Kulturnu identifikaciju a jeje wěstotu rozjimali

Budyšin (bn/SN). Kulturna identifikacija a jeje wěstota steještej dźensa dopołdnja w srjedźišću wčera zahajeneje mjezynarodneje konferency Budyskeho Serbskeho instituta pod hesłom „Dimensije kulturneje wěstoty w etniskich a rěčnych mjeńšinach“ w Budyskim Serbskim domje.

K temje přednošowaštaj Eckhard Bodenstein z Flensburga a Nicole Dołowy-Rybińska z Waršawy. Bodenstein poda zarys nastaća němskeje respektiwnje danskeje mjeńšiny w Schleswigskej a wupraji so za tak mjenowane opcionalne wuznawanje k mjeńšinje, kajkež na přikład w Sakskej a Braniborskej mamy. Ze sociolinguistiskeho stejišća přednošowaše pólska wědomostnica Dołowy-Rybińska wo sebjezrozumjenju młodźiny narodnych mjeńšin Kašubow, Serbow kaž tež Walizow a rozjima wažnosć rěče za swójsku identitu. Kulturnu praksu na polu napjatosćow mjez tradiciju a modernu wobjednawachu na to mjez druhim Teresa Jacobsowa z Budyšina a Yonten Nyima ze Chengduwa (China).