Zo njeby so drasta pozhubiła

Donnerstag, 29. September 2016 geschrieben von:

Kulow (HH/SN). Prěni z třoch planowanych wječorow kołowokoło katolskeje narodneje drasty je Kulowske towarstwo Bratrowstwo zawčerawšim na starej šuli w Kulowje přewjedło. Na te wašnje chcedźa zajimcow ze serbskej narodnej dra­stu bliže zeznajomić a jim pokiwy dać, kak so ju najlěpje woblěkać.

Prěni wječor móžeštej předsydka ­Bratrowstwa Sonja Hrjehorjowa a čłonka předsydstwa Birgit Suchowa dohromady dźesać zajimčow witać, kotrež chcedźa k tomu přinošować, zo njeby so serbska drasta ze wšědneho žiwjenja pozhubiła. Tak chce Marina Pruchowa ze Sulšec ­prawje wjele wo dźělach drasty, wo płatach, wo wušiwanju atd. zhonić, zo móh­ła to swojimaj dźowkomaj dale dać. ­Sonja Hrjehorjowa je so drastu sama woblekła, rozłožejo při tym wosebitosće a rozdźěle. Přitomne mjez druhim zhonichu, zo je pola njewudatych holcow, ­kotrež swoj štawt šnóruja, rozdźělow we wašnju šnórowanja a zo maja wudate ­žony knefle.

Seminary a wino

Mittwoch, 28. September 2016 geschrieben von:
Livka (khe/SN). Pjeć młodostnych zastupuje Serbow na tuchwilnym nazymskim seminarje Młodźiny europskich narodnych mjeńšin (MENS) w awstriskej gmejnje Livka (Lockenhaus). Wčera su tam Gradźišćanscy Chorwaća a Korutanscy Słowjency jako hosćićeljo seminar oficialnje wotewrěli. Mjez druhim porěčeštaj k młodostnym wjesnjanosta Livki Christian Vlasich a prezidentka MENS Britta Lessow Tästensen. Cyłkownje 60 wobdźělnikam skići Livčanski hród hač do njedźele hospodu. Gradźišćo je znate za dobre wino a tak čaka na młodostnych z 21 narodnych mjeńšin nimo dźěłarničkow a wodźenja po awstriskej stolicy Wienje tež wopyt winarnje.

„Superkokot“ wotměja klětu znowa na Běłej Górje

Mittwoch, 28. September 2016 geschrieben von:

Hižo 17. króć je Domowinska župa Delnja Łužica na swoje woblubowane zarjadowanje „superkokot“ přeprosyła. Lětsa wotmě so swjedźeń zaso na Běłej Górje we wokrjesu Dubja-Błóta.

Běła Góra (HA/SN). „To bě lóštne zarjadowanje, kotrež je so nam jara lubiło.“ Takle hódnoćachu wopytowarjo lětuši swjedźeń „superkokot“ w serbsko-němskej wsy Běłej Górje. Cyłkownje 17 młodźencow ze 16 wsow, kotřiž běchu lětsa na znatym žnjowym swjedźenju, łapanju kokota, jako dobyćerjo wušli, je nětko wo titul­ „superkokota“ nastupił. Dwě hodźinje so wobdźělnicy na konju prócowachu, kokotej hłowu abo křidło wottor­hnyć. Jako najlěpši wopokaza so při tym, kaž hižo loni, Rico Noak z Běłeje Góry. To rěka,­ zo budźe tež klětuši „superkokot zaso tam. Titul druheho krala zaruči sej Kevin Fritz z Hochozy, třeći bu Benjamin Trogisch z Noweje Niwy. Přewodźało je jěcharjow 19 žnjowych kralownow w serbskej swjedźenskej drasće.

Program prěni raz bjez Kantorkow

Dienstag, 27. September 2016 geschrieben von:

Mjeztym zo su minjeny pjatk na swjedźenskim zarjadowanju w Rownom na 70lětne skutkowanje Domowinskeje skupiny we wsy a na 250. narodniny Hanza Njepile spominali, steješe njedźela cyle w znamjenju dworoweho swjedźenja.

Rowno (JoS/SN). Najrjeńše nazymske wjedro je zawčerawšim, njedźelu, dworowy swjedźeń na Rownjanskim Njepilic statoku wobrubiło. Tam witachu kemšerjow po němsko-serbskej Božej słužbje na rańše piwko ze šalmajowej kapału, kotraž­ dotal žadyn dworowy swjedźeń skomdźiła njeje. Poněčim so dwór dale pjelnješe. Mnozy wopytowarjo přichadźachu tež z wokolnych wsow, wšako chcychu sej k wobjedu kulinariske wosebitostki kaž serbsku kwasnu poliwku a pražene swinjo słodźeć dać. Dobry wothłós žnějachu burske a rjemjeslniske wiki. Na nich bě mjez druhim hribowy fachowc Uwe Bartholomäus zastupjeny. Wón wšak wopytowarjam wjele nadźije činić njemóžeše, zo w zbywacym času poměrnje sucheho lěta hišće wjele kmanych jědźnych hribow namakaja.

Wjele za snadny fenk

Montag, 26. September 2016 geschrieben von:
Kulturny program z wosom serbskimi towarstwami a dalšimi jednotliwcami, k tomu słódnu wječer z regionalnymi wudźěłkami kaž tež reje z dujerskej hudźbu a młodej­ serbskej kapału dožiwichu zajimcy sobotu w Chróšćanskej „Jednoće“. A za to njetrjebachu scyła wjele płaćić. W předpředani płaćeše zastupny lisćik runje šěsć, při wječornej kasy wosom eurow. To je za telko poskitka snadny fenk! Po wšěm zdaću pak to tón abo tamny Serb hinak widźi, hewak by sobotu wječor w „Jednoće“ wjac ludźi było. Tajkele spodobne wjesne zarjadowanje je předewšěm sobuskutkowacym kulturnych cyłkow wulkotna składnosć tróšku zhromadnje swjećić. Mnozy z nich běchu swojich partnerow abo partnerki sobu přinjesli. Wjacori pak so ze wšelkich přičin po programje zaso na dompuć nastajichu­. Škoda, wšako tajke něšto kaž na Chróšćanskej župnej ker­mušce tak často­ nimaš. Janek Wowčer

Wulce poradźeny wječor

Montag, 26. September 2016 geschrieben von:

Kamjenska župa znowa kulturnu kermušku swjećiła

Chrósćicy (SN/JaW). Z někotrymi překwapjenkami a nowosćemi wabješe župa „Michał Hórnik“ hosći na kermušu so­botu do Chróšćanskeje „Jednoty“. Ně­hdźe 200 ludźi bě přišło, byrnjež so ze zarjadowanjemi tón dźeń znowa kopiło, kaž županka Zala Cyžowa při witanju přispomni.

Jedna z překwapjenkow bě, zo je prěni serbski dudlowar Beno Nowak wšitkich při zachodźe witał, hrajo znate serbske pěsnički. To pak njeběše jenička nowosć. K wječeri njesydachu pomfritki, rězk abo gulaš, ale słódne regionalne wudźěłki ze swinjorězanja, twaroh změšany z lanym wolijom, pomazki, butra a kisałe kórki. Kóždy hósć smědźeše so po swojej woli posłužować, štož sej mnozy jako dobru ideju pohosćenja chwalachu.

Třeći raz wulki wuspěch žnjeli

Montag, 19. September 2016 geschrieben von:

Chróšćenjo znowa z najrjeńšej žnjowej krónu Sakskeje

Torgau/Chrósćicy (JK/SN). Sakska krajna domchowanka, kotraž so wčera w Torgauwje zakónči, bě za Chróšćanske wjesne towarstwo Domizna zawěrno wjeršk lětušeho towarstwoweho žiwjenja. Třeći raz, po tym zo běchu hižo lěta 2009 w Biskopicach a 2012 w Sebnitzu najrjeńšu žnjowu krónu Sakskeje předstajili, je so próca mnohich pomocnikow tež lětsa zaso­ wulce wudaniła.

Kowar za jednaćela powołany

Montag, 19. September 2016 geschrieben von:

Choćebuz (SN/JaW). Marko Kowar budźe nowy jednaćel Domowiny. Wón přewo­zmje zastojnstwo 1. januara 2017 po Bjarnaće Cyžu, kiž poda so kónc lěta na wuměnk. To je Zwjazkowe předsydstwo Domowiny sobotu w Choćebuzu wobzamknyło. Městno Kowarja so wupisa.

Chcedźa z Maćicu wušo hromadźe dźěłać

Donnerstag, 15. September 2016 geschrieben von:

Čłonojo předsydstwa Maćicy Serbskeje su so wčera w Choćebuzu zetkali. Na posedźenju wobdźěli so tež tamniši generalny superintendent Martin Herche. W srjedźišću wuradźowanja steješe połoženje ewangelskich Serbow w Delnjej Łužicy.

Choćebuz (ap/SN). Je hižo wjele lět z tradiciju, zo zetka so předsydstwo Maćicy Serbskeje jónu wob lěto w Delnjej Łužicy. Tam zeznajomja so z dźěławosću jed­neje serbskeje institucije abo serbskeho towarstwa. Tohodla wotmě so srjedowne posedźenje předsydstwa w Choće­buskim ewangelskim centrumje hromadźe z předsydstwom delnjoserbskeje Maśicy Serbskeje a z předsydstwom Spěchowanskeho towarstwa za serbsku rěč w cyrkwi.

Přistup k CIOFF wobzamknyli

Donnerstag, 15. September 2016 geschrieben von:

Janšojce (HA/SN). Hromadźe z wjesnymi zastupjerjemi je předsydstwo župy Delnja Łužica wčera w Janšojcach wuspěšny festiwal serbskeje kultury wuhódnoćiło, na kotryž móžachu před štyrjomi tydźenjemi něhdźe 8 000 wopytowarjow w tejle delnjołužiskej wsy witać. Wutrobnje dźakowaše so župan Harald Koncak tamnišej­ Domowinskej skupinje, wjesnej młodźinje a mnohim dalšim pilnym pomocnikam. We wsy samej běchu ideju zrodźili, wuhotować swjedźeń składnostnje 70lětneho wobstaća Domowiny w Delnjej Łužicy a 25. róčnicy załoženja tamnišeje župy. Mjez druhim z erta šefowki Janšojskeje młodźiny Silvy Oehlertojc su čłonojo předsydstwa zhonili, zo sej wjesnjenjo swjedźeń jara chwalachu, wo­sebje pokazanych serbskich nałožkow a mnóstwa narodneje drasty dla.

Kaž předsydstwo wčera wobzamkny, přistupi župa Delnja Łužica mjezynarodnej organizaciji za přewjedźenje folklornych festiwalow CIOFF, kotrejž Domowina hižo přisłuša. Dotal je mjeztym rozpušćeny rejwanski ansambl Pśijaśelstwo Delnju Łužicu tam zastupował.

Anzeige