Róčnica bjez chorhojow
Berlin (dpa/SN). Policija zwjazkoweje stolicy je 8. a 9. meje ruske a ukrainske chorhoje we wokolinje sowjetskich wopomnišćow w Berlinje zakazała. Na woběmaj dnjomaj woswjeća 78. róčnicu skónčenja Druheje swětoweje wójny w Europje. Zo bychu „dostojne wopominanje padłych wojakow bywšeje sowjetskeje armeje“ zaručili, njeje tež wojerska hudźba při wopomnišćach dowolena, policija zdźěli. Zakazane tež je, wójnu Ruskeje přećiwo Ukrainje zjawnje wuchwalować.
Lemke za limit spěšnosće
Berlin (dpa/SN). Zwjazkowa wobswětowa ministerka Steffi Lemke žada sej wjace napinanjow za klimje škitace naprawy we wobchadźa a ma w tym zwisku tež wobmjezowanje spěšnosće na awtodróhach za trěbne. Zwjazkowe knježerstwo je sej naročne zaměry za wutwar elektromobility předewzało, rjekny politikarka Zelenych nowinarjam w Berlinje. „To pak njedosaha“, chcyli-li Němska swoje zaměry docpěć. Wobmjezowanje spěšnosće by wažny přinošk był. Dotal FDP limit spěšnosće wotpokazuje.
Scholz po puću w Africe
Měšćanosta nižozemskeho města Wageningen Floor Vermeulen (ze ...
Znowa nadpad w Serbiskej
Kretschmer za rozsud ludźi
Minister pola ukrainskich wojakow
Klietz (dpa/SN). Zwjazkowy minister za zakitowanje Boris Pistorius (SPD) je dźensa zhromadnje ze swojim danskim kolegu Troelsom Lundom Poulsenom zepěranišćo zwjazkoweje wobory wopytał, na kotrymž ukrainskich wojakow na bojowym tanku Leopard 1 A5 wukubłuja. Na zwučowanišću Klietz na sewjeru Saksko-Anhaltskeje wojakow wukmanjeja, brónjowy system wužiwać a po trěbnosći tež wuporjedźić. Za to zasadźuja tam němskich a danskich wukubłarjow, technikarjo industrije jich podpěruja. Runočasnje tam dalšich fachowcow trenuja, kotřiž maja ukrainskich wojakow pozdźišo dale kubłać, zwjazkowa wobora do wopyta ministra zdźěli. Zhromadnje z Nižozemskej a Danskej financuje Němska projekt, z kotrymž w halach brónjenskeje industrije składowane bojowe tanki staršeje generacije zaso aktiwizuja.
Na swojim wopyće we wukubłanišću Klietz chcyštaj Pistorius a Poulsen tež z wukubłarjemi a ukrainskimi wojakami rěčeć. Wukubłanišćo je centralna městnosć wot Brüssela nawjedowaneje misije wukmanjenja ukrainskich wojakow. Mjeztym su tam 3 000 z nich wukubłali.
Wobšudnik před sudnistwom
W Drježdźanach počesća wuznamnu Serbowku
Ewangelska Serbowka Marja Simonowa je w 19. lětstotku sobu zakłady połožiła za dźensniše skutkowanje Čerwjeneho křiža a za moderne hladanje chorych. Rodźena 1824 do serbskeje Janašec swójby w Dobruši pola Budyšina ćehnješe jako młodostna na słužbu do Drježdźan. Tam wuda so na zamóžiteho tekstilneho překupca Simona a dźěłaše sobu w jeho wobchodźe na Starym torhošću.
We wójnje 1866 poda so do Čech, hdźež pomhaše lacarety załožeć a ranjenych zastarować. Na to powoła ju sakska kralowna Carola do direktorija Albertskeho towarstwa, w kotrymž přewza nawodnistwo wukubłanja hladarkow.
We wójnje 1870/71 znowa jako samaritka skutkowaca bu po wšej Němskej jako „mać Simonowa“ znata. Po wójnje wuda knize wo teoriji a praksy swojeho skutkowanja a załoži w Loschwitzu hladarnju za inwalidow „Deutsche Heilstätte“. Wospjet wuznamjenjena wona 1877 zemrě a bu z wulkej česću na pohrjebnišću swj. Trojicy w Drježdźanach-Johannstadće pochowana. Po serbskej samaritce rěka w Drježdźanach-Loschwitzu dróha „Marie-Simon-Straße“, tež hladanske towarstwo a cyłoněmske myto stej po njej pomjenowanej.
To a tamne (05.05.23)
Zhubjenych pruwowanskich nastawkow francoskeje elitneje uniwersity dla dyrbi něhdźe 4 400 młodych ludźi nastawk hišće raz pisać. Wobalka z nastawkami njeje w sekretariaće uniwersity dóšła, zdźěla uniwersita w Lyonje. Po njewuspěšnym pytanju uniwersity a póšty su so rozsudźili, pruwowanje wospjetować, zo bychu wšitcy samsne šansy měli. Cyłkownje 4 400 młodych ludźi bě so za sto studijnych městnow přizjewiło.
Tigry w „zwěrjencu hacanja“ su zamołwitym w sewjerorynsko-westfalskim Neussu tójšto mjerzanja wunjesli a na kóncu samo sudnistwo zaběrali. Pućowacy coo „Melody“ měješe nimo ponyjow, wóslikow, kozow a kamelow tež wjacore tigry sobu. Rubježne zwěrjata pak njejsu w tym zwisku dowolene, měšćanski zarjad argumentuje. Sudnistwo bě samsneho měnjenja a je hóstnu hru skónčiło.
Scholz po puću w Africe
Berlin (dpa/SN). Zwjazkowy kancler Olaf Scholz (SPD) je so dźensa na swoju druhu wjetšu jězbu jako nawoda němskeho knježerstwa do Afriki podał. Spočatnje wjedźeše jeho puć do Etiopiskeje. Wječor chcyše wón dale do Kenije lećeć, do najwažnišeho partnerskeho kraja Němskeje na wuchodźe Afriki. Na jězbje póndźe předewšěm wo bój přećiwo změnje klimy a wo wužiwanje wobnowjomnych energijow. Tola tež wuskutki ruskeho nadpada na Ukrainu chcedźa wobrěčeć.
Zelenskyj w Den Haagu
Den Haag (dpa/SN). Ukrainski prezident Wolodymyr Zelenskyj je njewočakowano do nižozemskeje stolicy Den Haaga dolećał. Pózdni wječor je wón z Finskeje přilećawši z mašinu nižozemskeho knježerstwa na Amsterdamskim lětanišću Schiphol přizemił. Dźensa wočakowaše jeho nižozemski ministerski prezident Mark Rutte. Planowany je tež wopyt mjezynarodneho chłostanskeho sudnistwa w Den Haagu, hdźež Ukraina ruskich wójnskich złóstnistwow dla skorži.
Plany tepjenjow dla wottraša
