Zhorjelc (AK/K). Wokrjes Zhorjelc chce swój Zhorjelski zarjad na terenje Berlinska dróha/Salomonowa njedaloko dwórnišća přichodnje wutwarić. Na tym městnje ma po zwoprawdźenju rozměrneho předewzaća potom 720 sobudźěłaćerjow skutkować porno dotalnym 370. „Wobšěrne twarske naprawy w lětach 2019 do 2022 budu znajmjeńša 24 milionow eurow płaćić“, trochuje komornik wokrjesa Thomas Gampe. K tomu přińdu wudawki za parkowanišćo ze 170 městnami, kan­tinu, zjawny hosćenc a žurlu za wokrjesny sejmik. Trěbne srědki wočakuja sej ze wšelakorych wobstejacych spěchowanskich horncow, na přikład z programa Zwjazka a krajow „Mosty do přichoda“ a programa „Pomoc městam“. Cyłe zarjadnistwo ma so scentralizować, nic naposledk na dobro ludnosće. Nětko su zarjady na wšelkich dróhach rozbrojene. Z centralizaciju ma so zdobom stare město wožiwić. Wotnožki krajnoradneho zarjada­ w Běłej Wodźe, Niskej, Lubiju a Žitawje wostanu. W Běłej Wodźe ma Zhorjelski wokrjes tuchwilu 100 sobudźěła­ćerjow, w Niskej 190, w Lubiju cyłkownje 302 a w Žitawje 150.

Turkowske knježerstwo wumjetuje kanclerce podpěru teroristow

Ankara/Berlin (dpa/SN). Napjatosće mjez Turkowskej a Němskej so dale a bóle přiwótřeja. Tuchwilu hižo žadyn z turkowskich ministrow w Němskej njeje, zo by tu wo planowanu reformu wustawy wabił. Kaž pak nowina Bild dźensa wozjewja, předleža zwjazkowemu knježerstwu informacije, zo je hač do kónca měsaca­ dalšich 15 wustupow turkowskich ministrow w Němskej planowane.

Po tym zo bě turkowski prezident Recep Tayyip Erdoğan Nižozemsku „bananowu republiku“ mjenował, je so zwjazkowa kanclerka Angela Merkel (CDU) ze susodnym krajom solidarizowała. Minjeny­ kónc tydźenja njeje knježerstwo w Den Haagu turkowskim politikarjam dowoliło za wólbny bój wustupować. Hižo přitomnych ministrow nablaku­ wupokazachu. Mjeztym pak je tež nižozemskim diplomatam zakazane do Turkowskeje přińć. Erdoğan zwjaz­kowej kanclerce wumjetuje, zo tero­ristow podpěra.

Drježdźany (SN/JaW). Biskopstwo Drježdźany-Mišno je w lěće 2015 solidnje hospodariło. To wuchadźa z rozprawy, kotruž su wčera w Drježdźanach předstajili. Tak móžeše dieceza swój cyłkowny kapital w mjenowanym lěće wo 18,3 miliony na 301,8 milionow eurow stopnjować. Najwjetše wudawki z něšto wjac hač 35 mio. eurow dyrbjachu za personal nałožić. Wysoke lětne wuslědki wobkrućeja z mnohimi změnami we wjednistwje, čehoždla dyrbjachu wažne rozsudy wo inwesticijach zas a zaso přestorčeć. „Toho­dla budu wuslědki přichodnych lět tójšto snadniše“, rěka w rozprawje. Za přichod připowědźa biskopstwo přiběracy financny ćišć, mjez druhim mjenje dochodow a widźomnje přiběracych personalnych kóštow kaž tež woteběraceje ličby wěriwych a mjenje duchownych dla. „Wuwiće je hižo njewobroćomny proces transformacije nastorčiło“, rěka w rozprawje. Wo kotry proces so konkretnje jedna, biskopstwo njepraji. Wo móžnym zjednoćenju wosadow, tež serbskich, rozprawa tohorunja ničo konkretne njewupraja.

Psy su listonošam skerje njepřećel. Němski póst poskića tuž swojim sobudźěłaćerjam prawidłowne kursy, zo bychu nawuknyli, kak maja so we łosko­ćiwych situacijach ze štyrinohačemi zadźeržeć. Strach listonošow wšak njeje cyle­ njewoprawnjeny. Loni registrowachu po wšej Němskej 1 819 tak mjeno­wanych zetkanjow listonošow z psami. We 850 padach so sobudźěła­ćerjo pósta zranichu, tak zo njemóžachu swoje dźěło dźeń abo samo dlěje wukonjeć.

Po jenož jědnaće dnjach je brazilski prezident Michel Temer z ponowjeneho palasta­ zaso wućahnył. 76lětny a jeho mandźelska běštaj tam njedobru energiju a strach před duchami začuwałoj, kaž magacinej Veja přeradźištaj. Wot prěnjeje nocy w palasće njemóžeštaj wobaj spać. Mandźelska prošeše samo měšnika wo pomoc, zo by lóze duchi wućěrił.