Budyšin (SN/at). Lětuše planowane projekty stejachu w srjedźišću wuradźowanja předsydstwa župy „Jan Arnošt Smoler“ wčera w Budyskim Serbskim domje. Kaž regionalna rěčnica Domowiny za teritorij Budyskeje župy Sonja Hrjehorjowa na naprašowanje zdźěli, přihoty za swójbne popołdnjo zaměrnje postupuja. Zarjadowanje je za 18. nowember w Hodźiju předwidźane. Wothłós z gmejny je dosć pozitiwny, kaž zwěsćichu po prěnich rozmołwach z wjesnjanostu Geraldom Meyerom (njestronjan) a ze zastupjerjemi pěstowarnje a towarstwow.
Župne předsydstwo je so za cil lětušeje kubłanskeje jězby rozsudźiło. Tak podadźa so 23. septembra do Ochranowa. Dalši namjet, w reformaciskim lěće do Lutheroweho města Wittenberga jěć, njebu wot wjetšiny přiwzaty.
Ptačokwasne předstajenje Serbskeho ludoweho ansambla za dźěći w Budyšinje je mjez čłonami župneho předsydstwa pobrachowaceje serbskeje rěče dla kritiku zbudźiło. Woni wobžaruja, zo njeje zarjadowanje šulerjam, kotřiž serbšćinu wuknu, składnosć skićiło ju na jewišću w spěwach abo druhich dźělach programa SLA dožiwić.
Budyšin (SN/JaW). Referent Domowiny za hospodarstwo Pětr Brězan budźe třěšny zwjazk přichodnje w brunicowym wuběrku Regionalneho planowanskeho zwjazka Hornja Łužica-Delnja Šleska kaž tež w jeho zwjazkowej zhromadźiznje zastupować. Wšitcy štyrnaćo přitomi čłonojo Zwjazkoweho předsydstwa Domowiny wuprajichu jemu minjenu sobotu dowěru. Brězan přewozmje nadawk wot Marka Kowarja. Změna bě trěbna, dokelž je Kowar wot spočatka lěta jednaćel třěšneho zwjazka.
25. februara zemrě w 84. žiwjenskim lěće Miłočan Achim Kowar. Ze swójbnymi a přiwuznymi žaruja wosebje tež přećeljo serbskeho sporta. W rjadach Sokoła bě to w běhu jeno štyrjoch měsacow po Józefje Kilanku, kiž zemrě 9. nowembra, a Pětrje Šołće (2. februara zemrěł) třeće dźělenje wot prjedawšeho aktiwneho sportowca a sportoweho funkcionara.
Ze słownikom slepjanšćiny „1 000 Slěpjanske słowa“ je Rownjanske towarstwo Njepilic dwór dołhodobny rěčny zakład stworiło.
Rowno (AK/SN). „Chcemy jón praktisce wužiwać a z nim naš kurs serbšćiny dale wjesć. Aktiwne rěčenje, tež na zarjadowanjach a wšědny dźeń, je nam wažne.“ Takle potwjerdźi to Manfred Nikel, wot załoženja 1999 předsyda towarstwa Njepipic dwór, na pjatkownej hłownej zhromadźiznje na Rownjanskim Njepilic statoku, w bilancy towarstwa za lěto 2016.
W Budyšinje zemrě 22. februara w starobje 82 lět wučer, pedagogiski wědomostnik, aktiwny sportowc a sportowy funkcionar Pětr Šołta. Wo njeho žaruja mandźelska Marja, dźowce Jana a Nadja, přiwuzni, něhdyši kolegojo kaž tež wulka swójba přećelow serbskeho sporta.
Pětr Šołta narodźi so 24. awgusta 1934 w Njebjelčicach. Jeho nan bě hač do rozpušćenja Serbskeho Sokoła 1933 nazwučowar wjesneje jednoty. Wuchodźiwši zakładnu šulu bě Pětr mjez prěnimi šulerjemi w decembru 1945 załoženeho Serbskeho gymnazija w Českej Lípje. Tam započa so za kopańcu a lodohokej horić. Po přesydlenju wšěch serbskich wuknjacych spočatk 1947 do Varnsdorfa-Warnoćic je wón nimale kóžde swobodne popołdnjo za bulom honił. Hakle 13lětny smědźeše w mustwje serbskich studentow přećiwo wubrance Warnočanskich dźěłaćerjow sobu hrać.
w režiji Jurja Kostorža:
1992 – „Překlepani Kulowčenjo“
1992 – hodowna hra
1993 – hra na česć 300. posmjertnin Jakuba Xavera Ticina
1993 – nalětni swjedźeń na žurli w Koćinje: „Leńka płokarniča“ a „Na běrnach“
1995 – „Wě Domaš wšitko“
1996 – „Zo jich hańba njeje“
1996 – scena „Kajkaj smój přistojnaj hólcaj“
1998 – struchłohra „Genofewa“ (běchu ju hižo 1938 w Kulowje hrali, nacionalsocialisća pak ju zakazachu)
1999 – „Mjedwjedź“ a „Na žeńtwje“ (Kostorž inscenaciju chorosće dla njedokónči)
w režiji Měrćina Słodeńka:
2000 – „Mjedwjedź“ a „Na žeńtwje“
2001 – medley Měrćina Słodeńka „Kermuša“
2002 – „Dawk nježenjencow
2004 – „Dubičanski kowar“
2006 – „Rozbity karan“
w režiji Janiny Brankačkoweje:
julij 2008 – „Krabat so nawróći“
w režiji Měrka Brankačka:
2012 – „Naša ćeta Mija“
2016 – „Hdyž kokula woła“
2017 – „Jědźk a lěnjoch“
Jedne z najaktiwnišich serbskich towarstwow je bjezdwěla Kulowske Bratrowstwo. A wosebje žiwy dźěl je dźiwadłowa skupina, kotraž swjeći lětsa slěborny jubilej. Štož bě so před 25 lětami jako hrajna scena składnostnje primicy nowoměšnika Pětra Krala zrodźiło, je hač do dźensnišeho syły přihladowarjow po cyłej Łužicy ze zajimawymi a naročnymi inscenacijemi zawjeseliło. Započeli su tehdy ze štyrjomi žonami a štyrjomi mužemi. A jim je so dźiwadźelenje lubiło. Nawod přewzał je jako prěni rodźeny Kulowčan Jurij Kostorž.
Mjeztym napjelnichu skład hrow z wulkim dźělom burleskow, ale tež z naročnymi kruchami, kaž ze struchłohru „Genofewa“.
Njebjelčicy (bl/SN). Hač Rio, Köln abo Mainz, po wšěm swěće nory hejsuja, zabawjejo so ze spěwom, reju a žortom. Zo by prawy lóštny póstniski wječor dožiwił, pak njetrjebaš sej daloko wulećeć. To nazhonichu lětuši wopytowarjo programa Serbskopazličanskeho karnewaloweho towarstwa.