Rěča znowa wo chorownjach
Berlin (dpa/SN). Hladajo na planowane noworjadowanje struktury chorownjow w Němskej su so zastupnicy zwjazkoweho knježerstwa a zwjazkowych krajow dźensa znowa k wuradźowanjam zetkali. Rěčeli su předewšěm wo zasadnych prašenjach reformy. Zwjazkowy minister za strowotnistwo Karl Lauterbach (SPD) chcył po dowolowej přestawce konkretne naćiski noweho zakonja předpołožić. Zwjazk chce předewšěm system zapłaćenja změnić, zo by hospodarski ćišć na chorownje znižił. Nimo toho planuja jednotne kriterije kwality a dokładnišo postajenje wobłuki wukonitosće klinikow.
Zwjazk chorobnych zawěsćernjow žada sej cyłoněmske předpisy nastupajo kwalitu chorownjow. Towaršnosć chorownjow so starosća, zo słuža wot Lauterbacha planowane kwalitne předpisy k tomu, dźěl chorownjow zawrěć.
Namócnosće w Francoskej
Wjace woporow w kofejowni
Kramatorsk (dpa/SN). Po ruskim raketowym nadpadźe na kofejownju we wuchodoukrainskim měsće Kramatorsk w kónčinje Donjecka, je so ličba smjertnych woporow na dwanaće zwyšiła. Pomocnicy su po informacijach ciwilneho škita dźensa rano dalše ćěło z rozwalinow dospołnje zničeneho twarjenja wućahnyli. W telewiziji pokazachu wot truty nawjerćany film, kiž pokazuje rozměr zničenja. Něhdźe 60 ludźi je so při nadpadźe zraniło. W kofejowni sedźeše wutoru wječor wjele ludźi, jako raketa do njeje zrazy.
Ruska je Ukrainu před wjace hač 16 měsacami nadpadnyła. Hinak hač oficialnje w Moskwje twjerdźa, měrja so ruske rakety a truty stajnje zaso na ciwilne objekty w Ukrainje. Při tym dochadźa mjez ciwilistami stajnje zaso k smjertnym woporam a k zranjenym.
Zwjazkowy kancler Olaf Scholz (SPD) z toho wuchadźa, zo je přetorhnjeny zběžk zóldnarjow skupiny Wagner ruskeho prezidenta Wladimira Putina wosłabił. „To ma bjezdwěla dołhodobne wuskutki w Ruskej“, rjekny Scholz wčera w ARD.
Po čłowjeskim prawje?
Diskusije kołowokoło wupokazanja Faisala R. njewomjelknu
Budyšin/Wojerecy (SN/MiP). Sakska rada ćěkancow je zańdźeny tydźeń „pad Faisala R.“ z Wojerec wozjewiła a kritisce komentowała. Po dotalnych dopóznaćach bu wón přišedši na termin k wotewzaću kreje w strowotniskim zarjedźe Budyskeho wokrjesa wot policije zajaty, kotraž běše jeho tam hižo wočakowała. Dnja 13. Junija sedźeše Faisal R. přećiwo swojej woli w lětadle wróćo do ródneho kraja Pakistana. 32lětny běše we Wojerecach derje integrowany a woblubowany, bjeze jeničkeho přeńdźenja. Cyle samozrozumliwje pomhaše ukrainskim ćěkancam a angažowaše so za dobre mjezsobne žiwjenje. Město Wojerecy je so na swojej internetnej stronje jasnje wot podawka distancowało a podšmórnje, „zo tute wašnje wupokazanja ani krajnemu prawu, ani čłowjeskim prawam njewotpowěduje“.
Čołm we wichoru
Škit polěpšić
Podstupim (dpa/SN). Po zahubnych wohenjach loni w braniborskich lěsach chce zwjazkowy kraj wohnjoškit polěpšić. K lětušim naprawam słušeja tři projekty na płoninje cyłkownje 800 hektarow, na kotrychž chcedźa tak mjenowane „lěsne wohnjowe zawěry“ twarić. To zdźěli wobswětowe ministerstwo w Podstupimje na naprašowanje frakcije CDU braniborskeho krajneho sejma. Naprawy maja k tomu přinošować, rozšěrjenju wohenjow zadźěwać.
EU njepřezjedna
Budapest/Berlin (dpa/SN). K wobmjezowanju migracije, kotraž njeje regulowana, namjetuje madźarski ministerski prezident Viktor Orban, zo maja ćěkancy zwonka EU na zakónčenje swojeho azyloweho jednanja čakać. „Bohužel njejsmy kmani, to w Europje rjadować“, wuzběhny konserwatiwny politikar w interviewje z nowinami „Bild, „Welt“ a „Politico“. Přičina za to su rozdźělne politiske předstawy. Tak zhladuje Němska pozitiwnje na migraciju, mjeztym zo je to Madźarskej přeriskantne. Jeho kraj rozeznawa jasnje mjez hóstnymi dźěłaćerjemi a migrantami, štož Němska nječini. Madźarska nochce w swojim kraju žane „zhromadźenstwa, kotrež naše najwažniše europske hódnoty njerespektuja“. K tomu słušeja runoprawosć, žana homofobija a žadyn antisemitizm.
To a tamne (29.06.23)
Z hłowu we wobłoženju mosta tčacy wostał je wopity muž w Sandersdorfje-Brehna w Halle. Wohnjowa wobora móžeše 39lětneho wuswobodźić. Test alkohola wunjese 1,26 promilow. Do njelubozneho połoženja bě muž w měšćanskim dźělu Petersroda přišoł, jako za runje zhubjenymi wěcami pytaše.
Swojemu nanej žiwjenje wuchował je dwanaćelětny hólc w Baltiskim morju. Pachoł bě hłowu 36lětneho do womory padnjeneho muža w Großenbrode w Mecklenburgskim zaliwje nad wodu dźeržał a wótře wo pomoc wołał, policija zdźěla. Pomocnicy towaršnosće za wuchowanje žiwjenje muža na pobrjóh donjesechu, hdźež hižo helikopter na njeho čakaše. Dowolnika ze Sauerlandskeje dowjezechu do chorownje. Muž bě prawdźepodobnje předschorjenja dla we wodźe do womory padnył.
Studij měł atraktiwniši być
Gütersloh (dpa/SN). Hladajo na tysacy pobrachowacych wučerjow na šulach w Němskej je sej kubłanski zwjazk wobšěrne reformy hladajo na studij wučerstwa žadał. Zo móhli wjace dorosta přiwabić, dyrbi studij atraktiwniši być, namołwjachu dźensa fachowcy załožby Roberta Boscha, Bertelsmannoweje załožby, Centruma za wysokošulske wuwiće (CHE) a zwjazka załožerjow. Trěbne su fleksibelniše, praksy bliske wobsahi a studijne struktury. Dokelž njeje hižo dosć wučerjow, to kubłanskemu wuspěchej młodych ludźi zadźěwa.
Stawk najprjedy raz zakónčeny
Lipsk (dpa/SN). Warnowanski stawk na stejnišću Amazon w Lipsku je zakónčeny. Po informacijach dźěłarnistwa ver.di běše wot póndźele 300 koleginow a kolegow swoje dźěło złožiło. Ver.di chce dale ćišć wukonjeć. „Dołhož njeje žanoho tarifoweho zrěčenja, tež njemjelčimy“, podšmórny dźensa sekretar dźěłarnistwa Ronny Streich na naprašowanje. Warnowanski stawk měł doraznje žadanje za tarifowym zrěčenjom za něhdźe 1 100 přistajenych w Lipsku zwuraznić. Druhe tarifowe koło wotměja tam 4. julija.
Ludźo móža dale bar zapłaćić
