu zhromadźiznu běše Zwjazk za serbski kulturny turizm z. t. wčera popołdnju čłonki a čłonow do sydarnje towarstwa Hornjołužiska hola a haty w Rakecach přeprosyło. Na dnjowym porjedźe steješe nimo wobkrućenja protokola zašłeje zhromadźizny, předstajenja finančneho stawa a plana za lěto 2024 tež wólba noweho towarstwoweho předsydstwa. „Ćežkeje wutroby dyrbju wam dźensa zdźělić, zo čłonce Cornelia Šnipowa (region srjedźna Łužica) a Stephanie Bierholdtec (Slepjanski region) swoje zastojnstwo w předsydstwje złožitej“, rozprawja přitomnym po lětušich wólbach jako předsyda towarstwa wobkrućeny Pětr Brězan.